2017 جىلعى 27 ناۋرىزدا قازاقستان رەسپۋبليكاسىنىڭ مەملەكەتتىك حاتشىسى گۇلشارا ءابدىقالىقوۆا بۇكىلالەمدىك تەاتر كۇنىنە وراي تۇڭعىش رەت تاعايىندالعان «ساحناگەر - 2017» ۇلتتىق تەاتر سىيلىعىمەن ماراپاتتاۋ سالتاناتىنا قاتىستى دەپ حابارلايدى qamshy.kz.

سونداي-اق، وعان پارلامەنت دەپۋتاتتارى، مادەنيەت جانە سپورت ءمينيسترى ا.مۇحامەدي ۇلى، ەلىمىزدىڭ تانىمال مادەنيەت جانە ونەر قايراتكەرلەرى قاتىستى.

مەملەكەتتىك حاتشى گ.ن.ءابدىقالىقوۆا قۇتتىقتاۋ سوزىندە ەلباسى ن.ءا.نازاربايەۆ ەل دامۋىندا مادەنيەت پەن ونەردىڭ ماڭىزدى رولىنە اسا ءمان بەرەتىنىن اتاپ ءوتتى. تاۋەلسىزدىك جىلدارىندا «مادەني مۇرا» مەملەكەتتىك باعدارلاماسى ىسكە اسىرىلىپ، 52 تەاتر تابىستى جۇمىس ىستەۋدە، «استانا وپەرا»، «استانا بالەت» تەاترلارى، قازاق ۇلتتىق ونەر ۋنيۆەرسيتەتى، قازاق ۇلتتىق حورەوگرافيا اكادەمياسى بوي كوتەردى.

گۇلشارا ءابدىقالىقوۆا، سونداي-اق 2016 جىلى قۇرىلعان قازاقستان تەاترلارى قاۋىمداستىعىنىڭ ەلىمىزدىڭ رۋحاني-مادەني ءومىرىنىڭ دامۋىنا ماڭىزدى ۇلەس قوساتىنىنا، جاستاردىڭ شىعارماشىلىق الەۋەتىن دامىتۋعا، مەملەكەت باسشىسىنىڭ ەلىمىزدىڭ ءۇشىنشى جاڭعىرۋىندا بەلگىلەپ بەرگەن ماقساتتارىن ىسكە اسىراتىنىنا سەنىم ءبىلدىردى.

«ساحناگەر» ۇلتتىق تەاتر سىيلىعى ەڭبەككە دەگەن وڭ كوزقاراستى قالىپتاستىراتىن شىعارمالاردى جاساۋعا، ەلدىڭ ءبىرتۇتاس مادەني كەڭىستىگىن نىعايتۋعا، قازاقستاندىق پاتريوتيزم مەن ۇلتتىق مادەنيەتكە دەگەن سۇيىسپەنشىلىكتى دامىتۋعا باعىتتالعان.