بيزنەسمەن ءاليدار وتەمۇراتوۆ جانە DAR IT-كومپانياسى وتاندىق جانە شەتەلدىك فيلم مەن مۋزىكانىڭ كەڭ قورىنا قول جەتكىزۋگە مۇمكىندىك بەرەتىن تۇڭعىش قازاقستاندىق ستريمينگتىك سەرۆيستى جۇرتشىلىققا تانىستىردى دەپ حابارلايدى قامشى اقپاراتتىق اگەنتتىگى.
وتاندىق شوۋ-بيزنەس وكىلدەرىنە، مۋزىكا جانە كينويندۋستريا قايراتكەرلەرىنە، ب ا ق وكىلدەرىنە ارناپ ۇيىمداستىرىلعان تانىستىرىلىمدا كەلەسى تۇلعالار ءسوز سويلەدى:
- ءاليدار وتەمۇراتوۆ، DAR كومپانياسىنىڭ نەگىزىن سالۋشىسى جانە باسشىسى؛
- ناسىر جۇمالييەۆ، DAR Play جوباسىنىڭ باسشىسى؛
- احات ىبرايەۆ، رەجيسسور، قازاقستان كينەماتوگرافشىلار وداعىنىڭ ءتوراعاسى؛
- باۋىرجان شۇكەنوۆ، «ارمان» كينوجەلىلەر ديرەكتورى جانە باتىرحان شۇكەنوۆ شىعارماشىلىعىنىڭ قۇقىق يەسى.
«ءبىزدىڭ ماقساتىمىز – تەحنولوگيالار كومەگىمەن ساپالى كونتەنتتى تۇتىنۋ مادەنيەتىن دامىتۋ، قازاقستاننىڭ بارلىق ازاماتتارىنا كينو جانە مۋزىكا تۋىندىلارىنا قول جەتكىزۋگە مۇمكىندىك بەرۋ، – دەپ ءتۇسىندىردى ءاليدار وتەمۇراتوۆ. – سونداي-اق، ءبىز قۇقىق يەلەرىنە ءوز شىعارماشىلىعىنان قارجى تابۋعا، ال تۇتىنۋشىلارعا ەڭ جاقسى ساپادا مۋزىكا تىڭداپ، فيلمدەردى ىڭعايلى ءارى وڭاي جولمەن كورۋگە مۇمكىندىك بەرىپ وتىرمىز».
وتاندىق ينتەرنەتتىڭ ەڭ كوكەيتەستى ماسەلەلەرىنىڭ ءبىرى – جەرگىلىكتى زاڭدى مۋزىكالىق جانە بەينەكونتەنتتىڭ جوقتىعىندا. ءقازىر وتاندىق مۋزىكا مەن كينو عالامتوردا تەك قاراقشىلىق رەسۋرستاردا عانا تاراتىلادى. ال DAR Play سەرۆيسى وسى ماسەلەنى شەشۋدى كوزدەپ وتىر.
«وسى ىسكە قاتىساتىنداردىڭ بارلىعى بۇدان ۇتادى. مۋزىكا ورىنداۋشىلار كوبىرەك ۋاقىتىن شىعارماشىلىق پەن جاڭا اندەردى جازۋعا ارنايتىن بولسا، كينو وندىرۋشىلەر ءوز فيلمدەرىن شىعارۋعا كوبىرەك قارجى بولۋگە مۇمكىندىك الادى، ويتكەنى كينوتەاترلارداعى پروكات اياقتالعان سوڭ دا بۇل ونىمدەر ولارعا تابىس اكەلەتىن بولادى. تىڭدارماندار مەن كورەرمەندەر بولسا، ساپالى كونتەنتتىڭ ەڭ كەڭ قورىنا قول جەتكىزەدى»، - دەپ اتاپ ءوتتى وتەمۇراتوۆ مىرزا.
DAR Play سەرۆيسى اياسىنداعى جۇمىس 2016 جىلدىڭ سوڭىندا باستالعان بولاتىن. قۇيىلعان ينۆەستيسيالار كولەمى 900 ملن. تەڭگەدەن استام.
قازىرگى تاڭدا DAR Play قولدانۋشىلارىندا 19 مىڭنان اسا تولىق مەتراجدى فيلم، مۋلتفيلم مەن سەريالدى تاماشالاپ، سونداي-اق، بۇكىل الەمدەگى 100 مىڭ ورىنداۋشىنىڭ 2،2 ملن. ءانىن تىڭداۋعا مۇمكىندىگى بار. جىل سوڭىنا قاراي DAR Play قورى 3 ملن. ترەك جانە 45 مىڭ كينوفيلمگە دەيىن تولىقپاق.
