ءيا، كەز كەلگەن ادامنىڭ وزىندىك اقيقاتى بار. الايدا كوپشىلىگىمىز ءوزىمىزدىڭ جانىمىزدى جارالايتىن اقيقاتتى قابىلداماي، وعان قاتىستى سەبەپ تاۋىپ الاتىنىمىز دا بار. اقيقاتتى ءدال سول قالپىندا قابىلداۋ كوپشىلىگىمىزدىڭ قولىمىزدان كەلە بەرمەيدى. ومىردەگى كەي قيىندىقتى جەڭىلدەتەتىن، جۇيكەنى تىنىشتاندىراتىن اقيقاتتىڭ ءتىزىمىن Qamshy.kz اقپارات اگەنتتىگى وقىرمان نازارىنا ۇسىنادى.

 نەگىزىنەن تانىسىڭىزدىڭ نەمەسە جانىڭىزعا جاقىن دەپ ساناعان جاننىڭ حابارلاماڭىزعا جاۋاپ بەرە المايتىنداي قولى بوس بولماۋى مۇمكىن ەمەس. ول ادام ءسىزدىڭ حابارلاماڭىزعا سانالى تۇردە جاۋاپ بەرگىسى كەلمەگەندىكتەن، سىزگە جاۋاپ جازبايدى. وسى اقيقاتتى «قولى بوس بولمادى»، «ۇمىتىپ كەتكەن شىعار»، — دەگەن سىلتاۋ ارقىلى بۇرمالاۋدىڭ پايداسى جوق. ءيا ول ءسىز ءۇشىن ەرەكشە ادام بولۋى مۇمكىن، الايدا ءسىز «ول ادام ءۇشىن كىممىن؟»، — دەپ وز-وزىڭىزگە سۇراق قويىپ كوردىڭىز بە؟   ەگەر ول ءسىزدى ەرەكشە ادام دەپ ەسەپتەسە، جاقىن ادام دەپ ساناسا كەز كەلگەن جاعدايدا «قولىم بوس ەمەس، كەيىنىرەك حابارلاسام»، — دەپ بولسا دا جاۋاپ جازاتىن ەدى. كىم تۋرالى ايتىپ وتىرعانىمدى سەزىپ، ويلاپ تۇرسىز عوي، ءيا؟ ءيا، ءدال سول ادام تۋرالى ايتىپ وتىرمىن. 

كەز كەلگەن ادام ءوزىمشىل ەمەسپىن دەسە دە، ەڭ الدىمەن ءوزىن ويلايدى. ءاربىر ادام ءوزىمشىل ەكەنىن سىرتقا كورسەتپەيدى، ارينە. الايدا كەز كەلگەن جان بەيسانالى تۇردە ءوزىنىڭ قامىن ويلايدى.  بۇل – وتە دۇرىس شەشىم، ورىندى كوزقاراس. سەبەبى ەگەر ءسىز ءوزىڭىزدى ويلاي الماساڭىز، ءسىزدى ەشكىم ويلامايدى. ەڭ الدىمەن ءوز جۇمىسىڭىزدى اياقتاڭىز، كەيىن وزگەلەرگە كومەكتەسىڭىز. سونىمەن بىرگە وزگەلەرگە «جوق»، — دەپ ايتۋدى ۇيرەنىڭىز. سەبەبى بۇل تابىسقا جەتكەندەردىڭ ەڭ باستى ۇستانىمى. ءسىز وزگەلەرگە «جوق»، — دەپ ايتا المايتىن بولساڭىز، ءسىزدىڭ تابىسقا جەتۋىڭىز ەكى تالاي. مەن وزگەلەرگە «كومەكتەسپە»، — دەپ وتىرعان جوقپىن. كومەكتەسىڭىز، سەبەبى ءومىر – بۋمەرانگ. الايدا وزىڭىزگە كومەكتەسسەڭىز عانا وزگەلەرگە قول ۇشىن سوزا الاسىز. مىسالى ءسىز وز-وزىڭىزگە ىشتەي جانە سىرتتاي كومەك كورسەتىپ، تابىستى كاسىپكەرگە نەمەسە قىزمەتكەرگە اينالساڭىز، وزگەلەرگە كومەكتەسۋىڭىز جەڭىلىرەك ءارى كوبىرەك بولادى. سونىمەن بىرگە ءسىزدى پايدالاناتىن ادامدار دا بولادى. وسىنى دا ەستەن شىعارماڭىز. كومەك كورسەتىڭىز، ءبىراق ۇنەمى ەمەس.

ءسىز ەشقاشان بارلىق ادامعا ۇناي المايسىز. بۇل – اقيقات. قاي كەزدە دە ءسىزدىڭ ومىرىڭىزگە ارالاسىپ، كەرەك ەمەس جەرگە ءوزىنىڭ ورىنسىز پىكىرىنىن سىن رەتىندە تىقپالاپ وتىراتىندار تابىلادى. سوندىقتان كوپشىلىكتىڭ پىكىرىنە ءمان بەرمەڭىز. ءوزىڭىز دۇرىس دەپ ەسەپتەيتىن جولدى تاڭداڭىز، ىشكى تۇيسىگىڭىزگە سەنىڭىز. ناقتى ايتقاندا، جۇرەك قالاۋىڭىزدى ورىنداڭىز، سەبەبى جۇرەگىڭىز ءسىزدى ەشقاشان الدامايدى.

قوعام، ۇكىمەت، اتا-انا، جالپى ايتقاندا الەم ءسىزدىڭ جاماۋىڭىزدى جاماۋعا مىندەتتى ەمەس. ءسىز وزگەلەرگە كومەك كورسەتۋىڭىز مۇمكىن. ءبىراق ءوزىڭىز ءۇشىن. ءسىز كومەكتەسكەن ادام كەلەسىدە سىزگە قول ۇشىن سوزۋعا مىندەتتى ەمەس. ۇكىمەت سىزگە جۇمىس تاۋىپ بەرۋگە، ءۇي سالىپ بەرۋگە مىندەتتى ەمەس. بارلىعىن ءوز كۇشىڭىزبەن جاساۋىڭىز كەرەك. سەبەبى قۇرباندىقسىز، تاۋەكەلسىز ەشتەڭەگە قول جەتكىزە المايسىز.

ءسىزدىڭ ءومىرىڭىزدى سىزدەن باسقا ەشكىم وزگەرتە المايدى. ءسىز ءوز ءومىرىڭىزدى جاقسى جاعىنا قاراي وزگەرتەسىز نەمەسە ءوزىڭىزدى قۇردىمعا تاستاي سالاسىز. ءومىردى وزگەرتۋ ەشقاشان كەش ەمەس ەكەنىن جادىڭىزدا ساقتاڭىز. ءسىز ءوز ءومىرىڭىزدىڭ قوجاسىسىز. ەگەر ءسىز قاندايدا ءبىر جەتىستىكتى قاتتى قالاپ، تالپىنساڭىز، مىندەتتى تۇردە قول جەتكىزەسىز. مۇمكىن ەمەس دۇنيە جوق، بۇل ومىردە ءبارى مۇمكىن.

تىزىمدەگى ەرەجەلەردى كۇندىلىكتى تاڭەرتەڭگىسىن ويانا سالا وقىپ ءجۇرىڭىز. سوندا ءسىز جەتىستىككە جەتەسىز. سەنىڭىز... ۇمىتتەنىڭىز... ارمانداڭىز... ارماندار ورىندالادى!