2017ء-شى جىل قازاقستان ءۇشىن "قىتايدىڭ تۋريزم جىلى" بولىپ تابىلادى. قازىرگى تاڭدا ەكى مەملەكەتتىڭ تۋريزم سالاسىنداعى ىنتىماقتاستىعى كۇننەن كۇنگە كۇشەيە تۇسۋدە. پەكين قالاسى ءتۋريزمدى دامىتۋ كوميتەتى استانا ەكسپو-2017  كورمەسىنىڭ جۇڭگو پاۆيلونىندا پەكين اپتالىعىنىڭ اشىلۋىنا قاتىسقاننان كەيىن، 19-ماۋسىم كۇنى الماتى قالاسىنداعى  RءىXOS مەيرامحاناسىندا استانا ەكسپو-2017 حالىقارالىق كورمەسى اياسىندا الماتى – پەكين ساۋدا-ەكونوميكالىق ىنتىماقتاستىق سەمينارى بولىپ ءوتتى. وعان پەكين قالاسىنىڭ دەلەگاسياسى، ساۋدا پالاتاسى وكىلدەرى جانە الماتى قالاسى اكىمدىگىنىڭ قىزمەتكەرلەرى، ق ر «اتامەكەن» ۇلتتىق كاسىپكەرلەر پالاتاسىنىڭ، قازاقستان – جۇڭگو ساۋدا قارىم-قاتىناسىن ارتتىرۋ پالاتاسىنىڭ مۇشەلەرى، سونداي-اق، وتاندىق كاسىپكەرلەر قاتىستى.

 شارا بارىسىندا پەكين قالاسى دەلەگاسياسىنىڭ جەتەكشىسى پەكين قالاسى ءتۋريزمدى دامىتۋ كوميتەتىنىڭ باسشىسى دجاۋ گۋانگچاۋ  ءسوز سويلەدى. ول ءوز سوزىندە پەكين جانە الماتى قالالارى اراسىنداعى ساۋدا-ەكونوميكالىق قاتىناستار جاڭا باعىتتا دامىپ كەلە جاتقانىن تىلگە تيەك ەتتى. ال ودان كەيىن ءسوز العان الماتى قالاسى اكىمىنىڭ ورىنباسارى رۋميل تاۋفيكوۆ ەكى ەل اراسىندا «نۇرلى جول» جانە «جىبەك جولى» باعدارلامالارى جولعا قويىلىپ، «ءبىر بەلدەۋ – ءبىر جول» جوباسى جۇزەگە اسىرىلا باستاعانىن اتاپ ايتتى. بۇل رەتتە، الدىمەن ورتالىق ازيا، تمد ەلدەرى مەن ودان ءارى ەۋروپاعا جانە پارسى شىعاناعىنا شىعۋعا مول مۇمكىندىكتەر اشاتىن «ءبىر بەلدەۋ – ءبىر جول» جوباسىنىڭ ماڭىزدىلىعىنا توقتالدى. سوسىن، ونىڭ ورىندالۋىندا الماتىنىڭ الاتىن ورنى ايرىقشا ەكەندىگىن ايتا كەلىپ، قازىرگى تاڭدا الماتى قالاسىندا 296 بىرلەسكەن كاسىپورىندار جۇمىس ىستەيتىنىن تىلگە تيەك ەتتى.

(سۋرەت: بيزنەس-مۇمكىندىكتەر تۋرالى الماتى-پەكين ىنتىماقتاستىعى جونىندەگى كونفەرەنسيا)

(الماتى وبىلىسى تۋريزم باسقارماسى  سىرتقى   بايلانىستار،   مەملەكەتتىك   قىزمەتتەر   كورسەتۋ   جانە   ينۆەستيسيالىق   جۇمىستار   ءبولىمى ءبولىم باسشىسى ورازبايەۆ باقىتجان قابدوللا ۇلى مەن پەكين قالاسى ءتۋريزمدى دامىتۋ كوميتەتى باسشىسى دجاۋ گۋانگچاۋ مىرزا)

كوميتەت مۇشەسى دجاۋ گۋانگچاۋ  كونفەرەنسياعا قاتىسقان وكىلدەردى پەكيندەگى تۋريزممەن جانە تۋريزم ساياساتى تۋرالى ءتيىستى اقپاراتپەن تانىستىرىپ، پەكيننىڭ باي تاريحى مەن مادەني مۇراسى جونىندە، جوعارى دەڭگەيدەگى قابىلداۋ جانە قىزمەت كورسەتۋ مۇمكىندىگىن، تاعامدار مەن تاۋارلاردىڭ سان الۋاندىعىن، سونداي-اق، ءار-تۇرلى ساۋىقتىرۋ شارالارى تۋرالى اڭگىمەلەپ بەردى. ءسوز سوڭىندا ول الماتىداعى ارىپتەستەرىنە پەكيندەگى كورىكتى جەرلەردى تانىستىردى  ءارى پەكيندەگى تۋريستىك اگەنتتىكتەرىن ۇسىندى،  جاعدايدى پايدالانا وتىرىپ، بىرلەسىپ دامۋعا الماتىداعى تۋريزم سالاسىمەن تىعىز ىنتىماقتاسۋعا دەگەن تىلەگىن ءبىلدىردى.

مىنە، وسىنداي ەكى تاراپتىڭ كا­سىپكەرلەرى قوزعاعان ساۋدا-ىنتىماقتاستىق قاتىناستار تۋرالى ناقتى سوزدەردەن سوڭ، ەكى جاقتىڭ ءار سالاداعى كاسىپكەرلەرى اراسىندا ىنتىماقتاستىق تۋرالى مەموراندۋمعا قول قويۋ راسىمدەرى بولدى. تاراپتار تۋريستىك سالاداعى بازالىق ينفراقۇرىلىمدى جەتىلدىرۋگە، ءتيىستى تۋريستتىك مارشرۋتتارىن دامىتۋعا، ءتۋريزمنىڭ جاڭا مودەلدەرىن جاساۋعا جانە وزگە اسپەكتىلەردە ءوزارا تۇسىنىكتىك نەگىزىندە ىنتىماقتاستىق پەن تاجىريبە الماسۋدى كۇشەيتۋگە، جەكە وكىلەتتىلىكتەر سالاسىندا ۇزاق مەرزىمدى ءارى جان-جاقتى تۋريستتىك قارىم-قاتىناستارىن دامىتۋعا ارەكەتتەسۋگە كەلىستى.

كونفەرەنسيادان كەيىن پەكين قالاسى تۋريزم جونىندەگى كوميتەتى مەن تۋريستتىك ۇيىمدارى الماتى وبلىسىنىڭ تۋريزم باسقارماسىنىڭ باسشىلارىمەن، الماتى قالاسى تۋريزم باسقارماسى تۋريستىك اقپارات ورتالىعى جانە سىرتقى بايلانىستار ءبولىمى، سونداي-اق، جەرگىلىكتى تۋريستىك كاسىپورىندارىمەن كەلىسسوزدەر وتكىزدى؛ الماتى قالاسى مەن الماتى وبلىسىنىڭ تۋريزم باسقارماسى جەرگىلىكتى تۋريستىك رەسۋرستارىن دامىتىپ جانە ونى كوپشىلىك اراسىندا تانىمال ەتىپ، سونىڭ ارقاسىندا ودان دا كوپ تۋريستەردى كەلتىرىپ، پەكين قالاسى تۋريزم كوميتەتىمەن ىنتىماقتاسۋىندا تىعىز قاتىناس ورناتىلاتىنىنا ۇمىتتەنەدى. پەكين قالاسى تۋريزم جونىندەگى كوميتەت مۇشەسى دجاو گۋانگچاو مالىمدەگەندەي، بولاشاقتا پەكين الماتىمەن تۋريزم سالاسىنداعى ىنتىماقتاستىقتى نىعايتۋدى، الماتى مەن پەكيننىڭ تۋريزم سالاسىن دامىتۋ بويىنشا ءىس-شارالاردى ۇيىمداستىرۋىنا قولداۋ كورسەتۋدى جانە كومەكتەسۋدى، تۋريستتىك اگەنتتىكتەرىن بەلسەندى تۇردە قۇرۋدى جانە بۇقارالىق اقپارات قۇرالدارىن ىسكە قوسۋدى، الماتى قالاسى تۋريستتىك رەسۋرستارىن ۇسىنۋ ءۇشىن ءتيىستى ارنالاردى پايدالانۋدى، تۋريزم مەن مادەني الماسۋ سالاسىنداعى ەكى جاقتى ىنتىماقتاستىققا ارەكەتتەسۋدى كوزدەيدى، بۇل «ءبىر بەلدەۋ – ءبىر جول» اتتى حالىقارالىق ىنتىماقتاستىق باعدارلاماسىنا وڭتايلى ۇلەس قوسادى.