ق ر مادەنيەت جانە سپورت ءمينيسترى ارىستانبەك مۇحامەدي ۇلى ءوزىنىڭ Facebook پاراقشاسىنا جاس ءانشى ديماش قۇدايبەرگەننىڭ I am a singer جوباسىنىڭ  7ء-شى كەزەڭىندە ايتاتىن انىنە ارنايى باعدارلاما ۇيىمداستىرىپ جاتقانىن جازدى دەپ حابارلايدى Qamshy.kz.

ديماش بۇعان دەيىن كەلەسى كەزەڭدە قازاقشا ءان ايتاتىنىن حابارلاعان. ءمينيستردىڭ ايتۋى بويىنشا، ءان سيمفونيلىق وركەستردىڭ سۇيەمەلدەۋىمەن ايتۋدى جوسپارلاپ وتىر.

«ءقازىر ءبىز ديماشقا ارناپ ارنايى باعدارلاما دايىنداپ جاتىرمىز. ديماش كەلەشەكتە الەمدىك ساحنادا ونەر كورسەتىپ، ءبىز ماقتانىشپەن «بۇل ءبىزدىڭ ديماش قۇدايبەرگەن» دەگەن كۇنگە جەتەتىنىمىزگە سەنىمدىمىن» دەيدى ارىستانبەك مۇحامەدي ۇلى.

مينيستر بۇعان دەيىن دە بىرنەشە مارتە ديماش قۇدايبەرگەننىڭ ونەرىن باقىلاپ، وعان بارىنشا قولداۋ ءبىلدىرىپ جۇرگەنىن جازعان.

ديماشتىڭ اسپان استى ەلىندەگى «I am a singer» جوباسىنا سەبەپكەر بولعان ەرتاي ءنۇسىپجانوۆ ەكەنى حالىق اراسىندا بەلگىلى. ول ءوزىنىڭ Facebook پاراقشاسىندا ديماشتىڭ حالىقارالىق جوبالاردا بوي كورسەتكەنىنە ارىستانبەك مۇحامەدي ۇلى سەبەپكەر بولدى دەگەندەردى سىنادى.

«ديماش قۇدايبەرگەن I Am a Singer جوباسىنا قالاي كەلدى؟» دەگەن ساۋال توڭىرەگىندە وربىگەن سۇحباتىم جاريالانعان كۇنى، ديماشتى وسى كونكۋرسقا قانداي قيىندىقتارمەن بەتپە-بەت كەلىپ ءجۇرىپ قاتىستىرعانىمدى ءوز كوزىمەن كورىپ جۇرگەن ديماشتىڭ ءبىر كومەكشىسى ماعان تەلەفون سوعىپ:

– ءسىز سۇحبات بەرىپ پە ەدىڭىز؟ – دەدى.

– ءيا، – دەدىم.

– جاڭا ءمينيستردىڭ ءوزى حابارلاسىپ، مەنەن «ەرتاي دەگەن كىم؟» دەپ سۇرادى، – دەدى دە، ءسوزىن تۇسىنىكسىز اياقتادى...

ال ءبىر كۇن بۇرىن ديماشتىڭ اكەسى قانات ايتبايەۆتىڭ ۇلىنىڭ وسى جوباعا قاتىسۋىنا قولداۋ كورسەتكەنى ءۇشىن مادەنيەت جانە سپورت مينيسترلىگىنە ايتقان العىسى جاريا بولعان ەدى... وسىدان كەيىن-اق مۇندا ءبىر شيكىلىكتىڭ پايدا بولعانىن بىلگەنمىن...

ەندى مىنە، كۇنى كەشە عانا مينيستر ارىستانبەك مۇحامەدي ۇلى: «..پري پوددەرجكە مينيستەرستۆا ۆ 2015 گودۋ ديماش پرينيال ۋچاستيە ۆ مەجدۋنارودنوم كونكۋرسە «سلاۆيانسكيي بازار»، گدە ستال وبلاداتەلەم گران-پري، تاكجە بليستاتەلنو ۆىستۋپاەت ۆ داننوە ۆرەميا ۆ كيتايسكوم كونكۋرسە پروفەسسيونالنىح يسپولنيتەلەي «I am a singer»... ... ۆوت ەتو ياۆلياەتسيا سۆيدەتەلستۆوم توگو، چتو مى ۆىپولنياەم نا كاچەستۆەننوم ۋروۆنە پورۋچەنيا گلاۆى گوسۋدارستۆا»، – دەدى.

جالپى، قازاقتىڭ ءبىر ۇلى ءبۇتىن ءبىر ۇلتتىڭ رۋحىن تۋ ەتىپ جەلبىرەتىپ شىعىپ ەدى، ونى «مەن تانىتتىم» دەۋشىلەر كوبەيدى. مەيلى عوي، كوبەيسىن! سەبەبى، تالانتتى ۇل قازاقتىكى بولعان سوڭ، وعان قاي قازاق قالاي ماقتانسا دا جاراسادى، قالاي تالاسسا دا كەشىرىمدى... ديماشتىڭ اينالاسىنا توپتاسىپ ۇلكەن وقيعانىڭ ارتىندا وزدەرىن كوپ ءىس تىندىرىپ جۇرگەندەي كورسەتكىسى كەلگەن ءاربىر جانعا مەن سونداي تۇسىنىستىكپەن قاراپ كەلەمىن...

ەكى جىل ەڭبەكتەندىم ەكەن دەپ، ىستەگەن ءىسىمدى مىندەت قىلمايمىن. ەڭبەگىم باعالانسا ەكەن دەپ تە دامەلەنبەيمىن ءارى وعان ۇمتىلمايمىن دا. سەبەبى، ەڭبەكاقى تالاپ ەتىپ، باعالاۋ سۇرايتىنداي بۇل الدەكىمنىڭ تاپسىرىسى ەمەس! مەن بۇل ءىستى ەشكىمنىڭ بۇيرىعىمەن، ەشبىر ادامنىڭ تىلەگىمەن ورىنداعان جوقپىن. ارى-بەرىدەن سوڭ بۇل كەز كەلگەنىمىزدىڭ موينىمىزداعى – ازاماتتىق پارىز. ۇلت، ونەر الدىنداعى ءاربىر ازاماتقا جۇكتەلگەن بورىش دەپ تۇسىنەمىن. سول سەبەپتى، سۇحبات الامىز دەگەن بارلىق جۋرناليستەردەن باس تارتتىم. «ديماشتى تانىتقان مەنمىن» دەگەندەي، ءار جەردەن ءبىر جىلت ەتىپ كورىنۋدى ءجون سانامايمىن. ديماشقا تالانتتى بەرگەن – قۇداي! ال مەن ءبىر سەبەپكەر عانامىن... مۇنى، سونداي-اق، قىتايدا ءبىلىم العان سوڭ، سول ەلگە تەڭدەسسىز مادەنيەتىمىزدى تانىتسام ەكەن دەگەن ويدان تۋعان ارمان دەپ تە ايتا الامىن. دەمەك، مەن بار بولعانى ءوز ارمانىما ادال ەڭبەگىممەن قول جەتكىزگەن، سول ارقىلى حالىقپەن بىرگە ولشەۋسىز قۋانىشقا بولەنگەن وسى ەلدىڭ باقىتتى ءبىر ازاماتىمىن.

جاھاندانۋ داۋىرىندە ادەپ-عۇرىپ، سالت-سانامىزدى، مادەنيەتىمىزدى ساقتاپ قالۋدىڭ بىردەن-بىر جولى – ونى باسقالارعا پاش ەتۋ. قازاقتىڭ ءتول مادەنيەتى، ۇلتتىق قۇندىلىقتارى بىزگە – قازاققا عانا قاجەت! اۋمالى-توكپەلى زاماندا قول قۋسىرىپ وتىرماي نەمەسە بيلىككە جالتاقتاي بەرمەي، شىن ۇمتىلساق تالاي بيىكتەردى جالعىز ءجۇرىپ-اق باعىندىرۋعا بولاتىنىن سوزبەن ەمەس، ىسپەن دالەلدەگىم دە كەلدى... ال ەندى ءمينيستردىڭ مادىمدەمەسىن قالاي تۇسىنۋگە بولادى؟ وسى جوباعا قازاق ءانشىسىن قاتىستىرۋ تۋرالى يدەيادان باستاپ، ديماشتى كونكۋرس «ەسىگىنە كىرگىزىپ جىبەرگەنگە» دەيىنگى ەكى جىل ۋاقىت ارالىعىندا ءىستىڭ باسى-قاسىندا جۇرگەن مەن نەگە مينيسترلىكتىڭ قولداۋى بىلاي تۇرسىن، وسى ىسكە اتسالىسقان بىردە-بىر مينيسترلىك قىزمەتكەرىن كورە المادىم؟! مينيستر مىرزا قولداۋىن كىمگە، قالاي كورسەتتى؟ ونى قالاي، نەمەن دالەلدەيدى؟ نەمەسە ارىستانبەك مۇحامەدي ۇلى «ەلباسى تاپسىرماسىن جوعارى دەڭگەيدە ورىندادىق» دەپ كىمدەردى مەڭزەپ تۇر؟! بۇل بىرەۋدىڭ ەڭبەگىن پايدالانۋ ەمەس پە؟ ەگەر ءقازىر بۇكىل كەلىسسوز بارىسىنىڭ قالاي جۇرگەنىن حات-حابارىمەن بىرگە جاريا ەتىپ جىبەرسەم، ول جەردە ءاتى-جونى بىردە-بىر رەت اتالماعان مينيسترگە ۇيات بولماي ما؟ نەمەسە، «مەن ەدىم» دەپ جۇرگەن باسقا دا ازاماتتار كىممەن جانە قالاي كەلىسسوز جۇرگىزگەنىن، ونىڭ قانشا كەزەڭنەن تۇرعانىن كورسەتىپ بەرە الا ما ەكەن؟ ءيا، ارىستانبەك مىرزا «دايديداۋدى» ۇلت اسپاپتار ءانسامبلىنىڭ سۇيەمەلدەۋىمەن ورىنداۋعا جاردەم جاساپ جاتىر ەكەن. ونى ەشكىم جوققا شىعارمايدى. ءبىراق، ورتا جولدان قوسىلىپ، ءوزىن العا شىعارۋىنا بۇل ازدىق ەتپەي مە؟

جالپى، بۇل جاعداي توڭىرەگىندە ايتىلىپ جاتقان كوپ نارسەنى كورسەم دە كورمەگەندەي، ەستىسەم دە ەستىمەگەندەي كۇي تانىتىپ ءجۇرمىن... سەبەبى، بۇل بىزگە (قازاققا) ابىروي اكەلمەيدى. جازا بەرسە ماعان توم-توم كىتاپ جازۋعا دا بولار، بالكىم... ءبىراق حالىققا قاجەتسىز، تەك قازاقتاردىڭ اراسىنا بۇلىك تۋدىراتىن دۇنيەنى ايتقىزۋعا، جازعىزۋعا مەنى ەشكىم ماجبۇرلەمەسە ەكەن دەيمىن!" دەپ جازدى جۋرناليست ەرتاي ءنۇسىپجانوۆ.