ساتىلىمنان تۇسكەن قاراجاتتى تانىمال ورىنداۋشى جەرگىلىكتى بالالار ۇيىنە اۋدارماقشى.
رەسەيلىك شوۋ بيزنەستىڭ جۇلدىزى، تانىمال ورىنداۋشى تيماتي پەتروپاۆل قالاسىندا ايىپپۇل تۇراعىندا ون جىلدان استام ۋاقىت بويى تۇرعان سپورتتىق كولىگىن ساتىپ، تۇسكەن اقشانى بالالار ۇيىنە قايىرىمدىلىق رەتىندە بەرمەكشى دەپ حابارلايدى Sputnik قازاقستان ءتىلشىسى.
"تاماشا كولىك! – دەپ باعا بەرەدى ايىپپۇل تۇراعىنىڭ قىزمەتكەرى. – 2006 جىلدان بەرى وسىندا تۇر، جاقسى ساقتالعان! اككۋمۋلياتورىن قۋاتتاپ، كەتە بەرسەڭ بولادى، بىردەن ءجۇرىپ كەتەدى. ايتپەسە، كولىككە وبال، مۇندا قۇر ەسكىرىپ تۇر"
ب ا ق بۇل كولىك تۋرالى ءبىراز شۋلاسقاننان سوڭ تيماتي دا ويىن بولىسۋگە شەشىم قابىلداپتى. 4 اقپان كۇنى مۋزىكانت Instagram پاراقشاسىندا بۇل ماسەلەنى ءبىرجاقتى قىلعىسى كەلەتىندىگىن ايتتى.
"بارلىق قۇجاتتارعا قول قويۋعا دايىنمىن. پەتروپاۆل قالاسى ايىپپۇل تۇراعىنىڭ باسشىسىنان كولىكتى تەزىرەك ساتىپ، قاراجاتتى جەرگىلىكتى بالالار ۇيىنە جىبەرۋدى سۇرايمىن. ءبىزدىڭ باسپا ءسوز كەڭسەمىزبەن تەز ارادا حابارلاسىڭىز. قازاقستانداعى وكىلىمىز ساۋدانى ۇيىمداستىرىپ، كەلىسىمشارتتىڭ ءادىل تۇردە جاسالۋىنا كومەكتەسەدى. راحمەت"، — دەپ جازادى تيماتي.
پىكىر قالدىرۋ