شەت ەلدەردە «اۋليە ۆالەنتين» اتالىپ كەلگەن مەيرامنىڭ قازاقشا نۇسقاسى قوزى كورپەش – بايان سۇلۋ مەيرامىن تويلاۋ قانشالىقتى ماڭىزدى؟! قاشانعى قازاق شەت ەلدەگى دۇنيەلەردىڭ قاجەت نەمەسە قاجەت ەمەس ەكەندىگىن سارالاماي پلاگيات جاساي بەرەدى؟ قازاق حالقى ەجەلدەن-اق قىز بەن جىگىت اراسىنداعى سەزىمدى، ماحابباتتى  وزگەلەرگە جاريا قىلماي، جاسىرىن ۇستاعان. قاي قازاق قىزى ءوز سەزىمىن جىگىتكە تۋرا ايتىپ ەدى نەمەسە قاي جىگىت ەلدىڭ كوزىنشە «مەن ساعان عاشىقپىن» – ، دەپ جۇرەكتەگى سەزىمىن ايقايلاپ ايتقان. ماحابباتتىڭ ناعىز كەرەمەتى ونى جاسىرىن ۇستاۋدا ەمەس پە ەدى؟! ال ءبىز ونى جارياعا جار سالىپ ايتساق ماحاببات ءسوزىنىڭ ءمان-ماعىناسىن جوعالتىپ الاتىنىمىز جالعان ەمەس.

بۇل اتى شۋلى مەيرام قازاق جەرىندە 1999 جىلدان باستاپ تويلانىپ كەلە جاتىر. سونداعى ماقسات جاستارعا ماحاببات سەزىمىنىڭ شىنايىلىعى مەن ماڭىزدىلىعىن ءتۇسىندىرۋ دەپ اعىنان جارىلادى ۇيىمداستىرۋشىلار. وسى كۇنگە وراي ءار قالادا، ءار ۋنيۆەرسيتەت قابىرعاسىندا بەلگىلى ءبىر جۇپتاردىڭ اراسىندا جارىس ءوتىپ، ماراپاتتالىپ جاتادى. بۇل جەردە ەشقانداي ءمان-ماعىنا دا، ماقسات تا كورىنبەيدى. بۇل جەردەگى ماقسات وزگەشە سەكىلدى. وسى مەيرامدى جوعارى دەڭگەيدە ناسيحاتتاۋ ارقىلى جاستاردىڭ ساناسىنا ءسىڭدىرۋ، بويىن ۇيرەتۋ. بۇل مەيرامنىڭ ءبىز كۇرەسىپ جۇرگەن «اۋليە ۆالەنتين» كۇنىنەن قانداي ارتىقشىلىعى بار.

جاستار «اۋليە ۆالەنتين» مەرەكەسىندەگى سەزىمدەرىن «قوزى كورپەش – بايان سۇلۋ» مەيرامىندا دا اشىق بىلدىرەدى. ەكى مەيرامدا دا جىگىتتەر ءوز ارامدىقتارىن ىسكە اسىرا الادى، قىزدار نامىسىن اياققا تاپتايدى. مىنە، ءبىز وسى سوراقىلىقتاردىڭ الدىن الۋدىڭ ورنىنا كەرىسىنشە ارەكەت جاساپ جاتىرعان سياقتىمىز. وسى مەيرامعا وراي بەلگىلى ءبىر دەڭگەيدە تەندرلەر ءبولىنىپ، قاراجات جۇمسالادى ەكەن. نەگە ءبىز وسىنداي ارزان، ءبىر تيىنعا دا قاجەتى جوق دۇنيەلەر ءۇشىن سونشا قاراجات جۇمساۋىمىز كەرەك. كەيبىر ۇيىمداستىرۋشىلار  ماحاببات ءسوزىنىڭ ماعىناسىن جاستارعا كەڭ دەڭگەيدە ءتۇسىندىرۋدى ماقسات ەتىپ وتىرمىز دەپ سۇحبات بەرەدى. ماحاببات ءسوزى تەك قىز بەن جىگىت اراسىنداعى سەزىمدى عانا بىلدىرمەيتىنى بەلگىلى. وسى جاعىنان دارىپتەۋدى نەگىزگى ماقسات ەتىپ قويعان بولسا مەيرامنىڭ اتى نەگە «قوزى كورپەش – بايان سۇلۋ» دەپ اتالادى دەگەن سۇراق تا تۋىندايدى. بۇل مەيرامدى ناسيحاتتاماساق تا بۇگىنگى جاستار بىر-بىرىنە سەزىمدەرىن جاسىرىپ، سىيلىق جاساماي قالمايدى. ءبىز كەلەشەك جاستاردىڭ ساناسىن قاجەت ەمەس دۇنيەلەرمەن ۋلاماۋىمىز كەرەك. بۇل مەيرام وسىلاي جالعاسىن تاۋىپ تويلانا بەرەتىن بولسا اتالعان سوراقىلىقتىڭ الداعى ۋاقىتتا تولاستاماسى انىق. بۇعان دەيىن ماحاببات ناسيحاتتاۋدى قاجەت ەتپەگەن، ەتپەيدى دە. بۇل مەيرام قازاق جاستارىنىڭ اراسىندا جاساندى سەزىمنىڭ پايدا بولۋىنا اكەلىپ سوقتىرارى انىق. بۇل لاس مەيرامدى قوزى مەن باياننىڭ كىرشىكسىز سەزىمىنە تەڭەپ لاستاۋدىڭ  دا قاجەتى جوق.

اۆتورى: اسەل وتەشوۆا