ورتا سالماقتا WBA (Super)، IBO، WBC جانە IBF تۇجىرىمدارى بويىنشا الەم چەمپيونى قازاقستاندىق بوكسشى گەنناديي گولوۆكين (37-0-1، 33 كو) ق ر پرەزيدەنتىنىڭ اتىنا العىس سوزدەرىن قاراعاندى وبلىسىنىڭ اكىمىمەن كەزدەسۋ بارىسىندا ايتىپ جەتكىزدى، - دەپ حابارلايدى Qamshy.kz اقپارات اگەنتتىگى Vesti.kz سايتىنا سىلتەمە جاساپ.

سپورتشىنىڭ ايتۋىنشا، بۇل قولداۋ الۆارەسپەن وتكەن ىمىراسىز جەكپە-جەكتە ەرەكشە قاجەت بولعان ەكەن.

"ءبىرىنشى كەزەكتە مەن مەملەكەتىمىزدىڭ باسشىسى نۇرسۇلتان ءابىش ۇلى نازاربايەۆقا وسىنداي قولداۋ كورسەتىپ، جىلىلىق سىيلاعانى ءۇشىن العىسىمدى بىلدىگىم كەلىپ وتىر. ول جەكپە-جەكتى قالىڭ جۇرت كوردى دەپ ويلايمىن. مەنىڭ جەكپە-جەگىمدى تىكەلەي ەفير ارقىلى پرەزيدەنت كورگەنىن ەستىگەندە، ارينە، مەنىڭ جۇرەگىمدە، كەۋدەمدە كوپتەگەن ەموسيالار بولدى، - دەدى گەنناديي گولوۆكين. - ادامي تۇرعىدان الساق، بۇل جانعا جايلىلىق پەن ماقتانىش ۇيالاتاتىن وتە تاماشا جايت. جانە دە پرەزيدەنتىمىزدىڭ سپورتقا جانكۇيەرلىك ەتەتىنىنە بارلىق قازاقستاندىق بۇل ماقتانىشتى مەنىمەن بىرگە ءبولىستى دەپ ويلايمىن".

ءوز كەزەگىندە وبلىس اكىمى گەنناديي گولوۆكينگە رۋحاني جاڭعىرۋ باعدارلاماسىن جۇزەگە اسىرۋدا قوسىپ جۇرگەن ۇلەسى ءۇشىن راقمەت ايتتى. 

"ءبىزدىڭ پرەزيدەنتتەن باستاپ ەلىمىزدىڭ ءاربىر تۇرعىنى ساعان جانكۇيەر بولدى. ءبىزدىڭ قازاقستاننىڭ، قاراعاندىنىڭ اتىن وسىلاي اسقاقتاتىپ جۇرگەنىڭە ۇلكەن العىس ايتامىز"، - دەدى ەرلان قوشانوۆ.

ەسكە سالايىق، WBA، IBF، WBC، IBO نۇسقالارى بويىنشا الەم چەمپيونى گەنناديي گولوۆكين قاراعاندىعا بالالار ويىن سپورت الاڭىن سىيلاعان بولاتىن. كەشەن ونىڭ تۋىپ وسكەن اۋلاسى - مايقۇدىقتىڭ 14ء-شى ىقشام اۋدانىندا ورناتىلعان.

كەزدەسۋدىڭ باستى تاقىرىبى ايماقتا بالالار سپورتىن دامىتۋ توڭىرەگىندە ءوربىدى. بوكسشى مايقۇدىقتاعى ونىڭ ەسىمى بەرىلگەن سپورت كەشەنىندە بولىپ قايتقانىن جەتكىزدى. ونى بۇل نىسان قانشالىقتى سۇرانىسقا يە ەكەنى - وعان كەلۋشىلەر قاتارى قالىڭ با جوق پا، بالالار قانداي سپورت تۇرلەرىنە كوبىرەك بەيىم ەكەنى قىزىقتىردى. گەنناديي بۇل سپورت نىسانىن ءارى قاراي دامىتۋ تۋرالى ۇسىنىس ءبىلدىردى.

ايتا كەتەيىك، لاس-ۆەگاستا وتكەن جەكپە-جەك 12 راۋندقا سوزىلدى. جەكپە-جەك قورىتىندىسى بويىنشا گولوۆكين مەن الۆارەس تەڭ ءتۇسىپ، گولوۆكين بارلىق تيتۋلىن ساقتاپ قالدى.

سونداي-اق، كەيىنىرەك جەكپە-جەكتىڭ تولىق ۆيدەوسى جاريالاندى. سونىمەن قاتار، سپورتتىق كوميسسيا باسشىسى "كانەلونىڭ" پايداسىنا داۋىس بەرگەن تورەشىنى شەتتەتتى.