سىيلىق تاڭداۋ ەشقاشان وڭاي شارۋا بولعان ەمەس. جانىڭىزعا جاقىن ادامعا توسىن سىي جاساپ، قۋانتقىڭىز-اق كەلەدى. الايدا، ۇناتا ما، ۇناتپاي ما؟ مۇنداي سىيلىق بەرۋ جاقسى ىرىم با؟ ءداستۇر نە دەيدى؟ وسى سىندى جان-جاقتان انتالاعان سۇراقتار كوڭىل-كۇيىڭىزدى سۋ سەپكەندەي باسىپ تاستايدى. وسىنداي داۋ-دامايلى سىيلىقتاردىڭ ءبىرى – ساعات. بىلاي قاراعاندا، ساعاتتان اسقان كەرەمەت سىيلىق جوق سياقتى. ءبىراق، ۇلكەندەر نەمەسە قۇربى-قۇرداستارىڭىز "جوق، ساعات سىيلاۋعا بولمايدى، بۇل جامان ىرىم" دەگەندى كوپ ايتىپ جاتادى. مۇنىڭ سىرى نەدە ەكەنىن بىلگىڭىز كەلە مە؟ بىزبەن بىرگە بولىڭىز!
ءبىزدىڭ قازەكەڭ ساعاتتى ايىرىلىسۋدىڭ نىشانى، ساعات توقتاعاندا، سەندەردىڭ دە قارىم-قاتىناستارىڭ توقتاپ قالادى دەپ ىرىمدايدى. ۇلكەندەر جاستارعا جاقىن ادامدارىڭا ساعات سىيلاماعانىڭ ءجون دەگەن كەڭەستەر بەرىپ تە جاتادى.
ءتىپتى، ەل اۋزىندا ۇيلەنۋ تويىنا تارتۋ ەتىلگەن ساعات جاس جۇبايلار نەكەسىنىڭ تەز بۇزىلۋىنا الىپ كەلەدى، باقىتتى ادامدار ساعات تاقپايدى دەگەن سوزدەر دە از ايتىلمايدى. ساعات سىيلاۋعا بولمايدى دەگەن نانىم-سەنىم بىزدەرگە قىتايدان كەلگەن.
وسى ەلدىڭ تۇرعىندارى سىيعا الىنعان ساعات – جەرلەۋ راسىمىنە شاقىرۋ دەپ تۇسىنەدى ەكەن (كىمنىڭ ەكەنى بەلگىسىز). ىرىم ءبىرتۇرلى ەستىلگەنىمەن، كوپ حالىق بۇعان ءشۇباسىز سەنەدى. ىرىمنىڭ ەكىنشى ءبىر سەبەبى ەجەلدەن بەرى سىيلىققا وتكىر زات بەرۋگە بولمايدى دەگەن تىيىمدا جاتىر. پىشاققا قاتىستى مۇنداي تىيىمداردان ءوزىڭىز دە حاباردار بولارسىز.
وتكىر ءتىلدى ساعاتتار ءدال وسى تىيىم سالىنعان زاتتاردىڭ قاتارىنا جاتادى. جورامالعا كەلىسەر بولساق، وتكىر زاتتاردى سىيلاۋ ارقىلى سول اداممەن قارىم-قاتىناسىڭىزدى ءوز قولىڭىزبەن قىرىققان بولاسىز.
ارينە، مۇنىڭ ءبارىن دە ىرىمشىل ادامدارعا ارنالعان مالىمەتتەر دەپ قابىلداعان دۇرىس. سونداي-اق مۇنداي نانىمداردان حابارى بار تانىسىڭىزعا ساعات سىيلار بولساڭىز، رەنجىتىپ الۋىڭىز ابدەن مۇمكىن. ەندى ءبىر جاعىنان، ءبارى دە شىن كوڭىلمەن بەرىلگەنىن ەسىڭىزدەن شىعارماعانىڭىز ءجون. سوندىقتان، جوعارىداعى ىرىم-تىيىمدارعا سەنۋ دە، سەنبەۋ دە ءوز قۇزىرىڭىزدا!
