بۇگىن 28ء-شى بۇكىلالەمدىك قىسقى ۋنيۆەرسيادا ويىندارى ءوز مارەسىنە جەتتى. ەلباسى نۇرسۇلتان نازاربايەۆ الماتىداعى 28ء-شى دۇنيەجۇزىلىك قىسقى ۋنيۆەرسيادادا جوعارى ناتيجە كورسەتكەن ۇلتتىق قۇرامانىڭ مۇشەلەرىن قۇتتىقتادى.

«سىزدەردىڭ قايسارلىقتارىڭىزدىڭ ارقاسىندا قازاقستاننىڭ جالپى كوماندالىق ەكىنشى ورىنعا قول جەتكىزۋى – ەلدىڭ بيىك بەدەلىنىڭ، بۇقارالىق سپورتتىڭ دامىعاندىعىنىڭ ايقىن كورسەتكىشى.

قازاقستاننىڭ سپورت مەكتەبىنىڭ داڭقىن تاعى ءبىر مارتە اسقاقتاتىپ، جوعارى دايىندىقتارىڭىزدى، جەڭىسكە دەگەن ۇمتىلىس پەن ەرىك-جىگەرلەرىڭىزدى كورسەتتىڭىزدەر.

2017 جىلعى ۋنيۆەرسيادا بارلىق قازاقستاندىقتار ءۇشىن ناعىز مەرەكەگە اينالدى.

سپورتشىلارىمىزدىڭ جەڭىسى قىسقى سپورت تۇرلەرىن ودان ءارى دامىتۋعا سەرپىن بەرىپ، كەلەر ۇرپاققا ۇلگى بولۋعا ءتيىس.

ۋنيۆەرسيادانىڭ ۇيىمداستىرۋ كوميتەتىنە جارىستى جوعارى دەڭگەيدە وتكىزىپ، جاۋاپكەرشىلىك تانىتقانى ءۇشىن العىس ايتامىن.

بارلىق سپورتشىلارعا مىقتى دەنساۋلىق جانە جاڭا بەلەستەردى باعىندىرۋ جولىندا تابىس تىلەيمىن!»، – دەلىنگەن قۇتتىقتاۋدا.

28ء-شى بۇكىلالەمدىك قىسقى ۋنيۆەرسيادا ويىندارىنىڭ جابىلۋ سالتاناتى «قازاقستان» جانە «Kazsport» تەلەارنالارىندا تىكەلەي ەفيردە كورسەتىلدى. ۋنيۆەرسيادا ويىندارىنىڭ جابىلۋ سالتاناتى 1،5 ساعاتقا سوزىلىپ، «الماتى -ارەنا» كەشەنىندە ءوتتى. كورەرمەندەر قىزىقتى وقيعالارعا تولى شوۋ- باعدارلاما تاماشالاپ، شاراعا قازاقستان ەستراداسىنىڭ جۇلدىزدارى قاتىستى.