1 ناۋرىزدان باستاپ ناۋرىز مەرەكەسىنە دەيىن تاجىكستانداعى جوعارعى وقۋ ورنىنىڭ ستۋدەنتتەرى ساباققا ۇلتتىق كيىممەن كەلۋى كەرەك. تاجىكستاننىڭ ءبىلىم جانە عىلىم مينيسترلىگىنىڭ جازباشا نۇسقاۋى بويىنشا، ۇلتتىق كيىمدى جوعارى وقۋ ورىندارى مەن مەكتەپتەگى ۇستازدار قاۋىمى دا كيۋى ءتيىس. بۇل تۋرالى www.centralasian.org جازدى.

مينيسترلىكتىڭ باسپا ءسوز حاتشىسى ەحسوني حۋشۆاكتتىڭ ايتۋىنشا، ناۋرىز ايىندا تاجىك قىزدارى اتلاس پەن ادراستان تىگىلگەن ۇلتتىق كيىم مەن كەستە باسىلعان چاكان كيەدى. ناۋرىز مەرەكەسى كەزىندە دە ولار مەرەكەلىك كيىممەن جۇرەدى.

رەسمي نۇسقاۋدا "تاجىك حالقىنىڭ ەجەلگى ءداستۇرىن قايتا جانداندىرۋ" ماقساتىندا وسىنداي شەشىم قابىلدانعانى ايتىلعان. ناۋرىز مەرەكەسى تاجىكستاندا 21-24 ناۋرىز ارالىعىندا اتاپ وتىلەدى.

دۋشانبەدەگى جوعارعى وقۋ ورىنداعىلار وسىنداي نۇسقاۋ العاندارىن راستادى. بۇعان دەيىن ناۋرىز مەرەكەسى كەزىندە قىزدارعا ۇلتتىق كيىم كيىپ كەلۋ تۋرالى كەڭەس بەرىلەتىن، ءبىراق ول كەزدە رەسمي نۇسقاۋ بەرىلمەيتىن.

ال، قىرعىزستاندا ۇلتتىق ناقىشتاعى ءبىرىڭعاي مەكتەپ فورماسى 2014 جىلى قاڭتار ايىندا ەنگىزىلەتىنى حابارلانعان بولاتىن. 3 جىل بۇرىن قىرعىزستان رەسپۋبليكاسى ءبىلىم جانە عىلىم مينيسترلىگى وسىنداي شەشىم شىعارعان.

سودان بەرى قىرعىز مەكتەپتەرىندەگى وقۋشىلار ايىرقالپاقتارىن تاستاماي ءجۇر دەسە دە بولادى.

قازاقستاندا مەكتەپ فورماسى جىل سايىن ءبىلىم كۇنى قارساڭىندا داۋعا اينالادى. كوپتەگەن مەكتەپ ديرەكتورلارى وقۋشىلاردى ءوزىنىڭ الدەبىر تانىسىنىڭ فيرماسى تىككەن مەكتەپ فورماسىن الۋعا ماجبۇرلەپ جاتادى.

ال، مينيسترلىك تاراپىنان ازىرگە جالپىۇلتتىق ءبىرىڭعاي مەكتەپ فورماسى تۋرالى اڭگىمە شىقپاعان. الايدا، تاجىكستاننىڭ «تاجىك حالقىنىڭ ەجەلگى ءداستۇرىن قايتا جانداندىرۋ» يدەياسىن قازاقستاندا دا قولدانۋعا بولادى. كوبىنە كەنجە قالىپ قالاتىن، شەت قاعىلاتىن «قازاقتىڭ مادەنيەتىن» نەگە  مەملەكەت تاراپىنان قايتا جانداندىرمايمىز؟ ونداي بولعان جاعدايدا بالالار دا، اتا-انالار دا ۇلكەن باس اۋرۋدان ايىعار ەدى. سونىمەن قاتار قازاقستانداعى ەكى ميلليونداي وقۋشى مەن مۇعالىمدەرگە ۇلتتىق ناقىشى بار ءبىرىڭعاي ۇلگىدەگى كيىم تىگۋدەن ارنايى كاسىپورىن اشىپ، ءبىراز ادامدى جۇمىسپەن قامتي دا الار ەدىك. ونسىز دا بالالارىمىز كيەتىن كوستيۋم مەن كويلەكتى جۇڭگو مەن تۇركيادان تاسيمىز. ەڭ باستىسى، قازاقى ءيىس، قازاقى بولمىس كەرنەيتىن ەدى وقۋ وشاقتارىن.

اقان بەكتاس