دايش تەرروريستىك توبى تۇرعىندارعا قاتىستى قانداي قاتىگەز ارەكەتتەردى قولداناتىنى بەلگىسىز. سيريادا رەپورتاج جاساۋ وتە ءقاۋىپتى. سوندىقتان جۋرناليستەر دايش باسىپ العان جەرلەرگە كوپ بارا بەرمەيدى. الايدا ءوز ءومىرىن قاتەرگە تىگىپ سيرياداعى جاعداي تۋرالى اقپاراتتى جۋرناليستەرگە جەتكىزىپ وتىرعان تۇرعىندار بار. بي-بي-سي كوررەسپوندەنتى سوڭعى ءۇش ايدا راككا تۇرعىنىمەن حابارلاسىپ تۇردى. ول كۇندەلىك جازادى. وندا دايش سودىرلارى باسىپ العان قالاداعى تۇرعىنداردىڭ جاعدايى باياندالادى.
كۋاگەر كۇندەلىگى:
بۇگىن جەكسەنبى. بۇل كۇنى ءبىز ادەتتە نامازدان كەيىن دالاعا جينالىپ، ۇزاق اڭگىمەلەسەتىنبىز. ەندى بۇلاي ىستەمەيمىز. قوعامدىق ورىنعا كەلگەن كەز كەلگەن ادامدى دايش-قا قارسى ارەكەت ەتىپ ءجۇر دەپ ايىپتاۋى مۇمكىن.
مەن الاڭداعى ءبىر توپ ادامنىڭ جانىنان ءوتىپ بارا جاتىرمىن. ولارعا جاقىنداعىم كەلمەيدى. سەبەبى ءبىر توپ ادامعا بىرەۋدىڭ باسىن شاۋىپ جاتقانىن كورۋگە ماجبۇرلەپ جاتقان بولار.
جوق! قۇدايعا شۇكىر. وسى جولى ەشكىمدى ولتىرمەدى. ءبىر جىنىستى اداممەن بايلانىسقان ادامدى جازالاماقشى ەكەن.
ەرتەڭ مەن قايتا جۇمىسقا بارامىن. جاڭا كۇن. جاڭا اپتا. ءبىزدى قۇتقارادى دەگەن ۇمىتپەن جاڭا كۇندى باستايمىن.
مەن سىزدەرگە دايش-تىڭ العاش قالاعا كەلگەن كۇن تۋرالى ايتىپ بەرگىم كەلەدى. بۇل – انالار كۇنى بولاتىن. مەن اسكەري ۇشاقتىڭ دىبىسىن ەستىدىم. بىردەن ۇيگە جەتتىم. سول كۇنى اعالارىم مەن اپكەلەرىمنىڭ باسىن قوسىپ، شاعىن وتىرىس جاساماق بولعانبىز.
مەن ۇيگە تاكسيمەن جەتكەندە اۋانى ءتۇتىننىڭ ءيىسى جايلاپ كەتتى. ۇكىمەتتىڭ قورعانىس كۇشى ءبىزدىڭ كوشەلەرگە بومبا تاستاپتى. كوشەدە جەدەل جاردەم مەن قۇتقارۋشىلار ءجۇردى. ءبىرى ولگەن ادامدى ءۇيىندىنىڭ استىنان شىعارىپ الىپ جاتسا، ەندى ءبىرى جارالانعاندارعا كومەكتەسىپ جاتتى. كورشىلەرىمنىڭ ءبىرى اتا-انام جارالانىپ، ولاردى ورتالىق اۋرۋحاناعا اكەتكەنىن ايتتى.
اۋرۋحاناعا جەتكەندە وندا قان مەن ءولىمنىڭ ءيىسى مۇڭكىپ تۇردى. ەدەندە كوز جۇمعانداردىڭ دەنەسى جاتتى. اتا-انامىزدى سولاردىڭ اراسىنان تابىڭدار دەدى. مەن اكەمدى كورىم. «اناڭدى انا جەردە ەمدەپ جاتىر، ءبىراق ول جەرگە ازىرگە بارماڭدار» دەگەن داۋىس ەستىلدى. ەكى ساعات ءوتتى. دارىگەر شىقتى. مەن وعان جارالانعان ادامنىڭ مەنىڭ انام ەكەنىن ايتتىم. «ونىڭ ءومىرىن ساقتاپ قالا الدىم، ءبىراق ونىڭ جاعدايى اۋىر» دەدى دارىگەر.
كوكونىس پەن جەمىس-جيدەك ساتاتىن كورشىم ماعان قول ۇشىن بەردى. ول ماعان جۇمىس ۇسىندى. مەن بىردەن كەلىستىم. مەن دۇكەندە وتىرىپ دالادان وق اتىلعانىن ەستىدىم. ادامداردىڭ بارلىعى قاشا باستادى. دوسىم مەنىڭ قولىمنان ۇستاپ تۇرىپ دايش-تىڭ قالانى باسىپ العانىن ايتتى.
مەن دالادا تەمەكى شەگىپ تۇرعاندا بۇعان دەيىن كورمەگەن بەيتانىس ەر ادام كەلىپ تەمەكى تارتۋعا تىيىم سالىنعانىن ايتتى.
ايەلىممەن كوشەدە كەلە جاتساق، بىرەۋ ايەلدەرگە پارانجاسىز جۇرۋگە بولمايدى دەپ ەسكەرتۋ جاسادى.
بارلىق قالاعا ەكى ادامنىڭ ءولىم جازاسىنا كەسىلگەنى حابارلاندى. كوشەدە ەكى ەر ادامنىڭ قولىن، كوزدەرىن بايلاعان. ماسكا كيگەن ادام ۇكىم وقىدى.
— حاسان! ۇكىمەت جاعىندا كۇرەسىپ ءجۇر. جازا – باسىن شابۋ. ايسا! مەديا بەلسەندى. شەتەلدىك اگەنتتەرمەن سويلەستى دەپ ايىپتالادى. جازا – باسىن شابۋ.
ولاردىڭ باستارىن قىلىشپەن شاۋىپ الدى.
مەن كوشەدە كەلە جاتىپ داۋىسىمدى قاتتى شىعارىپ ءوز نارازىلىعىمدى ءبىلدىردىم. سول ۋاقىتتا دايش سودىرلارى مەنى ۇستاپ الدى. ولار مەنى ءوز باسقارماسىنا اكەتتى. مەن ءوزىمدى اقتاۋعا تىرىسقانىممەن ول ارەكەتىمنەن ەش ناتيجە شىقپادى. قىرىق رەت دۇرە سوزۋ جازاسى كەسىلدى.
