ىنتىزار بوپ ماڭگى ارمانعا كۇن كەشتىم،
وتىرىكپەن سىيىسا الماي كۇن كەشتىم،
باسقىنشىلار باسىنۋعا تالاسقان،
قۇلدىڭ كۇيىن كيگىم كەلمەي تىرەستىم.
جول ورتادا قۇلاپ جاتىپ، جارىسقان،
مۇڭسىزدارمەن كىرىگە الماي مۇڭ كەشتىم،
بولىسە الماي ءبىر كۇيەۋدى اڭدىسقان،
كۇيىن كەشتىم سىيىسپاعان كۇڭدەستىڭ.
ءدال وسىنداي باسىلماعان قۇيىنى،
ءدال وسىنداي عاسىر ماعان بۇيىردى،
بىرگە ءومىر سۇرگەنمەنەن ەكەۋمىز،
مۇلدەم باسقا بولىپ شىقتىق بۇل كۇنى...
***
سىرەسكەن مۇزدار،
سولىمدا دا،
وڭىمدا.
قالعىعان شىڭدار،
قاڭعىرعان جىلدار سوڭىمدا.
قارايعان قۇزدار،
قول سوزىپ تۇرعان الىستان،
كورىم بە، الدە،
جولىم با؟
مۇزدانبا،ءبىراق،
سەن ماعان قاراپ جىلاما،
قاپىدا قالعىپ كەتەتىن بولسام قولىڭدا.
قالعىسام ەگەر،
ەرىسەم ەگەر،
شەگىنسەم،
ەشكىمىم جوق قوي،
جوقتايتىن مەنى سوڭىمدا...
***
قاجەتى جوق قاراۋدىڭ، اتىمدى دا اتاۋدىڭ،
قارا تاستان ءسال جۇمساق، اق ماقتادان قاتالمىن.
قياناتقا جابىسىپ العان قاتال قارعىسپىن،
ادىلەتكە قوس قولىن جايىپ تۇرعان باتامىن!
بۇ دۇنيەدە قورلىعى
از بولماعان كورمەگەن،
قانشاما جان،
قانشاما-
زار مەن ءۇمىت جەرلەنگەن،
جۇرەكتەگى ەشكىمىڭ قازا المايتىن مولانى،
ءتىرى ارقالاپ كەلەمىن، بار بولعانى، بولعانى.
تاس ارتقانداي مەحنات كوتەرتكەن سوڭ كوتەرگەم،
دار الدىندا تۇرعانداي ۇيرەنشىكتى ۇرەيمەن،
ارمان ەتسەم سەندەرشە ارمانىما جەتەر دە ەم،
ءوزى ارمان بوپ ءومىرىم كەتكەنىن تەك بىلەر مە ەڭ؟
از بولعانداي جاسىمنان تارتقان قايعىم ءوزىمنىڭ،
ءدارۋى از تاعى بر دەرت قوسىلدى نە قىلدىم،
كوز جازدىرىپ بارىنەن، كەلەدى ەندى كوز ىلگىم،
قالا بەردىم سول جاۋىر جولدارىمدا ءوزىمنىڭ...
***
جالعىز ايەل
جالعىز ايەل تۇنگە جالعىز باتاتىن،
جۇرەك سىرىن جاپىراققا ايتاتىن،
تاڭ اتقاندا جالعىز شىعىپ ۇيىنەن،
كەشكە قاراي جالعىز كەلە جاتاتىن.
ءسۇيۋ ءۇشىن جاراتىلعان وت ءتانىن،
سۇيگىزەتىن سۇر جاڭبىرعا باتقان كۇن،
سۇيگىزبەگەن ەرىندەرى كەزەرىپ،
سۇيىلمەگەن سول قالپىندا قاتاتىن.
ساعىنىشتان جان-جۇرەگى قالجىراپ،
جالعىز جۇرەك جالعىز قالىپ سوڭعى رەت،
اقىرعى رەت ايناعا كەپ قاراپ اپ،
اقتىق دەمى توقتايتىن.
جالعىز بولساڭ باسىڭنان ب ا ق اۋنايدى،
جالعىز قالما!
جاۋقازىن قىز!
بولمايدى!
جالعىزدىقتىڭ العاشقىسى بولمايدى،
جالعىزدىقتىڭ اقىرى دا بولمايدى...
***
سەنى قايتا جوعالتۋدان قورقامىن،
جانە قايتا تابىسۋدان قورقامىن.
قۇلاپ ەدىڭ شىعا الماعان شىڭىڭنان،
قۇلارداي بوپ مەن دە قالعام سورتاڭ كۇن.
سەن جوعالساڭ، مەن دە بىرگە جوعالام،
سەن ورالساڭ مەن دە ومىرگە ورالام،
تاس-تالقان بوپ قيراپ قالعان ورنىڭنان،
سەن تۇرا الساڭ مەن دە بىرگە وڭالام.
***
سەنى ىزدەسەم، جىرعا كەلىپ جۇگىنەم،
جۇگىنەم دە جوقتىعىڭنان تۇڭىلەم.
مۇزداي بولعان سەزىمىمدى ءجىبىتىپ،
ساعان اعا، بارعىم كەلدى،بۇگىن مەن.
ايتقىم كەلدى سارى ايازدان كەلدىم دەپ،
كوكتەمدە ەككەن قىزعالداعىم سولدى دەپ،
اۋىرلاپ ءجۇر، ونسىز دا اۋىر تالانىم،
كورگىم كەلدى ومىرىمنەن سوڭعى رەت.
ءبارىن ەستەن شىعارعىم كەپ، جاق اشپاي،
كەزىپ كەتكىم كەلدى الەمدى،
قاپ تاۋعا،
تارتىپ كەتكىم كەلدى تۇتەك اقپاندا،
بارسا كەلمەس جان باسپاعان جاپانعا...
***
جالعان بولىپ شىقتى ما؟
مەنىڭ كۇللى ارمانىم،
ارمان بولىپ كەتتى مە،
مەندەگى بار جانعان كۇن...
ومىرىمنەن ايىرما؟
سالا بەرمە ۋايىمعا؟
مەن دە نازىك ايەلمىن،
جارالماعان اۋىرعا...
باقىتتى ەدىم سەن باردا،
جاقۇت ەدىم سەن باردا!
سەن امان بول!
امان بول!
ءومىر ارتتا،
كور الدا.
قىرشىندار كوپ قيىلعان تاڭدارىنا جەتە الماي،
زارعا تولى سەزىمدەر ارتقان بەلدەر قانشاما،
سونىڭ ءبارىن كوتەرىپ ءۇنسىز جاتقان جەر عانا،
سەنسىز كۇندەر شارشاتىپ، ارپالىسقان مەن عانا،
...وسى ەكەن عوي،
ماڭدايعا بىتكەن تاعدىر
ە،اللا...
***
وزەگىمدى ورتەپ ول كەتتى،
وزگە جۇرەكتەرگە ەلشىلەپ،
سول كەتكەننەن مول كەتتى،
ازابىن جىرعا ەنشىلەپ.
وكىنىش ەرتىپ مەن كەتتىم،
كۇنباتىس جاققا بەتتەگەن،
كوش ارتقان جالعىز ىنگەندەي،
بوزداعان داۋسى جەتپەگەن.
الاۋلاپ تۇرعان كەزىمدە،
الدىمدا تۇرعان وتكەل ەڭ،
ورانعان كەزدە سەزىمگە،
وزەن بوپ كەتتىڭ تەپ-تەرەڭ.
...سودان سوڭ كەنەت سەن كەلدىڭ،
داۋىلدان كەلدىڭ
الىسىپ،
نە دەمەك ەدىڭ؟
نە دەرمىن؟
ەشكىمنەن وپا كورمەدىم.
***
قۇداي ءۇيى!
ەنگىز مەنى جاۋراعان،
باۋلى نۇرمەن!
ءجان-تانىمدى باۋراپ ال.
الدا-قۇبىلا،
ارتتا –التاي...
جولدا –مەن...
وڭ نازارىڭ تۇسەر مە ەكەن،
ءبىر اللام؟!
قۇداي ءۇيى!
ماعان ءوزىڭ پاناسىڭ،
مەنى ۇعاتىن جانە ءوزىڭ عاناسىڭ...
تابۋ ءۇشىن جۇرەگىمنىڭ داۋاسىن،
تاڭۋ ءۇشىن قانى اققان جاراسىن،
ساعان قاراي بارا جاتام اعىلعان،
جۇرتپەن بىرگە جانى زار.
تاعدىرىمدى ءبۇلدىرىپ اپ اداسقان،
سۇراۋ ءۇشىن سەنەن سونىڭ جاۋابىن،
جولداۋ ءۇشىن دۇعا ارقىلى سەن جاققا،
تاعدىرىمنىڭ ساۋالىن،
ادامداردىڭ قولىمەنەن جاسالعان،
جازباق بولىپ تاۋقىمەتىن نالانىڭ،
بارا جاتام ساعان قاراي، اعىلعان،
جۇرتپەن بىرگە جانى زار...
***
بويىمدى الدى ىنتىزار ءحالىم، جەبەشى؟
جەبەشى، مەنى ماحاببات ءپىرى؟ دەمەشى؟
عاشىقتار ەدىك، اداسىپ قالدىق قاپىدا،
ەسىڭدەمىن بە،ەر مىنەز جىگىت، مەن وسى؟
ەسىڭدە مە ەكەن،ەسىڭدە قالام دەگەنىم،
ەسىڭنەن كەتپەس كەزىڭدە قالام دەگەنىم،
وزىڭە ىنتىق سوزىمدە قالام دەگەنىم،
ءبارىن دە قويشى،
جولىڭدا سەنىڭ جولداس بوپ،
سويىلىن سوعار دوس بولىپ قالساق دەپ ەدىم.
ءسوز تۇگىل، ءاربىر دەمىنىڭ ءوزى ...............
جاراتقان يەم جىبەرگەن ءوزى قىزىرداي.
تابىسقان ەدىك،
باعىنتقان ەدىڭ، امال نە،
جاتىرمىن ەندى، سونە الماي قالعان قىزۋداي...
***
كەشىر اللا؟
كەشىر، اللا؟
جۇبانىشسىز سەزىمدى،
مالماڭداي بوپ كوكتەمدە،
قانشاما رەت،
جاڭبىر استى كەزىلدى.
كەشىر اللا،؟
مۇزداي سۋىق كەزىمدى؟
اق قاعاز بەن قارا ءتۇننىڭ ىشىندە،
قاڭعىپ كەتكەن ءسوزىمدى؟
كەشىر، اللا؟
جۇرەگىمنىڭ جىلۋىن،
ەشكىمىمەن بولىسپەگەن كەزىمدى،
نە كورسەم دە،
بوي بەرمەي،
كوندىكپەگەن ءتوزىمدى.
كەشىر، اللا؟
مۇراسىنداي شەبەردىڭ،
ۇيىپ-توگىپ بارلىق ءتۇرىن ونەردىڭ،
ءبارىن بەرىپ، ءبارىن بەرىپ، تەك قانا،
ب ا ق بەرمەگەن كورىنگەنگە بۇيىرعان؛
قارا ورمانىم-قالىڭ ەلدىڭ ىشىندە،
ءتىل قاتقىزىپ قويعان قيان-قيىردان؛
شىڭعا اينالعان قاناتىما ءسۇرىنىپ،
ۋلى مۇڭعا جازاتايىم ۇرىنعان،
ءومىر بەرگەن تىم اۋىر،
تاعدىرىما كىنالى،
باستى ايىپكەر ءوزىڭدى؟
***
