بەرليندە يبن-رۋشد پەن گەتەنىڭ اتىنداعى مەشىت اشىلدى، دەپ جازادى قامشى اقپاراتتىق اگەنتتىگى.
مەشىتتىڭ يمامى گەرماندىق فەمينيست جانە قۇقىق قورعاۋشى، تۇرىك تۋماسى سەيران اتەس ەسىمدى ايەل. عيماراتتىڭ ەرەكشەلىگى ەر ادامدار مەن ايەل ادامدار ءبىر بولمەدە ناماز وقيدى، ونىڭ ۇستىنە مەشىتكە كەلۋشىلەرگە حيدجاپ كيۋ مىندەتتەلمەگەن. بۇل تۋرالى EurAsia Daily حابارلايدى.
ورتا عاسىرداعى اراب فيلوسوفى مەن نەمىس اقىنىنىڭ ەسىمى بەرىلگەن مەشىت قاسيەتتى يوگان اتىنداعى ەۆانگەل شىركەۋىنىڭ 3-قاباتىندا ورنالاسقان.
سەيران اتەستىڭ ايتۋىنشا، «جاڭا ءدىندى جاساپ جاتقان جوق، كەرىسىنشە يسلامداعى مەزگىلى جەتكەن رەفورمانى قايتا جانداندىرماق» ەكەن. «حريستيان جانە بۋددا ايەلدەرى تەڭدىككە قول جەتكىزۋ ءۇشىن بىرنەشە عاسىر جۇمسادى، ەندى مۇسىلمان ايەلدەرىنىڭ كەزەگى كەلدى»، - دەيدى ول. ونىڭ ۇستىنە، ەنگىزگەن تاعى ءبىر جاڭالىعى بار ەكەن – «ليبەرالدى مەشىتكە» گەيلەر مەن لەسبيلەرگە دە ورىن تابىلاتىن كورىنەدى. «يسلامنىڭ ءتۇرلى دەنوميناسيالارىمەن، شەيىتتەر، سۋفيلەر، سالافيتتەر، سۇننەتتەرمەن بىرگە قۇدايعا قۇلشىلىق جاساۋدا، ءبارىمىزدىڭ ءبىر بولمەدە بولعانىمىز ماڭىزدى»، دەپ قوستادى قۇقىق قورعاۋشى-يمام.
ەرەكشە مۇسىلمان عيماراتىنىڭ اشىلۋ راسىمىنە شۆەيساريالىق قۇقىق قورعاۋشى جانە فەمينيست سايدا كەللەر-مەسساحلي قاتىستى. ول سەيران اتەستىڭ باستاماسىن قولداپ وتىر. ايتۋىنشا، بۇگىنگى تاڭدا يسلام راديكاليزم مەن فۋندامەنتاليزمدى باسىنان كەشۋدە.
«ليبەرالدى مەشىتتى» قۇرۋ ءۇشىن سەيران اتەستىڭ 8 جىل ۋاقىتى كەتىپتى، ونىڭ باستاماسىن قولداعان بىرنەشە مۇسىلمان ايەلدى اشىق قولداۋدان جۇرەكسىنىپ، العاشقى نامازعا كەلمەگەن كورىنەدى.
بەرليننىڭ وزگە مۇسىلماندارىنىڭ نە ويلايتىنى ءالى بەلگىسىز، ولار قانداي دا ءبىر پىكىر بەرۋدەن باس تارتىپ وتىر. الايدا، يوگان شىركەۋى ورنالاسقان اۋداننىڭ تۇرعىندارى يسلام فۋندامەنتاليزمى تاراپىنان شابۋىلدار جاسالا ما دەگەن قاۋىپتەرىن اشىق ايتتى. وعان سەيران اتەستىڭ جاۋابى دايىن بولدى. ول ءاردايىم مەملەكەتتىك ورگاندارمەن، سونداي-اق پوليسەي قىزمەتكەرلەرىمەن ۇزدىكسىز بايلانىستا بولاتىنىن ايتىپ سەندىردى. جاقىن ارادا قاۋىپسىزدىك شاراسى كۇشەيتىلەتىنىن ايتتى.
قۇقىق قورعاۋشى ءوزىن دەموكرات سانايدى جانە «دەموكراتيا اركىمگە سەنىممەن ءومىر سۇرۋگە مۇمكىندىك بەرەدى» دەيدى.
شولۋشى: گۇلىم جاقان
پىكىر قالدىرۋ