بالاسىنىڭ دەنەسىندەگى كوگەرگەن ىزدەردى اڭعارعان گۇلزيرا الپاتتينا بۇدان سوڭ پوليسياعا ارىزدانىپ، ارنايى ساراپتاما جاساتقان.

پاۆلوداردا كوك الا قويداي بولىپ ۇيىنە ورالعان ءبۇلدىرشىن ەندى № 16 بالاباقشاعا بارۋدان باس تارتىپ وتىر، دەپ حابارلايدى pavlodarnews.kz.

ءبۇلدىرشىننىڭ اناسى 42 جاستاعى گۇلزيرا الپاتتينا قاڭتار ايىنىڭ سوڭىندا بولعان وقيعادان ەندى عانا ەسىن جيعانىن ايتادى. دەگەنمەن بالاباقشاداعى جانجالدان ۇلى ميراس پەن قىزى ايگەرىم شوشىپ قالعان.

- قىزىم بەستە، ۇلىم ءتورت جاستا. سوندىقتان ەكەۋى ءبىر توپقا بارادى. 24-قاڭتار كۇنى ۇلىم توپتا تەكشە ءپىشىندى ويىنشىقپەن ويناپ ءجۇرىپ، ونى ابايسىزدا ايسۇلتان دەگەن بالانىڭ باسىنا تيگىزىپ العان. ناتيجەسىندە بالانىڭ باسى كىشكەنە قىزارىپ قالعاند سوڭ، تاربيەشى اناسىنا حابارلاعان. ايسۇلتاننىڭ اناسى بىردەن بالاباقشاعا جەتىپ، بالامدى ساباعان. وعان ۇلىمنىڭ دەنەسىندەگى مىنا ىزدەر دالەل. سونداي-اق، مۇنى سول كەزدە توپتا بولعان قىزىم دا راستاپ وتىر، - دەيدى گۇلزيرا الپاتتينا.

بالاسىنىڭ دەنەسىندەگى كوگەرگەن ىزدەردى اڭعارعان گۇلزيرا الپاتتينا بۇدان سوڭ پوليسياعا ارىزدانىپ، ارنايى ساراپتاما جاساتقان. ناتيجەسىندە ق ر قك-نىڭ 108-بابى «دەنساۋلىققا قاساقانا جەڭىل زيان كەلتiرۋ» بويىنشا ءىس قوزعالعان.

- بالامنىڭ باسىنا اعاشتان جاسالعان تەكشە ويىنشىقتى لاقتىرعان. مەن كەلگەندە بالاباقشاداعى مەدبيكەدەن شىققان ەكەن. ماڭدايى قاتتى سوعىلىپتى. بالام جىلاپ وتىردى. وعان ويىنشىق لاقتىرعان ەر بالا توپقا جاڭادان اۋىسقانىن ەستىپ ءبىلدىم. تاربيەشىگە ەسكەرتۋ جاساعانىم بولماسا، ەشكىمگە دە تيىسكەنىم جوق، - دەيدى جاننا بايمۋلدينوۆا.

ونىڭ ءسوزىن توپتا بولعان تاربيەشى مەرۋەرت تولەۋبەكوۆا دا راستاپ وتىر.

- ميراس پەن ايگەرىم ءبىر ءۇيدىڭ بالالارى، ءبىراق ەكى ءتۇرلى. ميراس جۇگىرىپ سەكىرىپ ويناعاندى ۇناتادى. توپتا ەكى كۇن عانا بولسا دا، ءبىراز ابىگەرگە سالدى. ەسىكتى تەۋىپ، اياعىن سوعىپ الدى. ءبىراق ويىنشىقتى قاساقانا لاقتىرعان جوق. دەسە دە، ايسۇلتاننىڭ باسىنا ءتيىپ كەتتى. ەشكىم-ەشكىمدى ۇرعان جوق. اتا-انالارعا ءبارىن تۇسىندىرگەن ەدىك. الايدا وقيعانىڭ ارتى ۇرىسقا اينالىپ، ماسەلە ۋشىعىپ كەتتى، - دەيدى تاربيەشى.

№ 16 بالاباقشانىڭ ديرەكتورى انار تولەبەكوۆا بۇل وقيعا ەكى اپتالىق وقۋعا كەتكەن كەزىندە ورىن العانىن ايتادى. بۇعان دەيىن ءبىر ءۇيدىڭ ۇل-قىزى «ەرەسەك ب» توبىنان «ەرەسەك ا» توبىنا اۋىستىرىلعان. ايتا كەتەرلىگى، بالاسىنىڭ سابالعانىنا اشۋلى اتا-انا ءىستى سوڭىنا دەيىن جەتكىزبەي قويمايتىنىن ايتىپ، مورالدىق شىعىن ءوندىرىپ الۋعا بەكىنىپ وتىر. بۇل ىسكە قاتىستى سوت وتىرىسى ناۋرىز ايىنىڭ 31ء-ى كۇنى № 2 قالالىق سوتىندا وتەدى دەپ كۇتىلۋدە. ال، باسىنا ويىنشىق ءتيىپ كەتكەن ايسۇلتان ەسىمدى بالعىن بالاباقشاعا بارىپ ءجۇر.

ايگەرىم جانكاشوۆا

سۋرەتتەردى ۇسىنعان - گۇلزيرا الپاتتينا