اقمولا وبلىسى ەسىل اۋدانىنداعى دۆۋرەچەنسكيي اۋىلدىق وكرۋگىنىڭ تۇرعىندارى اكىمنىڭ ۇستىنەن شاعىم تۇسىرگەن، دەپ حابارلايدى sputniknews.kz جاڭالىقتارى.

ولاردىڭ ايتۋىنشا، ول بالاعات سوزدەر ايتىپ، ءتىپتى تۇرعىنداردىڭ بىرىنە قول دا جۇمساعان. ويتكەنى اكىمگە ولاردىڭ جينالىستا قويعان سۇراقتارى ۇناماپتى. 

ەكى تۇرعىننىڭ شاعىمى بويىنشا اقمولا وبلىسىنداعى مەملەكەتتىك قىزمەت ىستەرى جانە جەمقورلىققا قارسى كۇرەس اگەنتتىگىنىڭ ادەپ جونىندەگى كەڭەسى ارنايى تەكسەرىس جۇرگىزگەن. تەكسەرىس ماتەريالدارىنا سۇيەنسەك، قاڭتار ايىندا اۋىلدا جينالىس ءوتىپ، وندا تۇرعىندار اكىمگە كورشى اۋىلعا اپاراتىن جولدى جوندەۋ، قي-تەزەكتى شىعارۋعا قاتىستى سۇراقتار قويعان.

 شاعىمدانۋشىلاردىڭ ءبىرىنىڭ ايتۋىنشا، ءبىر كۇننەن سوڭ اكىم قايرات مۋسين ونىڭ ۇيىنە جانەن بالاسىنىڭ جۇمىسىنا وڭمەڭدەپ بارىپ، وكتەمدىك كورسەتپەكشى بولعان. ول بيلىك وكىلىنە جاراسپايتىن قىلىق كورسەتىپ، بالاعاتتاعان، ءتىپتى جىگىتكە قول دا جۇمساعان. تۇرعىننىڭ ايتۋىنشا، اكىمنىڭ ءوزى كەڭەستىڭ الدىنا بارعاندا قول سىلتەگەنىن تەرىسكە شىعارىپتى، تەك داۋىس كوتەرىپ سويلەگەنىن عانا مويىنداپتى. 

كەڭەستەگىلەر تۇسىندىرگەندەي، اۋىل اكىمى ءوز قىلىعى ارقىلى مەملەكەتتىك قىزمەتشىلەردىڭ ادەپ كودەكسىن بۇزعان. ەسىل اۋدانىنىڭ اكىمىنە مۋسينگە قاتاڭ سوگىس جاريالاۋ ۇسىنىلدى. 

ادەپ كودەكسىن وسى وقيعادان بىرەر كۇن بۇرىن تاعى ءبىر اۋىل اكىمى ورەسكەل بۇزدى. جارقايىن اۋدانى وترادنىي سەلولىق وكرۋگىنىڭ اكىمىن ادەپ جونىندەگى كەڭەس ودان دا قاتال جازاعا تارتۋدى ۇيعاردى. اۋدان اكىمى اۋىل باسشىسىن جۇمىستان شىعارۋى ءتيىس. 

مارات مۇقانوۆ رولگە اششى سۋ ۇرتتاپ الىپ وتىرعان. 13 قاڭتار كۇنى دەرجاۆينسكىدە قىزمەتتىك كولىگىن مىنگەن اكىمدى جول پوليسەيلەرى توقتاتادى. ونىڭ جۇرگىزۋشى كۋالىگى جوق بولىپ شىقتى، مەديسينالىق تەكسەرىستەن وتۋدەن دە  ۇزىلدى-كەسىلدى باس تارتقان. مۇنىڭ ۇستىنە پوليسەيدى باسىمەن ۇرىپ، ءتىسىن سىندىرعان. «باتىرلىق» تانىتقان اكىمگە قاتىستى اكىمشىلىك حاتتاما تولتىرىلىپ، ايىپپۇل سالىندى. سونداي-اق بيلىك وكىلىنە قول جۇمساعانى ءۇشىن سوتقا دەيىنگى تەرگەۋ جۇرگىزىلۋدە. 

ايتپاقشى، وسى وقيعالاردان كەيىن اۋدان اكىمى، اۋدان اكىمدەرىنىڭ ءۇش ورىنباسارى، اۋدان اپپاراتىنىڭ جەتەكشىسى، توعىز اۋىلدىق وكرۋگ اكىمى، وبلىستىق باسقارما باسشىسىنىڭ ورىنباسارى جاۋاپكەرشىلىككە تارتىلدى.