2017 جىلدىڭ 9 شىلدەسى قازاقستاندىق وپەرا ونەرى ءۇشىن تاريحي كۇن رەتىندە ەستە قالماق. ونەردى باعالايتىن ورەسى بيىك تىڭدارمان وپەرا جۇلدىزدارىمەن كەزدەسىپ، كلاسسيكالىق ادەمى كەشتىڭ كۋاسى بولدى. حالىق اسەم ءان تىڭداپ، وپەرا انشىلەرىنىڭ قۇندى مۇراسى جيناقتالعان «قازاق وپەراسىنىڭ اڭىزدارى» انتولوگيامەن تانىستى. تۇساۋكەسەر كونسەرت «استانا ەكسپو – 2017» كورمەسى اياسىندا ءوتتى.

كلاسسيكالىق وپەرا ونەرى كەز-كەلگەن مەملەكەتتىڭ مادەني-رۋحاني ءومىرىنىڭ كۇرە تامىرى دەسەك بولادى. قازاقستاندىق وپەرا ساحناسىندا ۇلت ماقتانىشىنا اينالعان، كەلەر ۇرپاققا ۇلگى بولعان تۇلعالار از ەمەس. ولاردىڭ اتى تاريحتا التىن ارىپتەرمەن جازىلدى. بۇل جوبانىڭ باستى ەرەكشەلىگى – وپەرا تاريحىندا ويىپ تۇرىپ ورىن الاتىن تۇلعالار تۋرالى ارحيۆتەردەن الىنعان قۇندى دەرەكتەر، فوتوسۋرەتتەر مەن ولاردىڭ داۋىسى جازىلعان ۆيدەوماتەريالدار ساندىق تەحنولوگياعا كوشىرىلىپ، CD، DVD ديسكتەرگە جيناقتالدى. اتاپ ايتقاندا كۇلاش بايسەيىتوۆا، روزا باعلانوۆا، ريشات ابدۋللين، بيبىگۇل تولەگەنوۆا، ەرمەك سەركەبايەۆ، روزا جامانوۆا، الىبەك دىنىشوۆتەردىڭ شىعارماشىلىق مۇرالارىنا ارنالىپ جەكە-جەكە بۋكلەتتەر دايىندالدى. ياعني، ءبىر عانا انتولوگيالىق جيناقتا جەتى بىردەي قازاقستاندىق وپەرا ونەرىنىڭ شەبەرلەرى، كسرو حالىق ارتيستەرىنىڭ ومىر-دەرەگى، شىعارماشىلىعى قامتىلدى. جان-جاقتا شاشىلىپ جۇرگەن قۇندى دۇنيەلەر جيناقتالدى. انتولوگيا وپەرا انشىلەرىنىڭ اندەرى جازىلعان 7 اۋديوديسكتەن (ءار ورىنداۋشىعا ءبىر ديسكتەن) جانە ولاردىڭ كونسەرتتىك، وزگە دە ۆيدەولارى بار 7 DVD-ديسك پەن بۋكلەتتەن تۇرادى.

انتولوگيا تۇساۋكەسەرىمەن بىرگە كورنەكتى انشىلەردىڭ قاتىسۋىمەن كونسەرت ءوتتى. وعان كەڭەس وداعىنىڭ حالىق ءارتىسى، سوسياليستىك ەڭبەك ەرى بيبىگۇل تولەگەنوۆا، قازاقستاننىڭ ەڭبەك سىڭىرگەن قايراتكەرلەرى: ءالفيا كاريموۆا، تالعات مۇسابايەۆ، تامارا اسار، اندرەي ترەگۋبەنكو، جۇپار عابدۋللينا، حالىقارالىق كونكۋرستاردىڭ لاۋرەاتى – رۋستام سۇلەيمانوۆ، استانا قالاسى اكىمدىگىنىڭ مەملەكەتتىك اكادەميالىق فيلارمونياسىنىڭ سيمفونيالىق وركەسترى مەن ونىڭ كوركەمدىك جەتەكشىسى – بەرىك باتىرحان ۇلى، ديريجەرى ەربولات احمەدياروۆتار قاتىستى.

جوبانى ۇيىمداستىرۋشى ق ر مادەنيەت جانە سپورت مينيسترلىگى مەن «ميراس» قوعامدىق ۇلتتىق مادەني قورى» قوعامدىق قورى. اقپاراتتىق دەمەۋشى – KAZAKH TV جانە ستۆ تەلەارنالارى. جوبا اۆتورى – كسرو حالىق ءارتيسى، سوسياليستىك ەڭبەك ەرى بيبىگۇل تولەگەنوۆا.

«وسىنداي ۇلكەن جوبانى جاساعانىمىزعا قۋانىشتىمىز. كۇلاش بايسەيتوۆادان باستاپ روزا جامانوۆالار، ريشات ابدۋلليندەر وپەرا ونەرىنىڭ دامۋىنا ۇلەس قوسىپ، سونىڭ العاشقى باسپالداعىن قالادى. قازاقتى الەمگە تانىتتى. بۇگىنگى جوبا سول ونەر ادامدارىنىڭ تۋىندىلارىن ءبىر جەرگە جيناقتاپ، ەنسيكلوپەديالىق ديسك شىعارۋمەن ەرەكشەلەنىپ وتىر. بارشا ونەر سۇيەر قاۋىم مەن ءوزىمنىڭ اتىمنان وسى جوبانىڭ باستاماشىسى بولعان بيبىگۇل احمەت قىزى تولەگەنوۆاعا جانقيارلىق ەڭبەگى مەن ونەردەگى قىزمەتى ءۇشىن شەكسىز العىس بىلدىرەمىن!»، - دەدى ق ر مادەنيەت جانە سپورت ۆيسە-مينيسترى اقتوتى رايىمقۇلوۆا.  

ارينە، جوبانىڭ نەگىزگى ماقساتى وپەرا انشىلەرىنىڭ شىعارماشىلىعىن تۇگەندەپ، جاس ۇرپاققا كلاسسيكالىق مۋزىكانى ناسيحاتتاۋ. تاريحي ميسسياسى دا ءبىر بولەك.

«مۇنداي جوبا ەلىمىزدە ءبىرىنشى رەت جاسالىپ وتىر. بۇعان دەيىن وپەرا انشىلەرىنىڭ بارلىعىنىڭ بىردەي شىعارماشىلىعى مەن سۋرەتتەرى، اندەرى ءبىر انتولوگياعا جيناقتالعان ەمەس. «ءولى رازى بولماي، ءتىرى بايىمايدى» دەگەن بار. سول سەبەپتى وسى كەم-كەتىكتىڭ ورنىن تولتىرعىمىز كەلدى»، - دەيدى كسرو حالىق ءارتيسى، سوسياليستىك ەڭبەك ەرى بيبىگۇل تولەگەنوۆا.

جوبانىڭ حالىقارالىق ماڭىزى دا جوعارى. «استانا ەكسپو-2017» حالىقارالىق كورمەسى شەڭبەرىندە ۇيىمداستىرىلعان «قازاق وپەراسىنىڭ اڭىزدارى» جوباسى تاۋەلسىز قازاقستاندى الەمدىك دەڭگەيدە وزگەلەرگە تانىتۋدىڭ توتە جولى بولعانى ءسوزسىز.