«قازاقستان» تەلەارناسى 2017 جىلعى 24 اقپان كۇنى قازاقستاندىقتاردىڭ كوڭىلىنەن شىققان «كەلىن» حيكاياسىنىڭ كورسەتىلىمىن اياقتايدى»، - دەپ حابارلادى تەلەارنا سايتى.

«كىشكەنتاي ءانانديدىڭ ومىرىنەن سىر شەرتكەن حيكايا بەس جىلدىڭ ىشىندە ءبىزدىڭ كورەرمەندەرىمىزدىڭ نازارىنان تىس قالعان جوق. تەلەكورەرمەندەر جەرگىلىكتى سالت پەن داستۇرگە سايكەس تۇرمىسقا ەرتە شىققان جانە بوتەن وتباسىعا كەلىن بولعان كىشكەنتاي قىزدىڭ تاعدىرىنا بەيجاي قاراي المادى. ءوزىنىڭ ەڭبەكقورلىعىنىڭ، توزىمدىلىگىنىڭ جانە ۇلكەندەرگە دەگەن قۇرمەتىنىڭ ارقاسىندا اناندي قايىن جۇرتىنا تەز ءسىڭىپ كەتەدى. بۇل قاسيەتتەرىنىڭ ارقاسىندا قازاق كورەرمەندەرىنىڭ دە كوڭىلىنەن شىعادى»، - دەپ جازىلعان مالىمدەمەدە.

باسقاسىن قايدام، «كەلىن» تەلەحيكاياسى سوڭعى بەس جىلدىڭ ىشىندە رەيتينگى جوعارى تەلەنوۆەللالاردىڭ قاتارىندا بولىپتى.

«وسى جىلداردىڭ ىشىندە حيكايادا باس رولدەردى سومداعان اكتەرلار دا بىرنەشە رەت اۋىستى. بالا كەزدەگى جانە بويجەتكەن ءانانديدىڭ ءرولىن ءۇش اكتريسا: اۆيكا گور، پراتيۋشا بانەردجي جانە توراد راسپۋترا سومدادى.

2014 جىلى استاناعا اۆيكا گور، ال 2015 جىلى ءانانديدىڭ جۇبايىنىڭ ءرولىن سومداعان سيددحارتح شۋكلا (شيۆا) كەلگەن بولاتىن. ءاربىر كەزدەسۋگە مىڭداعان جانكۇيەرلەر قاتىستى.

«قازاقستان» تەلەارناسى «كەلىن» حيكاياسىنىڭ كورسەتىلىمىن اياقتاي وتىرىپ، كورەرمەندەرىنە بۇدان دا قىزىقتى تەلەحيكايالاردىڭ كورسەتىلىمىن ۇسىناتىن بولادى»، - دەپ اياقتالعان تەلەارنا تاراتقان حابار.

ەسىمىزدە، تەلەحيكايا العاش باستالعاندا كامەلەتكە جاڭا تولعان قىز اناندي بىلىمنەن ماقۇرىم قالىپ، الدەبىر وتباسىنىڭ كەلىنى بولىپ كەتە بارعان. قاتال اجە، قاراڭعى وتباسى، ەركەتوتاي كۇيەۋمەن كىشكەنە قىزدىڭ ايقاسى باسىندا قىزىق كورىنگەن. الايدا، فيلم سوزىلىپ كەتتى، سوزىلعاندا ۇزاعىنان ۇزاق سوزىلدى. بولماشى وقيعانى دابىرايتىپ، قۇلاققا وتە تۇرپايى مۋزىكالارىن داڭعىرلاتىپ قازاقتىڭ «ميىن 5 جىل» اشىتتى.

ءانانديدىڭ ءرولىن سومداعان قىز قازاقستانعا كەلىپ، وسى تەلەحيكايانى تاراتاتىن ارناداعى «تۇنگى ستۋدياداعا» قوناق بولعاندا قازاقتىڭ الدەبىر قاتىندارى ولاردىڭ باس اياعىنا سولكەباي مەن التىن جۇزىگىن اسىپ كۇيدىرىپ ەدى-اۋ.

«كەلىن» تەلەحيكاياسى باسقاسىن قويعاندا قازاق ايەلدەرىنىڭ قانشاما التىن ۋاقىتىن ۇرلادى. ءار بولىمىنە كەتكەن ۋاقىتىن ايەلدەرىمىز باسقا ىسكە ارناسا البەتتە ناتيجە باسقا بولار ەدى.

«باسقا دا قىزىقتى تەلەحيكايالار» دەپ قويىپ ون جىل بويى بىتپەيتىن ودان دا سوراقى تەلەحيكايانى كورسەتپەسە يگى. وسى تەلەحيكايانىڭ ءار ءبولىمىن اۋدارىپ، دۋبلياج جاساۋعا كەتكەن اقشاعا قازاقتىڭ اۋىلدارىنان ءبىر بالانى 11 جىل وقىتۋعا اقشا بولۋگە بولار ەدى. بەس جىلدا ءۇش مىڭنان استام بالاعا قامقورلىق جاساۋعا بولار ەدى. جاقسى مەكتەپ سالۋعا بولار ەدى. ولاي بولمادى.

ءدال قازىرگى كۇنى باسشىسى جوق تەلەارناعا ايتار ءۋاجىم ەندىگارى «مي اشىتاتىن» شەتتىڭ دۇنيەسىن اۋدارۋمەن ەمەس، «مي سەرگىتىپ» سانانى وياتاتىنداي ءوز ونىمدەرىمىزدى دايىنداسا جاقسى بولار ەدى.

اقان بەكتاس