ەلىمىزدىڭ ارتىستەرى بودرۋمداعى حالىقارالىق بالەت فەستيۆالىنە العاش رەت قاتىستى دەپ جازادى Qamshy.kz اقپارات اگەنتتىگى.

ق ر مادەنيەت جانە سپورت مينيسترلىگىنىڭ حابارلاۋىنشا، بودرۋمداعى XV حالىقارالىق بالەت فەستيۆالىندەگى «استانا بالەت» تەاترىنىڭ دەبيۋتى ءساتتى وتكەنى سونشالىق، تەاتر ۇجىمىن تۇركيادا كەلەسى جىلى وتەتىن فەستيۆالگە دە شاقىردى.

بودرۋمداعى فەستيۆال تۇركياداعى تۇڭعىش ءارى جالعىز عانا بالەت فەستيۆالى. جىل سايىن جازدا وتەتىن فەستيۆالگە الەمنىڭ ۇزدىك ترۋپپالارى مەن بالەت جۇلدىزدارى شاقىرىلادى. سول سەبەپتى بولار، تۇركيانىڭ وزىندە دە بۇل فەستيۆالدىڭ ورنى ەرەكشە. كوپتەگەن تەاتر قايراتكەرلەرى مەن بالەت سۇيەر قاۋىم بودرۋمداعى دەمالىسىن فەستيۆال وتەر مەرزىمگە ىڭعايلاستىرۋعا بەيىم.

فەستيۆالدىڭ كوركەمدىك جەتەكشىسى ساادەت زەينەپ سۋنال بودرۋمداعى بالەت فەستيۆالى بىلتىردان بەرى حالىقارالىق فەستيۆالدەر مەن بايقاۋلار فەدەراسياسىنا ەنگەنىن ماقتانىشپەن جەتكىزدى.

«ءبىزدىڭ ساحنادا ءوزىنىڭ ۇزدىك قويىلىمدارىن تۇرىك تەاترلارى عانا كورسەتىپ قويماي، كورەيا مەن امەريكانىڭ ايگىلى ۇجىمدارى، «LOS VIVANCOS» اتتى تانىمال يسپان ۇجىمى، كراسنويار وپەرا جانە بالەت تەاترىنىڭ ترۋپپاسى، ناتاليا كاساتكينا مەن ۆلاديمير ءۆاسيلوۆ جەتەكشىلىك ەتەتىن مەملەكەتتىك اكادەميالىق كلاسسيكالىق بالەت تەاترى ونەرىن كورسەتىپ، بوريس ەيفماننىڭ تەاترى «دون كيحوت» سپەكتاكلىن قويدى. ءبىز دۇنيە جۇزىندەگى تانىمال، ايگىلى بالەت ۇجىمدارىن شاقىرۋعا تىرىسامىز، باعدارلامامىزدىڭ دا قىزىقتى ءارى الۋان ءتۇرلى بولۋىنا كۇش سالامىز. بيىلعى باعدارلاما دا وسىعان مىسال بولا الادى».

«استانا بالەت» تەاترى كورەرمەندەرگە قىزىقتى باعدارلامانى تارتۋ ەتتى. كورەرمەن قاۋىم حورەوگراف ريكاردو امارانتە قويعان تەاتر رەپەرتۋارىنداعى «GAIA» جانە «A Fuego Lento» اتتى ءبىر اكتىلى بالەتتەرىن تاماشالاي الدى. «وسى فەستيۆالگە قاتىسىپ، تاماشا ونەر كورسەتكەنىمىزگە قۋانىشتىمىن. ارتىستەردىڭ ءبيى، كورەرمەننىڭ قوشەمەتى – وسىنىڭ ءبارى كوڭىلدەن شىقتى. فەستيۆالدى ۇيىمداستىرۋشىلار دا، كورەرمەن قاۋىم دا ارتىستەرىمىزدىڭ سەزىمتال، سۇلۋ ءارى تەحنيكاسىنىڭ دا مىقتى ەكەنىن اتاپ ءوتتى. ءبىز ءۇشىن بۇل قيىن قويىلىم بولعانىمەن، «استانا بالەت» تەاترىنىڭ ارتىستەرى بۇل دۇنيەنى دارىندىلىعى مەن ەڭبەكقورلىعىنىڭ ارقاسىندا الىپ شىقتى. ولار ناعىز بالەت سالتاناتىن پاش ەتتى»، – دەدى فەستيۆالدەگى قويىلىمنان كەيىن ريكاردو امارانتە.

«استانا بالەت» تەاترىنىڭ اۋليە پەتر قامالىنىڭ امفيتەاترىندا كورسەتكەن «GAIA» جانە «A Fuego Lento» اتتى قوس سپەكتاكلدىڭ پلاستيكالىق، مۋزىكالىق جانە ەموسيالىق تۇرعىدان ايىرماشىلىعى جەر مەن كوكتەي. «GAIA» – سۋ، جەر، وت، اۋا جانە ورمان سەكىلدى ءوزارا ارەكەت ەتىپ، ءبىرىن-بىرى تولىقتىرىپ وتىراتىن بەس ەلەمەنتتەن قۇرالعان جەر شارى جايلى سەزىمتال ءارى ءجان-تانىڭدى باۋراپ الاتىن حورەوگرافيالىق ءاپسانا.

«A Fuego Lento» – ىنتىق سەزىم، بۋىرقانعان قۇشتارلىق، الاۋلاعان ەموسياعا تولى قويىلىم. قوس بالەتتىڭ الۋان-تۇرلىلىگىنە قاراماستان، «استانا بالەت» تەاترىنىڭ ورىنداۋىندا ەكەۋى دە ۇيلەسىمدى كورىندى. جەر-انانىڭ ءمىنسىز سۇلۋلىعى مەن وشپەس ماحاببات جايلى قوس ءاپسانانى كورەرمەن قاۋىم زور قوشەمەتپەن قارسى الدى. 

فەستيۆالگە ارنايى كەلگەن تۇركسوي باس حاتشىسىنىڭ ورىنباسارى فىرات پۋرتاش، بيىل تۇركيا مەن قازاقستان اراسىنداعى ديپلوماتيالىق قارىم-قاتىناستىڭ ورناعانىنا 25 جىل تولعانىن اتاپ ءوتتى.

پۋرتاش مىرزانىڭ پىكىرىنشە، قازاقستان كەن بايلىعىمەن عانا ايگىلى ەمەس، ءوزىنىڭ سىرتقى ساياساتى ءارى قازاقستان پرەزيدەنتى نۇرسۇلتان نازاربايەۆتىڭ قىزىقتى ماقالالارى مەن باياندامالارىنىڭ ارقاسىندا دا الەمگە تانىمال. قازاقستان مەن تۇركيا اراسىنداعى ىنتىماقتاستىق ءتۇرلى سالادا بەكي ءتۇستى. ال، «استانا بالەت» تەاترىنىڭ ساپارى – قازاقستاننىڭ مادەنيەتىنە دەگەن زور قىزىعۋشىلىقتىڭ دا بارىن كورسەتىپ وتىر. ءتۇبى ءبىر تۇركى ەلدەرىنىڭ ىنتىماقتاستىعىنىڭ كىلتى دە وسىندا.

حالىقارالىق بالەت فەستيۆالىنىڭ ۇيىمداستىرۋشىلارى «استانا بالەت» تەاترى ارتىستەرىنىڭ شەبەرلىگى فەستيۆال باعدارلاماسىنا كورىك بەرگەنىن اتاپ ءوتىپ، قازاقستاننىڭ جاس تا بولسا، ەل اۋزىنا ىلىنگەن جاس ۇجىمىنىڭ بودرۋم فەستيۆالىنە قاتىسۋىنا تۇرتكى بولعان تۇركسوي حالىقارالىق تۇركى مادەنيەتى ۇيىمىنا ءىلتيپاتىن ءبىلدىردى.

بودرۋمداعى XV حالىقارالىق بالەت فەستيۆالىندە انكارا مەن ىستامبۇل وپەرا جانە بالەت تەاترلارى؛ ءداستۇرلى جانە زاماناۋي بيلەردى تانىمال حورەوگراف ليست الونسونىڭ قويىلىمىندا كورسەتكەن كۋبالىق ترۋپپا ونەر كورسەتكەنىن اتاپ ايتۋ كەرەك. كورەرمەن قاۋىم «LOS VIVANCOS» بي شوۋىن؛ ۇلكەن تەاتر مەن «لا سكالا» ميلان تەاترىنىڭ پريما-بالەريناسى سۆەتلانا زاحاروۆانىڭ «Amore» باعدارلاماسىن تاماشالاي الدى.