ۇنسىزدىك... ۇزاق ۋاقىتقا سوزىلعان تىنىشتىقتى كولىكتىڭ رۋلىندە وتىرعان اعايدىڭ تەرەڭ جاساعان كۇرسىنىسى بۇزىپ جىبەردى. شىركىن، ادام ءومىر باقي تەرەڭ ويدىڭ تەڭىزىنە باتىپ جۇرەدى. ادامدى نە تولعاندىرمايدى دەڭىزشى!؟   

    ...ءومىرىنىڭ بار ءمانى بولعان، كوزايىمى جالعىز قىزى ومىرگە كەلگەلى  اكەنىڭ قۋانىشىندا شەك جوق ەدى. ايەلىنىڭ استى-ۇستىنە ءتۇسىپ، بار جاعدايىن جاساپ، كوزىنىڭ قاراسىنداي بولعان قۇلىنشاعىن بارىنشا ماپەلەدى. قىزىنىڭ ەسىمىن – ايشا دەپ قويدى . ءسابيىنىڭ جۇپار ءيسى اكەنىڭ شىنايى باقىتتى سەزىنۋىنە سەبەپ بولعانداي. ءاربىر جاساعان قادامىن سۇيسىنە تاماشالاپ، تۇساۋىن كەسكىزىپ، ەل قاتارلى بولسىن دەپ مەكتەپكە دە بەردى. قىزى قاراسا كوز تامسانارلىقتاي سۇيكىمدى ەدى . قوس بۇرىمى جەلپىلدەپ، كوزىنەن ۇشقىن جارقىلداپ، مەكتەپتىڭ تابالدىرىعىن اتتادى. كۇندە كەشكىسىن ، اكەسىنە ءوزىنىڭ ۇيرەنگەندەرىن ايتىپ بەرىپ، اكەسىنە شەكسىز ماحابباتىن كورسەتەتىن. قۇشاعىنا اسىلىپ، ەركەلەپ، ءوزىنىڭ بار قالاۋىن ىستەتەتىن. وسىلاي ۋاقىت جىلجىپ ءوتىپ جاتتى. اكەنىڭ بار ارمانى قىزىنىڭ وقۋىن جاقسى ءبىتىرىپ، بەدەلدى وقۋ ورنىنا ءتۇسىپ، مىقتى ازامات بولۋى ەدى.

امال قانشا؟ ايشا وسكەن سايىن اكەسىنەن الىستاي باستادى. ءوزى ءوسىپ، ءوزى وقىپ-توقىپ جەتىلگەن ادامدايىن، اكەسىنە ءبىراز بولسىن قارسى شىعا باستادى.           9-سىنىپقا كوشكەن كەزدە، اتا-اناسىنىڭ ءسوزىن تىڭداماستان  وقۋعا تۇسەمىن دەپ شەشىم قابىلدادى. ەركە وسكەن ەركە قىزدىڭ ارمانىنا قيانات جاساماۋ ءۇشىن ، اكە كوڭىل ەش قارسىلىق بىلدىرە المادى. ال ، ايشا بولسا ارتىنا بۇرىلماستان الىپ شاھار استاناعا كەتە باردى.

الماتىنىڭ تازا اۋاسى، بيىكتىككە بوي تۇزەگەن اسقار تاۋلارى جاس قىزدى قيماي تۇرعانداي سول كۇنى جاڭبىر ەش تولاستاماپ ەدى.  مۇمكىن، اتا-اناسىنىڭ جان دۇنيەسىندەگى وسى ءبىر قينالىس سەزىمدى كورسەتكەندەي. ارۋ الماتىدا ءۇنسىز سىر شەرتىپ  تۇردى.

   ارمانىنا الىپ-ۇشىپ كەتكەن جاس قىزدىڭ الدىندا نە كۇتىپ تۇرعانى بەيمالىم. ءومىر ونى سىناققا ءتۇسىرىپ، ءسۇرىندىرىپ، جىلاتىپ جانە قۋانتا دا الاتىنىن بىلگەن ەدى.  ستۋدەنتتىك شاقتاردىڭ العاشقى كۇندەرىنەن باستاپ، وزىنە جاقىن دوس تاۋىپ ۇلگەردى. جاقىنىنداي كورىپ،  قاتتى باۋىر باسىپ  قالدى.  كۇنى بويى دوسىمەن قىدىرىپ، ەستەن كەتپەس باقىتتى ساتتەرىن وتكىزىپ جاتتى. الايدا،  ءوزىنىڭ نە ءۇشىن وسى الىپ شاھاردا جۇرگەنىن ۇمىتىپ كەتكەندەي. اتا-اناسىنا سيرەك حابارلاساتىن بولدى. وقۋىنداعى جاعدايى دا ءماز ەمەس  ەدى...

      اياق استىنان سوعىلعان قوڭىراۋ ءۇنى اكە جۇرەگىنە ءبىر جامان حاباردىڭ بولعانىن جەتكىزگەندەي. بۇرىن سوڭدى بۇلاي الاڭداپ، مازاسىز كۇي كەشە بەرمەيتىن. تەلەفون تۇتقاسىن الۋعا باتىلى جەتپەدى.  الايدا، ۇزدىكسىز سوعىلىپ قويماعان سوڭ، جاۋاپ بەردى. تەلەفوننىڭ ار جاعىنداعى داۋىس ءبىر سالقىندىقتى سەزدىرگەندەي.   بۇل ايشانىڭ جەتەكشىسى داستان اعاي  بولاتىن. قىزىنىڭ وقۋدا ەكى اپتاداي بولماعانىن حابارلاپ، وسىلاي جالعاسا بەرسە، وقۋدان شىعاراتىنى جايلى حابارلادى.

توبەسىنەن جاي تۇسكەندەي بولعان اكەنىڭ كوڭىلىن مازاسىزدىق  باسىپ، ساناسىنا نەشە ءتۇرلى ويلار كەلە باستادى. ىلە-شالا قىزىنا قوڭىراۋ شالدى. دەرەۋ ، الماتىعا شاقىرتتى. ەرتەڭىندە قىزى ارتىنىپ-تارتىنىپ  ۇيىنە كەلدى. اتا-اناسىنىڭ كوزىنە تىكە قاراۋعا ۇيالعان قىز ەرىكسىز جىلاپ قويا بەردى. قىز بايعۇستىڭ جاساعان اعات قادامى بۇكىل ءومىرىنىڭ استان-كەستەڭىن شىعارعانداي. الداعى ۋاقىتتا نە بولاتىنى الىدە جۇمباق؟

  قۇم ساعاتتاي سىرعىعان ۋاقىتتى ەشكىمدە باعىندىرا الماسى انىق. بۇل ايشانىڭ دا قولىنان كەلمەدى. وتكەنگە وكىنىشى كوپ بولسا دا، امالسىز باسىنا تۇسكەن قيىندىققا مويىنۇسىندى. بۇل جولى شەشىمدى اتا-اناسى قابىلدادى. قىزىن الماتىعا قالدىرىپ، وسىندا اقىلى تۇردە جوعارى وقۋ ورنىنا ءتۇسىردى.

     وتكەن كۇندەردىڭ پاراعىنان قالعان قارا داقتاردىڭ بەلگىسى ،مۇمكىن، ايشانىڭ سوڭىنان ىلعيدا ەرىپ جۇرەر. ءبىراق، ەندىگى جاسايتىن قادامدارىنىڭ ءوزى بولاشاقتا كوپ نارسەنى وزگەرتە الاتىنى اقيقات. اتا-اناسىنىڭ  قايسارلىعى، تاباندىلىعى ارقاسىندا قىزىنىڭ ءومىرى قۇردىمعا كەتپەي قايتادان قۇلاشىن جايعانداي.

ەڭ وكىنىشتىسى، بىردەن بارلىعى بۇرىنعىداي بولا قويمادى. اكەسى مەن قىزىنىڭ  اراسىندا ءبىر سالقىندىق پايدا بولعانداي...

تىلەگەن كوگەرشىن