مەن مەكتەپتە وقىپ جۇرگەن كەزدە، مەكتەپتى wi-fi جەلىسىمەن تولىقتاي قامتىعان ەدى. ءبىراق، ءبىز ونىڭ پايداسىنان گورى، زيانىن كوپ كوردىك دەسەك تە بولادى. نەلىكتەن؟ سەبەبى، شەكسىز ينتەرنەت الەمىنە سىيلاعان مۇمكىندىكتەن سوڭ وقۋشىنىڭ بوس ۋاقىتى بولسىن نەمەسە بولماسىن ول وزىنە ءتيىمدى ەمەس، بوسقا ۋاقىت ولتىرەتىن ىسپەن اينالىسۋعا ىنتىعىپ تۇراتىن. ساباق ۋاقىتىندا نەمەسە ۇزىلىستە بولسىن دوستارىم ءتۇرلى تەلەحيكايالار قاراپ، ءارتۇرلى ويىندار ويناپ وتىراتىن. كوپكە توپىراق شاشۋدان اۋلاقپىن.ارينە، بارلىق وقۋشى بولماسا دا، ءبىر قارىن مايدى شىرىتەتىن قۇمالاقتاردىڭ كەسىرىنەن سول WI-FI جەلىسىن 1-2 اي وتكەن سوڭ ءۇزىپ تاستاعان بولاتىن. ونىڭ سەبەبى، پايدالانۋ كورسەتكىشى بەلگىلەنگەن مەجەدەن اسىپ، تىم كوپ بولىپ كەتكەنى جايلى ەستىدىم. وعان بولىنگەن قارجىنىڭ شەگىنەن شىعىپ كەتكەن ەكەن. ءبىر تۇسىنبەگەن نارسەم نەلىكتەن مەكتەپتە وسىنداي ەركىن، وقۋشىنىڭ نازارىن باسقا ىسكە اۋدارۋعا مۇمكىندىك بەرەدى نەمەسە قاتاڭ باقىلاۋعا الا وتىرىپ، كەرەك ەمەس دۇنيەلەرگە پايدالانۋدىڭ جولدارىن نەگە قاراستىرمايدى ەكەن؟
ارينە، بۇل جاسالىپ جاتقان يگى ىستەردىڭ بارلىعى دەرلىك ءبىزدىڭ سانالى ءھام ساپالى ءبىلىم الۋىمىز ءۇشىن. ونى ءبىرى جەتە تۇسىنسە دە ،ەكىنشى ءبىر وقۋشى وسى مۇمكىندىكتى ءتيىمدى پايدالانۋدى دۇرىس اڭعارماي جاتادى. ەش بوگەتسىز تەگىن ىستەپ جاتقان ينتەرنەت جەلىسى اسپاننان توگىلىپ جاتقان جوق عوي. ول دا مەملەكەت قارجىسىنان ءبولىنىپ، جاستاردىڭ كەمەلى ءبىلىم الۋى ءۇشىن جاسالىپ جاتقان يگى ىستەردىڭ ءبىرى. وسىنىڭ ۇعىناتىن وقۋشىلار قاتارى كوپ بولسا، ءبىزدىڭ ەلىمىزدىڭ ءبىلىم جۇيەسىندەگى وزگەرىستەردىڭ كوبى دەرلىك وڭعا باسىپ، تەزىرەك العا جىلجۋشى ەدى. سەبەبى، ۇلكەن ىستەردىڭ سوڭىندا وسىنداي بايقاۋسىز ۇساق دۇنيەلەر تۇرادى. ال سول ۇساق دۇنيەنىڭ ءوزى ۇلكەن كۇشكە يە بولا الاتىنى تاعى بار.
ورناتىلعان تەگىن WI-FI قىزمەتىنىڭ وقۋشى مەن مۇعالىمدەر قاۋىمىنىڭ قولىن ۇزارتىپ، كوپتەگەن مۇمكىندىكتەرى سىيلايتىنى جانە ىسكە اسىرىلىپ جاتقان جاڭا جوبالاردىڭ قارقىندى دامۋى ءۇشىن دەگەن ماقساتپەن جوعارى قارقىندا كەڭ ەتەك الىپ ۇلگەرگەنىنە كۇا بولامىز. وقۋشىلاردىڭ الەۋمەتتىك جەلىگە نەمەسە سەريالدار كورۋىنە بەلگىلى ءبىر دەڭگەيدە شەكتەۋ قويعانى دا انىق. الايدا قازىرگى العىر شاكىرتتىڭ قانداي جولمەن بولسىن ، ءوز قالاۋىن جاساپ الاتىنى اقيقات. ياعني، قويىلعان شەكتەۋ، ولار ءۇشىن اسا قاتتى بوگەت بولا الماۋدا.
مۇمكىن، الداعى ۋاقىتتا يگى باستامانىڭ شىنايى پايداسىن جەتە تۇسىنەتىن وقۋشى قاتارى ارتىپ، بوسقا شىعىنداۋدىڭ قاجەتى بولماسىن اڭعاراتىن شاكىرتتەر جيىلەر. ءبارى دە ۋاقىت ەنشىسىندە. ەڭ باستىسى، ەل بولاشاعىن ۇستار العىر شاكىرت وزىنە سىيلانىپ جاتقان شەكسىز مۇمكىندىك پەن ناعىز باقىتتىڭ ءقادىرىن تۇسىنسە ەكەن...
ءبىزدىڭ الدىڭعى تولقىن اعا-اپايلارىمىزدا ونداي مۇمكىندىك مۇلدە بولماعان ەدى. ولار مەكتەپكە جاڭا كىتاپتار كەلسە قۋانىپ، شىنايى باقىتتى سول دەپ تۇسىنەتىن ەدى عوي. بار ۋاقىتىن كىتاپحانادا، ىزدەنىستە وتكىزىپ، مەكتەپتەگى ءبىر كومپيۋتەردىڭ بارىن مىسە تۇتاتىن.
تىلەگەن كوگەرشىن
