ومسك قالاسىنىڭ تۇرعىنى انتون كۋدرياۆسيەۆ جايلى الەۋمەتتىك جەلى كوپ ايتتى. ول 9 بالا ءوسىرىپ وتىرعان ارداقتى اكە، شاڭىراقتىڭ وتاعاسى. بالالارىنىڭ 5-ەۋى وزىنىكى بولسا، 4-ەۋىن اسىراپ العان. ونىڭ ءومىرى ماحابباتقا تولى. «باتىر» اتاعىنا لايىقتى ەر ازامات ومىرىندە كوپ ازاپ شەكتى. بىرىنشىدەن، قاتەرلى ىسىكتەن سۇيگەن جارى قازا تاپتى. بۇل قازا انتون ءۇشىن اۋىر سوققى بولدى. الايدا، بالالارى ءۇشىن بەرىلمەۋى كەرەك ەدى. بۇگىنگى تاڭدا انتوننىڭ ومىرىندە ونىڭ بالالارىن شىن جاقسى كورىپ، قۇشاعىنا باسقان ايەل پايدا بولدى. ەندى شاڭىراقتارى قايتا شاتىققا كەنەلدى.

انتون اسكەردەن قايتىپ كەلگەندە ءوزىنىڭ سۇيگەن قىزى انيامەن وتاۋ قۇرادى. ءسويتىپ، التى بالانىڭ اتا-اناسى اتانادى. ونىڭ ۇشەۋى ۇل بولسا، ەندىگىسى ۇشەم قىزدار. ءبىراق باقىتتىڭ شىرقى ءبىر ساتتە بۇزىلادى. انيا قاتەرلى دەرتكە شالدىعادى. انتون ايەلىنىڭ ساۋىعۋى ءۇشىن قولىنان كەلگەنىنىڭ ءبارىن ىستەپ باقتى، الايدا، انيا كوز الدىندا سولا بەردى. ومىرگە دەگەن ءۇمىتى ءۇزىلدى. اقىرى، قازا تاپتى.

ايەلىنىڭ ولىمىنەن كەيىن انتون ۇزاق ۋاقىت وز-وزىنە كەلە الماي ءجۇردى. ءتىپتى،قىزدارىن ءوزىنىڭ اناسىنىڭ قولىنا تاستاپ، ۇلدارىمەن قالا سىرتىنداعى انيا ەكەۋى بىرگە تۇرعىزعان ۇيگە بارىپ تۇرادى. بالالارى ءۇشىن ءوزىنىڭ كاسىبىن ۋاقىتشا شەتكە ىسىرىپ قويادى. سەبەبى، جۇمىستان گورى سولارعا كەرەك ەكەنىن سەزىندى.

ەكىنشى رەت ۇيلەنۋ جايلى ويلاماعان دا ەدى. انتونعا جانە ونىڭ بالالارىنا قامقور بولعىسى كەلىپ، قول ۇشىن سوزعان ايەلدەر كوپ بولدى. ءبىراق، ايەلىنىڭ ورنىن ەشكىم باسا الماسىن ءبىلدى.

ۋاقىت سىرعىپ وتە بەردى. جالعىزباستى اكە ليۋدميلا ەسىمدى ايەلمەن تانىستى. العاشىندا، كوڭىلىنەن شىققانداي بولىپ، كەزدەسۋلەرگە شاقىرىپ ءجۇردى. ليۋدميلانى سىناماق بولىپ، العاشقى كەزدەسۋگە بالالارىن ەرتىپ بارعان. ءبارى ءوزى كۇتكەندەي بولدى. ليۋدميلا انتوننىڭ بالالارىمەن وڭاي ءتىل تابىسىپ كەتتى. كەزدەسىپ جۇرگەن ەكى جاس ۇيلەنۋگە بەل بايلايدى. ليۋدميلانىڭ ءبىرىنشى نەكەسىنەن بالاسى بولعان. ءسويتىپ، كوپبالالى انتوننىڭ وتباسى تاعى ءبىر بالاعا تولىقتى.

انتوندى كەزدەستىرمەي تۇرىپ، ليۋدميلا ەرەكشە ءتۇس كورگەنىن ايتادى. تۇسىندە ساياباقتا ءوزى تانىمايتىن جەتى بالامەن قىدىرىپ جۇرگەن ەكەن. وسى جاعدايدان سوڭ الەۋمەتتىك جەلىلەردىڭ بىرىنەن انتوندى بايقاپ قالادى. تانىسىپ، سويلەسەدى. ءتىپتى، العاش سويلەسكەن كۇننىڭ وزىندە انتوندى جۇرەگىنىڭ ءبىر بولشەگى ەكەنىن سەزەدى. العاشىندا، انتوندى التى بالاسىمەن قابىلداۋ قيىنعا سوعاتىنداي كورىندى، ءبىراق ءقازىر سول بالالارىنان نەمەرە ءسۇيۋدى ارمانداپ جۇرگەنىن ايتادى.

سوڭعى جىلدا كۋدرياۆسيەۆتەردىڭ وتباسىندا تاعى ءبىر تولىعۋ بولدى. ەرلى-زايىپتىلار جەتىم قالعان ەگىز بالالاردى اسىراپ الادى. وزدەرىنە كورشى ۇيدە تۇرعان سابيلەردىڭ اناسى تۋبەركۋلەز دەرتىنەن قازا تاپقان، ال اكەسى تۇرمەگە توعىتىلادى. ەندى ۇلكەن شاڭىراقتا توعىز بالا بولدى. انتون بالالارىنان ەشقانداي اۋىرتپالىقتى سەزىنبەيتىنىن ايتتى. كەرىسىنشە، ءارقايسىسىنا قاراعان سايىن اكە جۇرەگى جىگەرلەنە تۇسەدى.    

ليۋدميلا دا كوپبالالى انا رولىنە تەز ءسىڭىسىپ كەتەدى. 5 ءليرتلى قازانعا تاماق دايىنداپ، بىرنەشە توقاشتار ازىرلەۋگە ەشقاشان دا شارشاعان ەمەس. بالا تاربيەسىنە ءوزىن تولىعىمەن ارناي ءبىلدى. انتون جۇمىسىنا قايتىپ بارىپ، جەكە كاسىپپەن اينالىسىپ ءجۇر. ءتىپتى، كوپبالالى اتا-انا تاعى بالا ءسۇيۋدى قالايتىن كورىنەدى.

ءومىر ءوز اعىمىمەن جۇزە بەردى. ۇلكەن وتباسى بۇگىندە باقىتتى عۇمىر كەشۋدە.

دەرەككوز: Omsk.aif.ru

اۋدارعان: گۇلىم جاقان