باتىس قازاقستان وبلىسىندا اۆتوكولىكتى ايداپ كەتۋشىلەر ازايار ەمەس، دەپ حابارلايدى Qamshy.kz اقپارات اگەنتتىگى  قازاقپارات مالىمەتىنە سۇيەنىپ.

بقو ءىىد باسپا ءسوز قىزمەتىنەن تۇسكەن مالىمەتكە قاراعاندا، 20 قىركۇيەك كۇنى ورال قالاسىنداعى دوستىق داڭعىلىنىڭ بويىندا بەلگىسىز بىرەۋ 1988 جىلعى ازاماتقا تيەسىلى «فولكسۆاگەن پاسسات» اۆتوكولىگىن ايداپ كەتكەن. جەدەل ىزدەستىرۋ شارالارى بارىسىندا بۇرىن دا وسىنداي قىلمىستارىمەن ىشكى ىستەر ورگاندارىنىڭ ەسەبىندە بولعان 1994 جىلعى ا. دەگەن تۇرعىن ۇستالدى.

سول سەكىلدى 23 قىركۇيەك كۇنى شىڭعىرلاۋ اۋىلىندا تاعى بىرەۋ مەيرامحانا الدىندا تۇرعان، 1959 جىلعى ازاماتقا تيەسىلى «لادا-لارگۋس» كولىگىن «ءمىنىپ» كەتكەن. بۇل ىسكە قاتىسى بار ورال قالاسىنىڭ 1993 جىلعى تۇرعىنى  قولعا ءتۇستى. ۇرلانعان كولىكتەر تابىلىپ، يەلەرىنە قايتارىلدى. كۇدىكتىلەردەن ەشقايدا كەتپەۋ تۋرالى قولحات الىنىپ، تەرگەۋ امالدارى جۇرگىزىلۋدە.

ايتا كەتەيىك، بيىلعى سەگىز ايدا وبلىس كولەمىندە 100 اۆتوكولىك ۇرلىعى تىركەلگەن بولاتىن.