ارمانگۇلدىڭ بالالار اۋرۋحاناسىندا جۇمىس ىستەگەنىنە كوپ ۋاقىت بولمادى. الايدا، نەبارى 5 ايدىڭ ىشىندە بالالاردىڭ ءولىمىن دە، تاعدىر تالكەگىمەن سال بولىپ قالعان بالالاردى دا، دۇنيە ەسىگىن اشپاي جاتىپ ءتۇرلى اۋرۋعا شالدىققان سابيلەردى دە، بالاسى اۋرۋ بولىپ تۋعاندىقتان ونى تاستاپ كەتىپ جاتقان تاس باۋىر اتا-انانى دا، جارىق دۇنيەگە كەلگەننەن كۇننەن باستاپ بىردەن قيىندىقپەن بەتپە-بەت كەلگەن اۋىر تاعدىرعا دا كۋا بولدى. تالاي اتا-انانىڭ كوز جاسىن دا، قۋانىشىن دا كوردى.

وقۋدى جاڭا عانا ءتامامداعان جاس قىزعا باستاپقى كەزدە مۇنىڭ بارلىعى قورقىنىشتى تۇستەي كورىندى. ءار وتباسىنىڭ قايعىسىن جۇرەگىنە جاقىن قابىلدادى. سولارمەن بىرگە جىلاپ، بىرگە كۇلدى. اۋرۋحانا - ءومىردىڭ اششى شىندىعىن، ۇشى قيىرى جوق تەڭىزدەي كورىنەتىن ءومىردىڭ ولشەۋلى ەكەنىن اركەز كوزگە شۇقىپ كورسەتىپ تۇراتىن جانە باقىت، قۋانىش، شاتتىق، جەتىستىك، ماحاببات، دوستىق سەكىلدى ءومىردىڭ ءتۇرلى-تۇستى، ادەمى تۇسىنا كەرەعار كۇن مەن ءتۇن سەكىلدى قاراڭعىلىقتىڭ بار ەكەنىن ەسكە سالىپ تۇراتىن جەر سەكىلدى. ءار بۇرىشى ادامنىڭ كوز جاسىن، قيىندىعىن، اۋرۋىنان ارىلعانداعى قۋانىشىنان سىر شەرتىپ تۇرعانداي. ارمانگۇل اۋرۋحانانى ءدال وسىنداي كۇيدە كورەدى، سەزىنەدى.

ارمانگۇل العاش بالالار اۋرۋحاناسىنا كەلگەندە ءبىر جاعدايدىڭ كۋاسى بولدى. سول جاعداي ونىڭ ماڭگى ەسىندە قالدى.

اۋرۋحاناعا 18 جاستاعى قىز شاراناسىمەن ءتۇستى. جاپ-جاس قىزدىڭ تۋىس، تۋعاندارى جوق پا الدە ونىڭ بوسانعانىن بىلمەي مە، ايتەۋىر ونىڭ ارتىنان ەشكىم  ىزدەپ كەلمەدى.

ارمانگۇل ءۇشىن ادەتتەگى كۇن باستالدى. تاڭعى اس، ۇيدەن جۇمىسقا دەيىن سول باياعى كۇندە كورەتىن جول. الايدا اۋرۋحاناداعى جاعداي ادەتتەگىدەي ەمەس ەدى. قىزمەتكەرلەردىڭ بارلىعى ءارى-سارى. اۋرۋحاناعا سابيىمەن تۇسكەنىنە 3 كۇن بولعان ايەل قىزىن تاستاپ اۋرۋحانادان قاشىپ كەتىپتى. ارمانگۇل 18 جاستاعى قىز بالالىق جاساپ كەتىپ قالعان بولار دەپ ۇمىتتەندى. ونى كەشكە دەيىن كۇتتى. وكىنىشكە قاراي، كوكەك انا بالاسىن ىزدەپ كەشكە دە، ەرتەسى كۇنى دە، ودان كەيىن دە كەلمەدى.

شارانا اناسىن ىزدەپ كۇنى بويى جىلادى. اۋرۋحانا قىزمەتكەرلەرى ولىمگە دە، بالالاردىڭ كوز جاسىنا دا ابدەن ەتى ۇيرەنىپ كەتكەن. سوندىقتان ونى كۇنى بويى جۇباتىپ، كوڭىلىن اۋلاعان ەشكىم بولمادى. ارمانگۇل  قولى بوساعاندا سابيگە قارايلاستى، الايدا جۇمىستىڭ كوپتىگىنەن كۇنى بويى جانىندا بولا المادى.

ارمانگۇل كەشكە جۇمىستان كەيىن ءسابيدى ءبىر كورىپ كەتۋ ءۇشىن كەلدى. ارادا 3، 4 كۇن ءوتىپ كەتكەن. ءسابي بۇرىنعىداي جىلامايدى. كەلەسى كۇنى دە ءدال سولاي. اناسىنان ايىرىلعان كۇندەرى توقتاۋسىز جىلاعان بالا، بىرنەشە كۇن ءۇنسىز جاتىر. بۇل ءتىپتى ءسابيدىڭ تابيعاتىنا جات. دۇنيە ەسىگىن ەندى عانا اشقان ءسابي ەندى ونى ەشكىم جۇباتپايتىنىن كىشكەنتاي جۇرەگىمەن سەزگەن سەكىلدى. ول بۇل ومىردە جالعىز. ءومىردىڭ سوقپاعىن، اۋىرتپالىعىن دا ەندى جالعىز ءوزى كوتەرەتىنىن تۇسىنگەندەي. ونىڭ ەركەلىگىن كوتەرىپ، ىڭگالاعان داۋىسىن ەستي سالا جانىنان تابىلاتىن اناسى ونى تاستاپ كەتكەنىن ۇققانداي.

ارمانگۇل ءسابيدىڭ وسى ءبىر جاعدايىن كورىپ جۇرەگى ەلجىرەپ كەتتى. كوزىنە جاس الدى. ومىرگە كەلگەنى كەشە عانا، الايدا ونىڭ اششى ءدامىن سەزىپ ۇلگەرگەنى كوڭىلگە كىربىڭ ءتۇسىردى. ەڭ سوراقىسى، قاشقىن اناسى «بالادان باس تارتامىن» دەپ جازباعاندىقتان، ونى ەشكىم اسىراپ تا الا المايدى ەكەن. 

ارمانگۇل ۋاقىت وتە كەلە بالاسىنان باس تارتقاندار مەن 18 جاستاعى كوكەك انا سەكىلدى قاشىپ كەتكەندەردىڭ ءسابيى دە جالعىز قالعانداي كۇي كەشەتىنىن ءتۇسىندى. تاستاندى سابيلەر كوپ جىلامايتىنىن بايقادى. سەبەبى ولاردى جۇباتاتىن ەشكىمى جوق ەكەنىن كىشكەنتاي جۇرەگىمەن سەزەدى.

اسەم المۇحانبەت