جۋىردا كوپبەيىندى قالالىق اۋرۋحاناسىنا رەسەي  فەدەراسياسىنىڭ ەڭبەك سىڭىرگەن دارىگەرى، پروفەسسور ەدۋارد گاللياموۆ، مەديسينا عىلىمىنىڭ كانديداتى سۆەتلانا گاللياموۆا جانە اقتوبەدەن كەلگەن مەديسينا عىلىمىنىڭ دوكتورى، پروفەسسور ۆلاديمير كوتلوبوۆسكيي ۋرولوگيا، گينەكولوگيا جانە حيرۋرگيا باعىتتارى بويىنشا كەلىپ،  شەبەرلىك ساعاتىن وتكىزدى.

جوعارى بىلىكتى دارىگەرلەر قالالىق اۋرۋحانانىڭ ناۋقاستارىن باقىلاۋعا الىپ، لاپاروسكوپيالىق، ەندوۆيدەوحيرۋرگيالىق وتا جاساۋدىڭ جاڭا تاسىلدەرىن كورسەتتى.

مامانداردىڭ ايتۋىنشا، لاپاروسكوپيا جانە ەندوۆيدەوحيرۋرگيا – ناۋقاستىڭ ىشكى اعزاسىنا وتا جاساۋ ءۇشىن تىلىك جاساماي ەمدەيتىن حيرۋرگيانىڭ جاڭا ءادىسى بولىپ تابىلادى. بۇل تاسىلمەن وتا جاسالعان ەمدەلۋشى بىر-ەكى كۇن ىشىندە اياققا تۇرىپ كەتەدى ەكەن.

– بۇعان دەيىن استانا، الماتى، اقتاۋ، قاراعاندى قالالارىندا بولىپ، ءوز تاجىريبەممەن ءبولىستىم. ەندى ورال قالاسىنا دا كەزەك كەلدى. الداعى ءۇش كۇن ىشىندە سەگىز لاپاروسكوپيالىق وتا جاساماقپىز. كەز كەلگەن ناۋقاس ونسىز دا اۋىرىپ، مازاسى كەتىپ تۇرعان سوڭ، ەڭ جەڭىل تاسىلمەن ەم العىسى كەلەدى. ال لاپاروسكوپيالىق تەحنولوگيا ارقىلى ناۋقاستىڭ دەنەسىن ەشبىر ءتىلۋسىز ەمدەۋگە قول جەتكىزدىك. تەك بىر-ەكى جەردەن كولەمى 0،5-1،5 سم بولاتىن تەسىكتەر جاسايمىز. بۇنداي ءتاسىل ەمدەلۋشىنىڭ قالىپتى جاعدايعا كەلۋىن تەزدەتەدى. سونىمەن قاتار دارىگەرگە اعزانىڭ سۋرەتىن ۇلكەن ءارى انىق ەتىپ كورسەتەتىن ەندوۆيدەوحيرۋرگيادا قولدانىلاتىن ەڭ جاڭا 3D فورماتتاعى ۆيدەوجۇيە وتانىڭ قاۋىپسىزدىگىن ودان ءارى ارتتىرادى، – دەيدى ەدۋارد  ابدۋلحايەۆيچ.

اتالعان اۋرۋحانىنىڭ ديرەكتورى ارمان قاليبەكوۆتىڭ ايتۋىنشا، جەرگىلىكتى دارىگەرلەر دە وتا جاساۋ پروسەسىنە قاتىسىپ، جاڭا ءادىس تۋرالى بىلىم-بىلىگىن ارتتىرۋدا. ال قالعان ماماندار اۋرۋحانانىڭ ءماجىلىس زالىندا وتىرىپ، وتانى 3D فورماتتى تەلەديداردان باقىلاعان. ولارعا لاپاروسكوپيالىق «Karl Storz» اپپاراتىمەن جۇمىس جاساۋدى ۇيرەتۋ ءۇشىن مۋللياجدارعا وتا جاساتىپ كورسەتكەن.

– نەگىزى بىزدە مۇنداي وپەراسيالار جاسالىپ ءجۇر، الايدا عىلىم ءبىر ورىندا تۇرمايدى. اسىرەسە مەديسينا سالاسىندا جاڭا ادىستەر ءجيى پايدا بولىپ جاتادى. سوندىقتان حالىقارالىق دەڭگەيدە تاجىريبە الماسىپ تۇرۋ وتە ماڭىزدى، – دەيدى ارمان تالعات ۇلى.

گۇلىم اقاپ،

باتىس قازاقستان وبلىسى