تاقىرىپتىڭ ءوزى كوپتەگەن ەر ادامنىڭ نامىسىنا ءتيىپ كەتۋى ابدەن مۇمكىن. مۇمكىن ەمەس، نامىسىنا تيەدى.  الايدا قوعامدا بولىپ جاتقان وسىنداي سوراقىلىق دەۋگە كەلمەس، ارينە، كوزگە تۇرپىدەي تيەتىن دۇنيەنى ايتۋ كەرەك دەپ ويلايمىن.

كەشە دوستىق پلازا ويىن-ساۋىق ورتالىعىنا قۇربىلارىممەن كۇزدىك كيىم قاراۋعا بارعانبىز. ارنايى ستۋدەنتتەرگە ارنالعان ارزانداۋ دەگەن كيىم دۇكەندەرى  بولاتىنىن الماتىلىقتار جاقسى بىلەدى. كيىم قاراپ جۇرگەن كەزدە ءبىر قازاق جىگىتتىڭ ايەلىنىڭ سومكەسىن اسىنىپ العانىن كوردىم دە، تاڭعالدىم. قاسىمداعى قالجىڭباس قۇربىم «پودكابلۋچنيك» دەگەن وسىنداي بولادى ەكەن عوي»، ― دەدى سىڭقىلداپ. سوسىن ەرىكسىز قۇربىمنىڭ سوزىنەن كەيىن كۇلدىم.  سىرتتاي قاراپ قۇربىلارىممەن بىرگە الگى ەركەككە بىلدىرتپەي كۇلىپ، كۇلكىگە اينالدىردىق. بىزدىكى دە دۇرىس ەمەس. سەبەبى كۇلەتىندەي ەمەس، اشۋلاناتىنداي وقيعا. الگى كىسى بىزگە قاراعان كەزدە، باسقا دۇنيەگە كۇلگەندەي بولىپ ونى ۇيالتپاۋعا تىرىستىق. الايدا ايەلدىڭ سومكەسىن اسىنعان جىگىتتى اقتاۋعا دا بولادى: مۇمكىن ايەلى كيىم اۋىستىرىپ، سوسىن ايەلىنە بەرۋگە ۇمىتىپ كەتكەن شىعار، كىم بىلەدى؟!

جوعارىداعى جىگىتكە تۇسىنىستىكپەن قارادىق دەلىك. ءبىراق ءبىز دوستىق پلازادا 2 ساعات جۇرگەننىڭ وزىندە 5-6 جىگىتتىڭ ايەلدىڭ سومكەسىن اسىنىپ جۇرگەنىن كورىپ، «پادكابلۋچنيكتەر قاپتاپ كەتىپتى عوي» دەگەن ويعا كەلدىك. كوشەدە دە، دۇكەن دە سومكە اسىنىپ جۇرگەن ەركەكتەر.

ايتپاقشى وسى جەردە ەسكەرتە كەتەيىنشى، قاسىمداعى ەكى قىز دا قازاقى اۋىلدىڭ قىزدارى. مەن اتىراۋدا دۇنيەگە كەلگەنمىن. بولىنگەندىگىم ەمەس، الايدا باتىستىڭ جىگىتتەرى ۇيدە ايەلىن تىڭداپ، «قورىقسا» دا، سىرتتا جۇرگەندە وزىنشە ءوز ايەلىن كوزبەن جۇمسايتىن ەركەك بولىپ الادى. قاسىنداعى ايەلىنىڭ سومكەسىن اسىنىپ دۇكەن ارالاماق تۇگىلى، ءبىر ساتكە ۇستاپ تۇرمايدى. ءوز باسىم اتىراۋدا 15 شاقتى جىل تۇرىپ مۇندايدى كورمەپپىن. مۇمكىن بايقاماعان دا شىعارمىن... ءبىراق الماتىداعىداي كوپ ەمەس ەكەنىنە سەنىمدىمىن. بۇل تەك مەنىڭ جانە مەنىڭ كەي قۇربىلارىمنىڭ ويى. ال ەندى باسقا دا پىكىرلەردى ساراپتاپ كورەيىك.

كوشەدە جىگىت پەن قىز كەلە جاتىر. جىگىت قىزدىڭ سومكەسىن اسىنىپ العان. مەن اۋىر پاكەتتى مەڭزەپ تۇرعان جوقپىن. كادىمگى ءسىز ويلاپ تۇرعان، ايەل ادامنىڭ كۇندەلىكتى ۇستايتىن سومكەسى جايلى ايتىپ تۇرمىن. وسى كەزدەگى ءۇش ءتۇرلى قىزدىڭ پىكىرىن نازارىڭىزعا ۇسىنامىن.

1-قىز: قانداي ادەمى كورىنىس. نە دەگەن سەزىم، ماحابات دەسەڭشى!  جىگىت قىزدى قاتتى جاقسى كورىپ، سىيلايدى ەكەن. مەنىڭ دە وسىنداي جىگىتىم بولسا ەكەن.

2-قىز: مىنا جىگىت قازىردەن «پادكابلۋچنيك»، ۇيلەنگەن سوڭ قانداي بولادى ەكەن؟ قىزىنىڭ سومكەسىن اسىنىپ العان تۇرىنە قاراشى. نامىس قايدا؟ مەن مۇنداي جىگىتتى جانىما دا جولاتپاس ەدىم. ءبىرتۇرلى ەرسى عوي.

3-قىز: ماعان ءبارىبىر. ءبىراق بارلىعىنا تۇسىنىستىكپەن قاراۋ كەرەك. مۇمكىن قىز اۋىرىپ تۇرعان شىعار. بۇل ومىردە ءبارى مۇمكىن.

3 ءتۇرلى پىكىر... ءبىراق بۇل وزەكتى ماسەلە ەكەنىن ۇمىتپاۋ كەرەك. قازىرگى قوعامدا قازاق جىگىتتەرى ۇساقتالىپ كەتتى دەگەن پىكىر ءجيى ايتىلادى. مەن بۇل پىكىرگە قارسىمىن. بارلىق قازاق جىگىتتەرى ۇساقتالىپ كەتپەگەن.  الايدا جەل تۇرماسا ءشوپتىڭ باسى قوزعالمايتىنى راس قوي. وزگە ۇلتتىڭ جىگىتتەرى كوشەدە قىزدىڭ سومكەسى تۇگىلى ءوزىن كوتەرىپ جۇرسە دە مەنىڭ ەشتەڭەم كەتپەيدى. الايدا قازاق جىگىتتەرى ايەلىنە دەگەن سۇيىسپەنشىلىك پەن سىيلاستىقتى كوشەدەن گورى ۇيدە كورسەتكەنى دۇرىس. قازاق جىگىتتەرى تاريحتا الىپ، باتىر بولىپ قالعان، سىزدەر دە قورقاق، جاسقانشاق ەمەس، ەرجۇرەك، باتىر بولىپ قالىڭىزدارشى وتىنەمىن.

اسەل بولات قىزى