اقش-تا 3 جىل وقىعان قىزىلجارلىق قايىرجان ايسين شەتەلدە العان ءبىلىمى مەن تاجىريبەسىن قازاقستاندا ۇتىمدى پايدالانىپ ءجۇر. جاس كاسىپكەر كۇنىنە 15 توننا تۇرمىستىق قالدىق ىرىكتەيدى. بۇل ءىسى ارقىلى ءبىر جاعىنان پايدا تاپسا، ەكىنشى جاعىنان ەكولوگيا تازالىعىنا ۇلەسىن قوسىپ ءجۇر دەپ حابارلايدى baq.kz.

پەتروپاۆل تۇرعىندارى كۇنىنە ورتا ەسەپپەن 150 توننا قوقىس شىعارادى ەكەن. سول تۇرمىستىق قالدىقتىڭ 75 پايىزىن كادەگە جاراتۋعا بولادى.

«2012 جىلى پەتروپاۆلدا ماكۋلاتۋرا قابىلدايتىن كاسىپورىن جۇمىسىن باستاعان بولاتىنمىن. وڭاي بولدى دەي المايمىن. دەگەنمەن، ءىسىم بىرتىندەپ العا باستى. «بيزنەستىڭ جول كارتاسى» مەملەكەتتىك باعدارلاماسى بويىنشا 20 ملن. تەڭگە نەسيە الدىم. ول قاراجاتقا قوقىستى ىرىكتەۋگە ارنالعان قوندىرعىلار ساتىپ الدىم. قالاداعى قوقىس جاشىكتەرىنىڭ جانىنا پلاستيك بوتەلكەلەردى بولەك جيناۋعا ارنالعان جاشىكتەر قويدىق»، – دەيدى «ۆتورسىرە» ج ش س ديرەكتورى قايىرجان ايسين.

باستاپقىدا قوقىستى ءبولىپ لاقتىرۋ پەتروپاۆلدىقتارعا جات كورىنگەنىمەن، تۇرعىندار وعان دا ۇيرەنىسىپ كەتتى. ءقازىر ءتىپتى ادەتكە اينالدى دەۋگە بولادى. «ۆتورسىرە» ج ش س ازىرگە قاعاز، پلاستيك پەن شىنىنى ىرىكتەيدى. تۇرمىستىق قالدىقتاردى قايتا وڭدەۋمەن اينالىساتىن كاسىپورىندارمەن تىعىز بايلانىس ورناتقان. پەتروپاۆلدا سۇرىپتالعان قوقىستىڭ ءبىر بولىگى الماتىعا جول تارتسا، ەندى ءبىر بولىگى كورشىلەس رەسەيگە جونەلتىلەدى.

جۋىردا «ۆتورسىرە» سەرىكتەستىگى سولتۇستىك قازاقستان وبلىستىق تابيعات قورلارى جانە تابيعاتتى پايدالانۋدى رەتتەۋ باسقارماسىمەن بىرلەسىپ، «ماكۋلاتۋرا تاپسىر دا، اعاشتاردى ساقتاپ قال!» اتتى اكسيا جاريالادى. شارانىڭ العاشقى كۇنىنەن-اق وقۋشىلار بەلسەندىلىك كورسەتتى.

«ءبىز اتالعان اكسياعا وتكەن جىلى دا قاتىسقانبىز. سودان بەرى جيناپ جۇرگەن ءبىراز قاعاز قورى بار. ۇيدە 3 وقۋشىمىز. قاعاز جەتەرلىك. بارلىق سىنىپتاستارىممەن بىرگە مەن دە بۇگىن ءبىر قۇشاق قاعاز اكەلىپ تاپسىردىم»، – دەيدى پەتروپاۆل قالالىق ءبىرىنشى گيمنازيا وقۋشىسى اناستاسيا كوروچەنكو.

اكسيانى بيىلعى وقۋ جىلىنىڭ سوڭىندا قورىتىندىلاۋ جوسپارلانىپ وتىر. وتكەن جىلى پەتروپاۆلدىق وقۋشىلار 35 توننا ماكۋلاتۋرا تاپسىرعان بولاتىن.

«بارلىق مەكتەپتەرگە ماكۋلاتۋرا سالۋعا ارنالعان جاشىكتەر قويىلادى. وسىلايشا ءبىز تابيعاتقا كەلەتىن زياندى ازايتامىز، وقۋشىلاردى مادەنيەتكە ۇيرەتەمىز جانە الەۋمەتتىك جاعدايى تومەن جاندارعا قول ۇشىن بەرەمىز»، – دەيدى سولتۇستىك قازاقستان وبلىسى تابيعات قورلارى جانە تابيعاتتى پايدالانۋدى رەتتەۋ باسقارماسىنىڭ باس مامانى جانار باشەنوۆا.

ستاتيستيكاعا سۇيەنسەك، 1 توننا قاعاز 5 اعاشتى كەسۋدەن ساقتاپ قالادى ەكەن. قاعازدى 6 رەتكە دەيىن قايتا وڭدەپ، تۇرمىستا پايدالانۋعا بولادى.