مۇحتار ءابليازوۆ پەن ونىڭ  قازاقستانداعى سىبايلاستارىنا قاتىستى سوتالدى تەرگەۋ اياقتالدى، - دەپ حابارلايدى Qamshy.kz پورتالى Tengrinews.kz جاڭالىقتار قىزمەتىنە سىلتەمە جاساپ.

 "الدىن الا تەرگەۋ جان-جاقتى، تولىق ءارى ءادىل ءوتتى، دالەلدەۋگە جاتاتىن بارلىق جاعداي انىقتالدى"، - دەلىنگەن حابارلامادا.

سونىمەن قاتار، جينالعان دالەلدەردىڭ نەگىزىندە بتا بانكتىڭ بۇرىنعى توپ-مەنەدجەرى مۇحتار ءابليازوۆتىڭ قىلمىستىق ارەكەتىنە باعا بەرىلگەنى جانە ونىڭ قازىرگى ۋاقىتتا قازاقستان اۋماعىندا ەمەس ەكەنى ءارى شاقىرتۋدان جالتارعانى ايتىلادى. سونىمەن قاتار، ج.جارىمبەتوۆ (باسقارما ءتوراعاسىنىڭ ءبىرىنشى ورىنباسارى - كرەديت كوميتەتىنىڭ ءتوراعاسى) پەن ك.سادىقوۆتىڭ (كرەديتتەۋ جونىندەگى ديرەكتور)، س.مامەشتىڭ (باسقارما ءتوراعاسى) ارەكەتىنە دە باعا بەرىلگەن. 

 ءابليازوۆقا قىلمىستىق توپ قۇرىپ، وعان باسشىلىق ەتتى، بتا بانكىنىڭ قاراجاتىن جىمقىردى جانە جەكەشەلەندىردى، بانك قاراجاتىن زاڭسىز قولداندى جانە قىزمەتتىك وكىلىن اسىرا پايدالاندى دەگەن كۇدىك كەلىپ وتىر.

جالپى شىعىن سوماسى - 7،5 ميلليارد اقش دوللارى.

"تەرگەۋدەن جىمقىرىلعان قاراجاتتىڭ حالىقتىڭ زەينەتاقى جيناعى ەكەنى، قازاقستان ازاماتتارىنىڭ جەكە جيناعى ەكەنى جانە شەتەلدىك قارجى ينستيتۋتتارىنىڭ قارىزى ەكەنى ناقتىلى انىقتالدى"، - دەلىنگەن ۇلتتىق بيۋرونىڭ حابارلاماسىندا.

سونىمەن بىرگە، حابارلامادا بتا بانكىنىڭ قارىزىن وتەۋ بويىنشا مىندەتتى مەملەكەتتىڭ ءوز موينىنا العانى ايتىلعان.

ەسكە سالا كەتەيىك، 2017 جىلدىڭ 2 اقپانىندا ق ر سىبايلاس جەمقورلىققا قارسى ءىس-قيمىل ۇلتتىق بيۋروسى جاۋاپ الۋ ءۇشىن مۇحتار ءابليازوۆتى استاناعا شاقىرعان بولاتىن. "ق ر سىبايلاس جەمقورلىققا قارسى ءىس-قيمىل ۇلتتىق بيۋروسى "بتا بانك" اق بۇرىنعى توپ-مەنەدجمەنتى م.ق.ءابليازوۆقا، ج.د.جارىمبەتوۆكە جانە وزگەلەرگە قاتىستى قىلمىستىق ءىستىڭ سوتالدى تەرگەۋىن جالعاستىرىپ جاتىر. تەرگەۋ بارىسىندا انتيكوررۋپسيا قىزمەتى ءابليازوۆ پەن ونىڭ سىبايلاستارىنىڭ زاڭسىز ارەكەتتەرىنىڭ قوسىمشا دالەلدەرىن تاپتى. بانكتەن قاراجاتتى جىمقىرۋدىڭ جاڭا نۇسقالارى اشىلدى. انىقتالعان دەرەكتەر ءابليازوۆتىڭ قىلمىستىق ۇيىم قۇرىپ، وعان باسشىلىق ەتكەن دەگەن قوسىمشا كۇدىك كەلىپ وتىر. ونىڭ ىشىندە ءبىرقاتار ۇيىمداسقان قىلمىستىق توپ كىرەدى، توپ قازاقستان تەرريتورياسىندا دا، شەتەلدە دە ارەكەت ەتكەن"، - دەلىنگەن ەدى ۆەدومستۆو حابارلاماسىندا.