26 قاراشادا گرۋزيا استاناسى تبيليسيدە ون بەسىنشى «بالالار ەۆروۆيدەنيەسى» ءان بايقاۋىنىڭ فينالى وتەدى دەپ حابارلايدى Qamshy.kz اقپارات اگەنتتىگى. جاس ارتىستەر EuroClub-تا باقتارىن سىنايدى.

بايقاۋ بارىسىندا تبيليسي قوناقتارىنا ارنالعان مادەني شارالار وتەتىن كلۋب ەۆروۆيدەنيە قاتىسۋشىلارىنا مەن جانكۇيەرلەرىنە ارناپ قاتىسۋشى ەلدەردىڭ ءتۇرلى ساۋىقكەشتەرىن، فاناتتارمەن كەزدەسۋلەر وتكىزىپ، تانىمال انشىلەردى ساحناعا شىعارادى. جاس قازاقستاندىقتاردىڭ مۇنداي مۋزىكالىق شارا اياسىندا ونەر كورسەتۋى ءبىزدىڭ ەلىمىزدىڭ الەمدەگى ەڭ ءىرى ۇلتتىق حابار تاراتۋ ۇيىمى ەۋروپالىق حابار تاراتۋ وداعىنا (European Broadcasting Union، EBU) قوسىلۋعا قاتىستى جوسپارىن جۇزەگە اسىرۋدىڭ العاشقى قادامى بولىپ ەسەپتەلەدى. 

ەۆروۆيدەنيەدە قازاقستان اتىنان ونەر كورسەتەتىن جاس تالانتتىڭ ءبىرى مۇحاممەد–ءالي جۇگىنىسوۆ. ول 14 جاسقا ەندى تولسا دا، حالىقارالىق سايىستاردىڭ لاۋرەاتى اتانعان، گرەسيادا وتكەن حالىقارالىق "Paradise Holiday" فەستيۆالىنىڭ گران-پري جۇلدەگەرى، قازاقستاننىڭ ماقتانىشى. 11 جاسىندا حالىقارالىق  «دەتسكايا نوۆايا ۆولنا – 2014» بايقاۋىنان 3 ورىن يەلەنگەن، ال 2016 جىلى ماسكەۋدە وتكەن يگوريا كرۋتويدىڭ «بيتۆا تالانتوۆ» بايقاۋىندا گران-پري جەڭىپ العان.

«دەتسكايا نوۆايا ۆولنا – 2015» بايقاۋىندا «گاۋھار قول» سىيلىعىن يەلەنگەن دانەليا تولەشوۆا دا بايقاۋعا قاتىسادى. دانەليا وسى ۋاقىتقا دەيىن تالاي مارتە فەستيۆالدەرگە قاتىسىپ،  ۆالەريا، جاسمين، نيۋشا، Lido سياقتى انشىلەرمەن قوسىلىپ ءان ايتقان. ال جاقىندا تالانتتى ءانشى ۋكراينادا وتكەن «گولوس. ءدىتي» مۋزىكالىق بايقاۋىنىڭ قاتىسۋشىسى اتانىپ، عالامتوردى ءدۇر سىلكىندىردى.    دەمي لوۆاتونىڭ Stone Cold ءانىن وتە شەبەر ورىنداپ شىققان قىز بالا كورەرمەندەردى دە، قازىلاردى دا تاڭعالدىردى. قازىلار القاسىنىڭ مۇشەلەرى ءتىپتى العاشقى سەكۋندتان-اق ورىندىقتارىن بۇرىپ الدى. ونىڭ Youtube سايتىنداعى بەينەجازباسى ميلليوننان استام كورسەتىلىم جينادى.

تاعى ءبىر تالانتتىڭ ەسىمى – الۋا سەرىكحانوۆا – كوپتەگەن رەسپۋبليكالىق بايقاۋلاردىڭ جۇلدەگەرى.  ساحناعا ءۇش جاسىنان باستاپ شىققان. بيىل كوكتەمدە بەلارۋس ەلىندە وتكەن «زولوتىە كليۋچي» بايقاۋىندا ءبىرىنشى ورىن الدى.

ماريا زاتۆارنيسكايا جانە مەرحات جىلقىبايەۆ تا ەۆروۆيدەنيە اياسىندا قازاقستاننىڭ نامىسىن قورعايدى. ولار ءاليا نازاربايەۆا ۇيىمداستىرعان «بالا داۋىسى» ءبىرىنشى ۇلتتىق بالالار ءان بايقاۋىنىڭ جارتىلاي فينالىنا دەيىن جەتكەن.
12 جاستاعى ماشا زاتۆارنيسكايا دارىندى بالالارعا ارنالعان مۋزىكالىق مەكتەپ-ينتەرناتتا ۆوكال جانە فورتەپيانودان ءدارىس الادى. 13 جاستاعى مەرحات جىلقىبايەۆ پاۆلودار وبلىسىنىڭ «زاريا» اۋىلىندا تۇرادى. مەرحات دومبىرانىڭ قۇلاعىندا وينايدى جانە مەكتەپتىڭ كوڭىلدى تاپقىرلار كلۋبىنىڭ مۇشەسى.