الەۋمەتتىك جەلىدە جىنىستىق بوپسالاۋدى باستان وتكەرگەن ايەلدەر مەن ەركەكتەر #MeToo (#مەن دە) حەشتەگى ارقىلى باستان وتكەرگەن اۋىر جاعدايىن بايانداعان. اتالمىش حەشتەگ ارقىلى الەم حالىقتارى ءوز وقيعالارىمەن ءبولىستى دەپ جازادى Qamshy.kz اقپارات اگەنتتىگى.

جاقىندا ءۇندىستاندىق جازۋشى ءوزىنىڭ تۆيتتەر پاراقشاسىندا ايەلگە جاساعان زورلىق ارەكەتىن #IdidThat (#مەن سوعان باردىم) حەشتەگى ارقىلى جازدى.

«كىنامدى مويىنداۋ وڭايعا سوقپادى. مەن وكىنەمىن جانە تۇزەلەمىن دەپ ۋادە بەرەمىن...مەن ونىڭ قورعانسىز ەكەنىن ءبىلدىم دە ءوزىمدى ونىڭ جانىندا كۇشتىرەك ەكەنىمدى سەزدىم...سەنى سۇيسەم بولا ما دەپ سۇرادىم...» دەپ جازدى مۋمباي تۇرعىنى ديەۆانگ پاتاك.

ديەۆانگ مۇنداي قادامعا ءۇندىستانداعى «BuzzFeed» پورتالىنىڭ رەداكتورى رەگي دجا ءوزىنىڭ تۆيتتەر پاراقشاسىنا، ەرلەردىڭ «مەن وزگەرەمىن. كەشىرىم سۇرايمىن» دەپ جازۋىن سۇراپ جازبا قالدىرعاننان كەيىن بارعان.

ايتا كەتەيىك، #MeToo قوزعالىسى جەكسەنبى كۇنى اكتريسا  اليسا ميلانونىڭ ءوز باسىنان وتكەرگەن جاعدايدى بايانداپ جازعان جازباسىنان كەيىن باستالدى. 1،3 ميلليون ادام اتالعان حەشتەگ ارقىلى فەيسبۋك، ينستاگرام، تۆيتتەر الەۋمەتتىك جەلىلەرىندە جازبا قالدىرعان. ايەلدەر مەن ەركەكتەر زورلىق-زومبىلىقتى، جىنىستىق بوپسالاۋدى باستان وتكەرگەنىن جازعان.

Vox جاڭالىقتار سايتىنىڭ ءجۋرناليسى ليز پلانك زورلىق جاساعان ەر ادامداردى دا سويلەتۋ كەرەك ەكەنىن جازىپ، #HimThough (#مىنە ءوزى دە) دەگەن حەشتەگپەن جازبا قالدىردى.

اراب ەلدەرىندە #مەن دە حەشتەگى پايدا بولدى. ونى كوبىنە فەيسبۋكتە قولدانادى.

يتاليا حالقى #MeToo مەن قوسا #quellavoltache (#سولكەزدە) حەشتەگىمەن جازبالار قالدىرۋدا.

گەرمانياداعى #IchAuch (#مەن دە) حەشتەگى جىنىستىق بوپسالاۋدى باستان وتكەرگەن ادامداردىڭ وقيعاسىن جيناقتاعان.

فرانسيادا #Balancetonporc حەشتەگى (#شوشقانىەلگەتانىت) ارقىلى قورلىق كورسەتكەن ادامداردىڭ ەسىمىن اتاۋعا شاقىرادى.