گاۆاييادا اقش پەن گەرمانيا اراسىنداعى تەننيس ماچىندا گەرمانيانىڭ گيتلەر كەزىندەگى ءانۇرانى وينالعان دەپ حابارلايدى bbc.com. اقش  تەننيس اسسوسياسياسى «گەرمانيا بارلىعىنان جوعارى» دەپ باستالاتىن ءانۇراندى قويعانى ءۇشىن كەشىرىم سۇرادى.

ءانۇران گەرمانيا وكىلى اندرەي پەتكوۆيچ پەن امەريكاندىق اليسون ريسكەنىڭ اراسىنداعى ماچتىڭ الدىندا وينالعان.

«بۇل ورەسكەل قاتەلىك جانە ادامدى قورلايتىن ەپيزود. بۇل مەنىڭ باسىمنان وتكەن ەڭ ۇلكەن جاعىمسىز جاعداي. اسىرەسە فەدەراسيا كۋبوگىندەگى» دەدى پەتكوۆيچ.

«گەرمانيا تۋرالى ءان» 1920 جىلى ۆەيمەر رەسپۋبليكاسىنىڭ رەسمي ءانۇرانى بولدى. الايدا ەكىنشى دۇنيەجۇزىلىك سوعىستان كەيىن ونىڭ العاشقى «گەرمانيا بارلىعىنان جوعارى» سوزدەرى الىنىپ تاستالدى.

امەريكاندىق تەننيس اسسوسياسياسىنىڭ مالىمدەمەسىندە ءانۇراننىڭ ەسكى نۇسقاسى قويىلعانىنا قاتتى وكىنەتىنىن ايتىپ، سپورتشىلار مەن جانكۇيەرلەردەن كەشىرىم سۇراپ، ەكىنشى مارتە مۇنداي ورەسكەل قاتەلىك قايتالانبايتىنىن ايتتى.

فەدەراسيا كۋبوگى - ايەلدەر تەننيسىندەگى ءىرى حالىقارالىق كوماندالىق جارىس. پەتكوۆيچ پەن ريسكە اراسىنداعى ماچ امەريكاندىق ريسكەنىڭ جەڭىسىمەن اياقتالدى. ەسەپ: 7-6، 6-2.