الماتىدا وقۋلىقتاردى ساتىپ الۋعا 2017 جىلى جەرگىلىكتى بيۋدجەتتەن 2 ملرد 658 ملن تەڭگە ءبولىندى. بۇل تۋرالى بۇگىن «نۇر وتان» پارتياسىنىڭ الماتى قالالىق فيليالىندا «مەكتەپتە اقشا جيناۋ ماسەلەسى» تاقىرىبىندا وتكەن بريفينگتە قالالىق ءبىلىم باسقارماسى باسشىسىنىڭ ورىنباسارى ءلاززات جىلقىبايەۆا ايتتى، دەپ حابارلايدى Qamshy.kz اقپارات اگەنتتىگى.
«اتا-انالاردى تولعاندىراتىن ماسەلەنىڭ ءبىرى - وقۋلىق. بيىلعى جىلى وقۋلىقتار مەن وقۋ-ادىستەمەلىك كەشەندەردى الۋعا جەرگىلىكتى بيۋدجەت ەسەبىنەن 2 ملرد 658 ملن تەڭگە ءبولىندى. مەكتەپتەگى 1-سىنىپتان 11-سىنىپقا دەيىنگى وقۋشىلار 100 پايىز تەگىن وقۋلىقپەن قامتاماسىز ەتىلەدى. جاڭارتىلعان ءبىلىم مازمۇنىنا كوشۋگە بايلانىستى 2ء-ىنشى، 5ء-ىنشى جانە 7ء-ىنشى سىنىپ وقۋشىلارى ءۇشىن جاڭا وقۋلىقتار باسىلىپ شىقتى. 1-سىنىپ وقۋشىلارىنىڭ جازۋ داپتەرلەرى تولىق جاڭارتىلىپ، تەگىن بەرىلەدى»،- دەدى ءلاززات جىلقىبايەۆا.
ءبىلىم باسقارماسى باسشىسىنىڭ ايتۋىنشا، اتا-انالار ءۇشىن وزەكتى ماسەلەنىڭ ءبىرى - اقىلى سىناق تەستىلەۋلەر.
«سىناق تەستىلەۋلەر مەكتەپتەردە اقىلى وتەتىنى تۋرالى ارىز-شاعىمداردىڭ تۇسۋىنە بايلانىستى، 2017 جىلعا سىناق تەستىلەۋدى ەكى رەت وتكىزۋ ءۇشىن جەرگىلىكتى بيۋدجەتتەن 94 ملن تەڭگە ءبولىندى. 4-11 سىنىپتارعا 2017 جىلدان باستاپ بايقاۋ تەستىلەۋى تەگىن وتكىزىلەدى»، - دەدى ول.
ءلاززات جىلقىبايەۆا ءبىلىم باسقاراسىنىڭ قاتاڭ باقىلاۋىندا تۇرعان ماسەلەنىڭ ءبىرى 1ء-شى سىنىپقا وقۋشى قابىلداۋ ەكەنىن ايتتى.
«وقۋ جىلىنىڭ باسىندا بارلىق مەكتەپ ديرەكتورلارىنا 1ء-شى سىنىپقا وقۋشى قابىلداۋ ءۇشىن تەستىلەۋدەن وتكىزۋ، اڭگىمەلەسۋ، باقىلاۋ، ەمتيحان الۋعا قاتاڭ تىيىم سالىنعانى ەسكەرتىلدى. 1ء-شى سىنىپقا بالاسى باراتىن اتا-انالار ءۇشىن بالانىڭ مەكتەپكە قالاي قابىلداناتىنى تۋرالى اقپارتتىق-تۇسىندىرمە قۇجاتتار سايتتارعا، مەكتەپتەرگە ءىلىندى. بالانى مەكتەپكە ونلاين قابىلداۋ شاراسى الماتىدا العاش رەت 2015 جىلى جەتىسۋ اۋدانىندا جۇرگىزىلدى. 2016 جىلى بوستاندىق، تۇركىسىب اۋدانىندا ونلاين قابىلدانسا، 2017 جىلى 1ء-شى سىنىپقا قابىلداۋ الماتىنىڭ بارلىق مەكتەپتەرىندە ونلاين جۇرگىزىلدى»،- دەدى ءلاززات جىلقىبايەۆا.
ايتا كەتەيىك، الماتى قالاسىنىڭ ءبىلىم باسقارماسى مەكتەپتە اقشا جيناۋعا قاتاڭ تىيىم سالىنعانىن ەسكەرتىپ، اتا-انالار كوميتەتىنىڭ ءتيىمدىلى باسقارمانىڭ كۇن تارتىبىندە تۇرعانىن مالىمدەگەن بولاتىن.
سونىمەن قاتار، 2011 جىلدىڭ 24 قازانىنداعى «ءبىلىم بەرۋ تۋرالى» زاڭىنا ەنگىزىلگەن تۇزەتۋلەر مەن ءبىلىم بەرۋدى دامىتۋدىڭ مەملەكەتتىك باعدارلاماسىنا ساي 2012 جىلدان باستاپ بارلىق وقۋشىلاردى تەگىن كىتاپپەن قامتۋ قاراستىرىلعان.
