باتىس قازاقستان وبلىسى تاسقالا اۋدانىنىڭ پروكۋراتۋراسى تىيىم سالىنعان ماتەريالداردى انىقتاۋ ءۇشىن ارنايى ينتەرنەت-رەسۋرستاردىڭ مونيتورينگىن جۇرگىزگەن. تەرگەۋ ناتيجەسىندە، پورتالداردىڭ بىرىنەن ادام اعزالارىن ساتۋعا ارنالعان جارناما تابىلدى. بۇل تۋرالى بقو باسپا ءسوز قىزمەتى حابارلادى، دەپ جازادى Qamshy.kz اقپارات اگەنتتىگى.

باسپا ءسوز قىزمەتىنىڭ مالىمەتىنشە، اتالمىش جارناما قازاقستان اۋماعىندا ەركىن قولجەتىمدىلىككە يە شەتەلدىك رەسۋرستاردا جاريالانعان.

«حالىق دەنساۋلىعى جانە دەنساۋلىق ساقتاۋ جۇيەسى تۋرالى» ق ر كودەكسىنىڭ 169-بابىنىڭ 3-تارماعىنا سايكەس ەلىمىزدە ادام مۇشەلەرىن ساتۋمەن اينالىسۋعا تىيىم سالىنعان.

ق ر قىلمىستىق كودەكسىنىڭ 116-بابىنا سايكەس ءتىرى ادامنىڭ اعزالارى مەن تىندەرىنە قاتىستى زاڭسىز مامىلەلەر جاساۋ قىلمىستىق ءىس بولىپ تابىلادى.

ق ر «ب ا ق تۋرالى» زاڭىنىڭ 1-بابىنىڭ 4 جانە 5-تارماقشالارىنا سايكەس ينتەرنەت-رەسۋرس بۇقارالىق اقپارات قۇرالدارىنا جاتادى جانە وندا جاريالانعان ءاربىر اقپارات ب ا ق ءونىمى بولىپ ەسەپتەلەدى»،- دەلىنگەن پروكۋراتۋرادا.

تاسقالا اۋداندىق سوتىنىڭ شەشىمى بويىنشا ينتەرنەت رەسۋرس ق ر زاڭنامالىق اكتىلەرىنە قايشى كەلگەندىكتەن قازاقستان اۋماعىندا زاڭسىز دەپ تانىلدى. سونداي-اق، سايتتى توقتاتۋ تۋرالى شەشىم قابىلداندى. سوت شەشىمى ءالى كۇشىنە ەنگەن جوق.