قىرىمدا ادام قۇقىقتارىن تاپتاۋ ايتارلىقتاي كۇشەيگەن. بۇل تۋرالى 25 قىركۇيەكتە بۇۇ-نىڭ جاڭا بايانداماسىندا ايتىلدى، دەپ جازادى Qamshy.kz اقپارات اگەنتتىگى.
سوڭعى كەزدەرى قىرىمدا ادامداردىڭ جوعالۋى، جازىقسىز تۇتقىنداۋلار، ازاپتاۋ جانە زاڭسىز جەر اۋدارۋ سىندى ارەكەتتەر جيىلەگەن. ساراپشىلاردىڭ پىكىرىنشە، رەسەيلىك بيلىكتىڭ ارەكەتىنەن اسىرەسە قىرىم تاتارلارى زارداپ شەككەن.
باياندامادا كورسەتىلگەندەي، اننەكسيالانعان قىرىمنىڭ 10 مىڭداعان تۇرعىنىنا كۇشتەپ رەسەي ازاماتتىعىن بەردى. ازاماتتىق الۋدان باس تارتقانداردىڭ جاعدايى مۇشكىل بولدى. مەملەكەتتىك قىزمەتكەرلەرىن رەسەي ازاماتتىعىن الۋدان باس تارتقان جاعدايدا جۇمىستان شىعارامىز دەپ قورقىتقان.
«تۇراتىن جەرى بولا تۇرا، رەسەي ازاماتتىعى جوق ادامدار زاڭ الدىندا تەڭ ەمەس جانە بارلىق قۇقىقتارىنان ايىرىلادى، - دەلىنگەن باياناداما مازمۇنىندا، - ولار جەرگە يەلىك ەتە المايدى، داۋىس بەرۋ جانە سايلاۋعا ءتۇسۋ قۇقىعىنان ايىرىلادى، قانداي دا ءبىر ءدىني ۇيىمدارعا تىركەلۋگە، قوعامدىق جينالىستارعا قاتىسۋعا، مەملەكەتتىك لاۋازىمدا بولۋعا جانە جەكە كولىكتى ءوز اتىنا تىركەۋگە تىيىم سالىنادى».
سونىمەن قوسا، تۇتقىندالعان نەمەسە تەرگەۋ يزولياتورىندا وتىرعان ادامدار حالىقارالىق قۇقىق تاجىريبەسىنە قاراماستان رەسەيگە جىبەرىلدى. كەي تۇتقىندارعا قاتىگەزدىك كورسەتىلدى، كەم دەگەندە ءۇش ادام قازا تاپتى، ءارى ولارعا ەشقانداي مەديسينالىق كومەك كورسەتىلمەگەنى انىقتادلى.
اننەكسياعا قارسى ادامداردىڭ ەركىن پىكىر ءبىلدىرۋ، بەيبىت وتىرىستار وتكىزۋ جانە قانداي دا ءبىر ءدىندى ۇستانۋ قۇقىعىنان ايىرىلدى.
