ماحاببات... سونداي ىستىق ءسوز. بۇل ۇعىمنىڭ اۋقىمى دا كەڭ. اتا-اناعا دەگەن ماحاببات، وتانعا دەگەن، تۋعان جەرگە دەگەن ماحاببات، دوسقا دەگەن ماحاببات، باسقا دا تاۋسىلمايتىن سەزىمدەر... الايدا ايتقاندا جۇرەگىڭ جىلىپ سالا بەرەتىن، كوڭىلىڭ ەرەكشە كۇيگە ەنەتىن سۇيىكتى ادامىڭا دەگەن ماحابباتتىڭ ورنى تىپتەن ەرەكشە. كىتاپ وقىپ، تەلەحيكايا قاراپ ماحاببات دەگەن سوزبەن بالا كۇنىمىزدە-اق تانىستىق. ءمان بەرىپ، تەرەڭ ويلانىپ، تۇسىنە الماساق تا، ايتەۋىر قىز بەن جىگىتتىڭ قول ۇستاسىپ بىرگە جۇرگەنى، ويناعانى، كۇلگەنى، بىرنەشە ۋاقىتتان سوڭ ۇيلەنىپ، وتباسى اتانعاندارى – ءبارى-بارى قىزىق بولىپ كورىنەتىن. سول كۇندەرى قىز بەن جىگىتتىڭ قارىم-قاتىناسى دەگەن دۇنيەگە قىزىعۋشىلىق تانىتا باستادىم. جو-جوق ءوزىم جىگىتپەن ارالاسىپ، سەزىمگە بەرىلدىم دەگەن ءسوز ەمەس... 15-16 جاستاعى بەسىكتەن بەلى شىقپاعان كىشكەنتاي عانا قىزبىن عوي. ول جىلدارى 15-16 جاستاعى قىزدار اجەپتەۋىر كىشكەنتاي قىز سانالاتىن، بۇگىنگى كۇندەگىدەي ەمەس.

ماعان قىزىعى – عاشىق جۇپتاردىڭ ءومىرى، بىر-بىرىنە دەگەن سەزىمدەرى، ماحابباتتارى. مۇنداي سەزىمدەر جايىندا كىمنەن سۇرايمىن. ارينە، ءوز تۋىستارىمنان، اپكەلەرىمنەن، جەڭگەلەرىمنەن. اپكە-جەڭگەلەرمەن سىرلاسقانعا نە جەتسىن، شىركىن. اعالارىمىزعا «ماحاببات» دەگەن ءسوزدى ايتۋعا قورقاتىن ەدىك قوي. ءبىر اپكەمنەن سۇرادىم:

-جەزدەمدى العاش قالاي ۇناتتىڭىز؟

ء-بىز ستۋدەنت بولعاندا كەش (ۆەچەر) دەگەن ءجيى بولاتىن. وي، ناعىز قىزىقتى شاقتار ءبىزدىڭ كەزدە بولدى عوي. تەرەزەلەردى گازەتتەرمەن قىمتاپ، جارىقتى ءسوندىرىپ، مۋزىكانىڭ داۋسىن قاتتىراق شىعارىپ، ۆالس بيلەيتىنبىز. ءوزىمىزدىڭ كىممەن بيلەپ جاتقانىمىزدى دا بىلمەيتىنبىز، سەبەبى ول كەزدە ادامدار بىر-بىرىنە سەنەتىن. سونداي كەشتەردىڭ بىرىندە جەزدەڭ مەنى بيگە شاقىردى. مەن ونى جاقتىرماعان ەدىم، ال ول جۇگەرمەك مەنىڭ ءيىسسۋىما عاشىق بولىپتى. ەرتەڭىندە مەنى تاۋىپ الدى دا، اعالىق قامقورلىق تانىتا باستادى. سودان بەرى بىرگەمىز. سول كەزدەگى ءيىسسۋىمدى ءالى قولدانامىن.

ءيا، ەرەكشە، قايتالانبايتىن وقيعا. ماحاببات اتتى ۇلى سەزىم ءيىسسۋدان باستالدى. ءجا، كەلەسى ەستەلىككە كوشەلىك. كەزەكتىسى سۋ سۇراسام ءسۇت بەرگەن، ايران بەرگەن جەڭگەمنىڭ اڭگىمەسى.

-اعاممەن العاش قالاي تانىستىڭىز، قالاي تۇرمىسقا شىقتىڭىز؟

-مەن ءبىرىنشى تۇرمىسقا شىقتىم، سوسىن بارىپ تانىستىم. (و-و-و، مىناۋىڭىز قىزىق ەكەن دەپ ويلادىم ىشىمنەن) اعاڭ مەنى الىپ قاشتى. جوق، اعاڭ ەمەس، مەنى اعاڭنىڭ اپكەلەرى الىپ قاشتى. اعاڭمەن تانىس بولساق جاقسى عوي، مەنى بىلمەيدى دە، ءتۇرىمدى دە كورمەگەن. جاي عانا مەن جايلى اپكەلەرىنەن ەستىگەن، ءسويتىپ ايەلدىك ەتۋگە كەلىسە كەتكەن. مەن اعاڭدى تانىماسام دا، ونىڭ تۋعان اپكەسىن (ياعني، مەنىڭ انامدى) جاقسى تانىعان ەدىم. ول كىسى جايلى جاقسى پىكىرلەر ەستىدىم، اۋىلدىڭ ءبارى ماقتاپ جۇرەتىن، قايىن اپكەم ءۇشىن عانا قالۋعا شەشىم قابىلدادىم.

-ال كۇيەۋىڭىزدى العاش كورگەندە قانداي سەزىمدە بولدىڭىز؟

-مەنى الىپ قاشاردا قايىن اپكەمنىڭ ۇيىنە قوناققا بارامىز دەپ شاقىرعان. قۇربىلارىم دا الىپ قاشۋ وپەراسياسىنىڭ بەلسەندى قاتىسۋشىلارى. ءسويتىپ، مەن دە كەلىسىپ، جاقسى كورەتىن، وزىمەن كەزدەسكىم كەلىپ جۇرگەن اپكەمنىڭ ۇيىنە قوناققا بارماقشى بولدىم. ءتىپتى، ەشقانداي كۇدىگىم دە بولماعان. ۇيگە كەلىپ، كولىكتەن تۇسسەم، الدىمنان بىرنەشە اپا ورامالدارىن ۇستاپ شىعا كەلدى. ءبارىنىڭ كوزى مەندە، سول كەزدە ءبىراق ءتۇسىندىم. قارسىلاستىم، بوي بەرمەدىم، قۇربىلارىمنىڭ ءوزى ارالاسىپ تۇرعاندىقتان تۇك شىقپايتىنىن ءبىلدىم دە، كوندىم. كونگەنىمدى قايتەيىن، كىمگە تۇرمىسقا شىقپاقشى بولعانىمدى دا بىلمەيمىن عوي، قانشا جەردەن كوز جاسىمدى كولدەتىپ تۇرسام دا، كۇيەۋ جىگىتىمدى ىزدەي باستادىم. سوندا جۇرگەن ءار ەركەككە ءبىر قاراپ شىعام، وسى شىعار دەپ. ءبىراق بەردە بىرەۋى ءتۇر بەرمەيدى. «سوندا مەن كىمگە تۇرمىسقا شىعامىن؟» دەپ تۇرعانىمدا، اپالارىمنىڭ «داۋرەن قايدا، داۋرەن؟» دەگەن ايقايىن ەستىدىم. مەن عانا ەمەس، ونى ۇيدەگىلەردىڭ ءبارى ىزدەپ ءجۇر ەكەن عوي. (كۇلدى) «كەلىن قالۋعا كەلىستى، مىنا بالا قايدا، ۇيات بولدى قۇدالاردان» دەگەن اپالارىم اعاڭدى جان-جاقتان ىزدەپ ءجۇر. ءسويتىپ قايدان تاپتى دەيسىڭ عوي؟ كۇيەۋىم مەنەن ۇيالعانىنان باقشاداعى اعاشتىڭ ۇستىنە شىعىپ الىپ، تۇسپەي وتىرعان. ونى اپالارىم ۇرسىپ، تاس لاقتىرىپ، ارەڭ ءتۇسىرىپ الدى. تۇسكەن سوڭ دا اعاڭنىڭ ماعان قارايتىن بەتى جوق. ءتىپتى العاشقى ءتۇنىمىز دە قىزىق ءوتتى. (ۇيالىپ...) بىر-بىرىمىزدەن ۇيالعاننان، ەكى جاققا قاراپ جاتتىق، مەن جىلىپ جاتىرمىن، ول ۇيالىپ جاتىر. ءسويتىپ، بىر-بىرىمىزبەن سويلەسپەي، ۇيالىپ 1 ايداي جۇردىك. نە كەرەك، ءقازىر 4 بالا ءوسىرىپ وتىرعان باقىتتى اتا-انامىز. ماعان سەنىڭ اعاڭسىز كۇن جوق، ءومىر جوق»، - دەپ جەڭگەم ءبىر كۇلدىرىپ الدى.

قاشان بولماسىن، ماز-مەيرام، شات-شادىمان بولىپ ەسكە تۇسىرەتىن عاجاپ وقيعا. سەبەبى بۇل عاشىقتاردىڭ ماحابباتى «ۇيات» دەگەن ۇلى ۇعىمنان باستالعان. ۇيات بار جەردە، تاربيە بار،تۇنىق، تازا سەزىم بار. مەن ەشقاشان ۇمىتپايتىن ەستەلىككە اينالدى.

ءدال وسىنداي اڭگىمەلەردىڭ كوبىن ەستىدىم. الايدا مەنىڭ اتا-انامنىڭ ماحابباتىنان اسقان سەزىم جوق، شىعار. سەنسەڭىزدەر دە، سەنبەسەڭىزدەر دە، ول ەكەۋىنىڭ ماحابباتى ءبىر-بىرىن العاش كورگەن ساتتەن باستالعان.  سودان بەرى 25 جىل ءوتتى. 4 بالاسىن تاربيەلەپ، جەتىلدىرىپ، قۋانىشتى كۇندەرىنىڭ كۋاسى بولىپ وتىرعان مەنىڭ اتا-انام – ماحابباتقا ەڭ بەرىك ادامدار. مەن ۇلگى تۇتاتىن اسىل جاندار!

گۇلىم جاقان