«اكەم جاۋدان قايتپاعان، شەشەم شايدان» دەمەكشى، ءبىزدىڭ پايىمىمىزشا دا الىگە شايدان قايتقان قازاق جوق. بۇل ويدىڭ ءوزىن قاشانعى ءبىر ادەتىمىزشە قىزىل شايدان قىبىمىز قانىپ، سوراپتاپ وتىرعاندا ويلايتىنىمىز – تاعى شىندىق! سوسىن عوي، سوسىن وسى ءبىر سۋسىن جايلى شەشىلىپ كەپ، كوسىلە سويلەپ وتىرعانىمىز.
شايدى ايتپاقشى، قاسقىردان كەيىن ەت بىتكەنگە ەسى كەتەتىن قازاقتىڭ شارتاراپقا «شايشىل» اتى دا ەپتەپ تانىلا باستاعانعا ۇقساڭقىرايدى. ولاي دەيتىنىمىز: «Bigpicture.ru» سايتىنىڭ سالا قۇلاش رەيتينگىسى قازاقستاندى شاي تۇتىنۋى ەڭ كوپ ون ەلدىڭ قاتارىنا قوسىپ قويدى («قوسىپ قويدى» دەيتىنىمىز: ستاتيستيكا اتاۋلىعا سەنىمنىڭ كەتكەن سيقى عانا – رەد.).
مەيلى، نە دەسە دە، قۋاناسىڭ! اتى شىقپاي جەر ورتەپ جۇرگەن ەلدەرگە قارايسىڭ دا «ءتاۋبا، ءتاۋبا!» دەيسىڭ كەلىپ-كەلىپ! ونىڭ بەر جاعىندا «ءىشۋ» دەگەن قانداي تاماشا ەستىلەدى دەسەڭىزشى؟! «ويباي، ويباي! ىشكەننىڭ نەسى جاقسى؟» دەيسىز بە؟ بۇل كۇندە ءىشىپ قۇلاعان، «جەپ» قۇلاعاننان اجەپتاۋىر جاقسى قىلىق بولىپ تۇرعان جوق پا، ءتايىرى؟!
نانباساڭىز، كەشە عانا نازاربايەۆتىڭ الدىندا زىر جۇگىرىپ، ول كىسىنىڭ ەمەس-اۋ، حالقىنىڭ الدىندا زىر جۇگىرىپ جۇرگەن احمەتوۆتىڭ جىلقى جىلىندا ناكاۋتقا كەتۋى: قۇرىپ قالعىر، «جەگەننەن» دەسەدى! ايتەۋىر، قىلمىس ۇستىندە بۇرا تارتقىزباي كوزبەن كورىپ، قولىمەن ۇستاماعاسىن، «جەپتى» دەگەن سوزدەن حالىق تۇگەل جەري قويمادى. ونىڭ ۇستىنە، سەكەڭنىڭ جەگەندە دە بىرەۋ-مىرەۋدىڭ عانا نەرۆىسىن جەپ كەتكەنىن، قوڭىر توبەل قازاق تاعى ىشتەي ءبىلىپ ءجۇردى..؟
كوردىڭىز بە؟ «جەۋ» دەگەن تەگى قانداي جامان سوزگە اينالعان. بولماسا، جۇرت بىتكەن جەگەننىڭ جەلكەسىنە ءمىنىپ: «جەمەنقور» دەمەس پە ەدى، كىم ءبىلسىن؟! زامانىندا «ىشىپ-جەپ» دەپ، «ءىشۋ» سوزىمەن قوسارلانا ءتاپ-تاۋىر ايتىلسا دا، بۇل كۇندە ەكى ءسوزدىڭ اراسىن جالعاۋ – ەكى ەلدىڭ اراسىن جالعاۋدان دا اۋىر بوپ تۇر. ويتكەنى، حالىقتىڭ «قالاۋلى» دەگەن دەپۋتاتى قالتاسىن قاعىپ، قارجىسىن جەسە، ال سول دەپۋتات اتاۋلىنىڭ ايدىك وپپوزيسيا «قانىن قاقتاپ ءىشىپ» بولدى ەمەس پە؟
P.S.: مىنە، وسى سەبەپتى دە، ءبىزدىڭ قوعامدا «جەگەننىڭ» جىرىن قاشاندا «ىشكەن» ايتادى!
قوزىباي قۇرمان
