تەرريتوريا — ءاربىر قازاق ءۇشىن قاسيەتتى ۇعىم. ول — ەتنيكالىق گەن ءھام باستى قۇندىلىق.

 مەملەكەت باسشىسى قازاق شەكاراسىن شەگەندەپ، بۇۇ دەڭگەيىندە بەكىتتى دە. ەلىمىز كورشىلەرمەن تەرريتوريالىق داۋى جوق بىردەن-بىر مەملەكەت.

ەندى كۇنى كەشە رف-كە قوسىلعان قىرىمدا جيىن ءوتىپ، قازاقستاننىڭ شەكاراسىنا قاتىستى «قاتەرلى» پىكىر ايتىلدى. 

رەسەي مەملەكەتتىك دۋماسىنىڭ دەپۋتاتى پاۆەل شپەروۆ  پارلامەنتتىك «دوڭگەلەك ۇستەل» وتىرىسىندا رف قۇرامىنا «قازاقستان جەرىن قوسۋعا» ۋادە بەرىپتى-مىس:

—  ءقازىر كورشى مەملەكەتتەردى ءومىر ءسۇرىپ جاتقان ورىس ۇلتىنىڭ وكىلدەرىن – دياسپورا دەپ اتايمىز. شىن مانىسىندە ولار ءبىزدىڭ وتانداستارىمىز. بار بولعانى شەكارا ءبولىنىسى كەزىندە وزگە مەملەكەتتىڭ جەرىندە قالىپ كەتكەن جانە كەز كەلگەن ۋاقىتتا رەسەي قۇرامىنا قايتا قوسىلۋعا دايىن. بۇل ۋاقىتشا سىرت مەملەكەتتىڭ ەنشىسىنە كەتكەن ءبىزدىڭ جەرىمىز. شەكارالار ماڭگىلىك ەمەس جانە ءبىز رەسەي مەملەكەتىنىڭ شەكاراسىن قالپىنا كەلتىرەمىز. بۇل جاقىن ۋاقىتتا ورىن الادى،-دەپتى.

باستاپقىدا ءبىز بۇنى — ۋكراين اقپارات الاڭىنىڭ كەزەكتى «ۋتكاسى» دەپ قابىلدادىق. كەيىن جوعارىداعى «مالىمدەمەنىڭ» ۆيدەو جانە اۋديو نۇسقاسى شىققاندا، الاڭداي باستادىق. سەبەبى ۆيدەو-اۋديوفيكساسيا — فاكت. دەمەك بۇنداي مالىمدەمە جاسالدى. سوندا بۇل – رەسەي پارلامەنتىنىڭ رەسمي پوزيسياسى ما؟ جالپى، بۇل نە: مالىمدەمە، فاكت الدە ساندىراق؟

وسى ويمەن ءبىز رف مەملەكەتتىك دۋماسىنىڭ سپيكەرى ۆياچەسلاۆ ۆولودينگە حات جازىپ، جوعارىداعى مالىمدەمەنىڭ اق-قاراسىن انىقتاپ بەرۋىن سۇرادىق. تەكسەرۋ جۇرگىزىپ، شپەروۆ قازاقستاندىقتاردان كەشىرىم سۇراسىن دەپ تالاپ قويدىق. جاۋاپ كوپ كۇتتىرمەدى:

«قايىرلى كۇن، نۇرلىحان قالقامان ۇلى، مەملەكەتتىك دۋمادا مۇنداي يدەيا ەشقاشان دا كوتەرىلگەن ەمەس. پارلامەنت فراكسيالارىندا دا، تمد ىستەرى جانە حالىقارالىق ىستەر جونىندەگى پروفيلدىك كوميتەتتەردە دە مۇنداي ۇسىنىس جاسالعان ەمەس.  وعان ەشقانداي نەگىز جوق. شپەروۆتىڭ ءسوزى كونتەكستەن جۇلىنعان، ول ەكى مەملەكەت اراسىنداعى شەكارانى قايتا قاراۋدى ۇسىنعان جوق. قازاقستان – رەسەي ءۇشىن باۋىرلاس جانە جاقىن ارىپتەس بولىپ قالا بەرەدى». سەنۋگە تىرىستىق. ءبىراق قاناعاتتانعان جوقپىز. سوندىقتان مەملەكەتتىك دۋماعا جولدانعان سۇراقتى دا، كەلگەن جاۋاپتى دا – رەسەيدىڭ ىقپالدى دەگەن اقپارات اگەنتتىكتەرىنە جىبەردىك. ماسەلەن، «رەگنۋم» جانە «ريا نوۆوستي» فاكچەكينگ (فاكت تەكسەرۋ) جۇرگىزىپ، راستالاتىن بولسا، جەلىگە جاريالايتىندارىن جەتكىزدى. تەكسەرىلدى. راستالدى. اقپان ايىنىڭ العاشقى كۇنىندە – پروفيلدىك «پارلامەنتتىك گازەتادان» باستاپ، بارلىق اقپاراتتىق اگەنتتىكتەر «مالىمدەمەنىڭ جالعان» ەكەنىن جەتكىزدى. كەلگەن جاۋاپتى ءبىز نەگە رەسەيدىڭ اقپاراتتىق اگەنتتىكتەرىنە جىبەردىك دەگەن سۇراق تۋىنداۋى مۇمكىن. بىرىنشىدەن – اۋديتوريا، ەكىنشىدەن – رەسەيدىڭ رەسمي اقپارات قۇرالدارى، ال ۇشىنشىدەن – ەندىگارى رف-تە بولسىن، باسقا جەردە بولسىن بۇنداي «مالىمدەمەلەردىڭ» جاسالۋىن تىيۋ ەدى. ءىس وسىمەن ءبىتتى دەگەندە، ىزىنشە، «لدپر»ء-دىڭ قىرىم بولىمشەسىندەگى رەسمي سايتىندا شپەروۆتىڭ تۇسىنىكتەمىسى شىعا كەلسىن. «شىن ايتتىم»،-دەگەندەي. ءبىر گرامم وكىنىش جوق. ءماسساعان، بەزگەلدەك!

ەندى كەلىپ، ءبىز «لدپر» پارتياسىنىڭ باسپا ءسوز حاتشىسى اننا كرىلوۆاعا حابارلاستىق. اننا حانىم «لدپر» فراكسياسىنىڭ مەمدۋماداعى دەپۋتاتى لەونيد ەدۋاردوۆيچ (سلۋسكيي) باق-تاعى ءسوزى – ءلدپر-دىڭ پوزيسياسى ەكەنىن، ال قىرىم بولىمشەسىندەگى سايتتا جاريالانعان دەپۋتات شپەرۆوتىڭ پىكىرى لدپر پارتياسى جوعارعى كەڭەسىنىڭ ويىمەن ۇندەسپەيتىنىن جەتكىزدى.

«سوندا قىرىم ايماقتىق ءبولىمى لدپر پارتياسىنىڭ ورتالىق اپپاراتىنا باعىنباستان، ءوز ساياساتىن جۇرگىزە مە؟»-دەگەن ساۋالىمىزعا اننا حانىم جاۋاپ تاپپاي قينالدى. بار بولعانى: «دەپۋتات سلۋسكيي ءبارىن ايتتى. وسىمەن بۇل ماسەلە جابىلدى»- دەپ جاۋاپ بەردى. نونسەنس دەگەنىمىز وسى! سلۋسكيي دە، شپەروۆ تا – جيرينوۆسكيي قۇرعان پارتيانىڭ وكىلدەرى، ءبىر فراكسيانىڭ مۇشەلەرى. سلۋسكيي مىرزا: «شپەروۆتىڭ ءسوزى كونتەكستەن جۇلىنعان، تولىققاندى جالعان»،-دەسە، شپەروۆ بولسا: «مەن كەز كەلگەن ساۋاتتى ادام كەلىسەتىن پىكىردى ايتتىم»-دەپ كوسىلدى. ونىڭ ءوز پارتياسى: «شپەروۆتىڭ پىكىرىن قولدامايمىز»،-دەپ وتىر. سوندا شپەروۆ وندا نە ىستەپ وتىر؟ دەپۋتاتتىق مانداتتان ايىرۋ قاجەت شىعار؟! ارينە، ول ەندى ىشكى ماسەلەلەرى. ءبىر انىعى، «لدپر»-دىڭ «تەرريتوريالىق امبيسيالارىنا» قاتىستى ويلارىن رەسەيلىكتەردىڭ 0،6 پايىزى عانا قولدايدى ەكەن. بۇل تۋرالى ربك مالىمدەگەن. ول پارتيانىڭ نەگىزگى ەلەكتوراتى – زەينەتكەرلەر. شپەروۆ قىرىمدا پەنسيا الا الماي وتىرعان زەينەتكەرلەرگە كومەكتەسۋدىڭ ورنىنا، اي قاراپ، شوشقا تاعالاپ، جۇلدىز ساناپ ءجۇر.

دەمال، دەم ال، پاۆەل! نۇكتە.

نۇرلىحان قالقامان ۇلى،

دۋلات جالعاسپاي ۇلى

قاراعاندى.