14 جەلتوقساندا ق ر ۇلتتىق كىتاپحاناسىندا «قاز داۋىستى... بي» دەرەكتى ءفيلمىنىڭ تۇساۋكەسەرى وتەدى، دەپ جازادى Qamshy.kz اقپارات اگەنتتىگى.

بيىل قازاق ورداسىنىڭ كەمەڭگەر ءبيى، مەملەكەت جانە قوعام قايراتكەرى قاز داۋىستى قازىبەك ءبيدىڭ 350 جىلدىق مەرەيتويى قاراعاندى وبلىسىندا اتالىپ ءوتتى.

وسىعان وراي قاراعاندى وبلىسى اكىمشىلىگىنىڭ باستاماسىمەن ق ر مادەنيەت جانە سپورت مينيسترلىگىنىڭ تاپسىرىسى بويىنشا شاكەن ايمانوۆ اتىنداعى «قازاقفيلم» كينوستۋدياسى قىسقا مەرزىمدە «قاز داۋىستى... بي» اتتى دەرەكتى فيلم ءتۇسىردى. فيلم رەجيسسەرلەرى عازيز ناسىروۆ پەن ءانشى، ونەرتانۋشى ەرلان تولەۋتاي.

ءفيلمنىڭ ءتۇسىرىلىم بارىسى جايىندا ەرلان تولەۋتاي جازدى. قازىبەك ءبيدىڭ مەملەكەتشىل بيىك تۇلعاسىن دەرەكتى فيلم ارقىلى سارالاۋعا تىرىسقان رەجيسسەرلەر ءۇشىن قازىبەك ءبيدىڭ ءومىرى مەن قىزمەتىن كينو تىلىندە رەكونسترۋكسيالاۋ وڭايعا سوقپاعان. ول ءۇشىن ەرلان تولەۋتاي مەن عازيز ناسىروۆ قازىبەك بي جايلى ەل اۋزىنداعى اڭىزدار مەن رەسەي جانە جۇڭگو مۇراعاتتارىندا ساقتالعان جازبا دەرەكتەردى جيناعان.

«بۇل ارينە وڭايعا سوققان جوق. "دەليكا" جول تالعامايتىن جاپوننىڭ كولىگىمەن 8 000 شاقىرىمنان اسا جول ءجۇرىپ، ءبىر شەتى پاۆلودار، قاراعاندى ءبىر شەتى وڭتۇستىك قازاقستان وبلىسى، قىزىلوردا وبلىسىنىڭ شەگىنە دەيىن بارىپ قايتتىق. از ۋاقىتتىڭ ىشىندە 20 ساعاتتاي ۆيدەو ماتەريال ءتۇسىرىپ ۇلگەردىك. ارينە، ساپارىمىز قاۋىپ-قاتەرسىز بولعان جوق دەپ ايتا المايمىز.

ماسەلەن، قاز داۋىستى قازىبەك بي 1764 جىلى اقپان ايىندا قايتىس بولعاندا قىس قاھارلى، قار قالىڭ بولعاندىقتان، جەر اياعى كەڭىگەنشە دەپ بالاسى بەكبولات پەن ەدىگە بيلەر ۇلى ءبيدىڭ ءمايىتىن سورەگە ساقتاۋعا ۇيعارعان. وسى قىس ايىندا بولعان وقيعانى سۋرەتتەۋ ءۇشىن الاتاۋدىڭ ءبىر اسقار بيىگى - 3800 مەترلىك "مولودەجنىي" اتالاتىن بيىك شىڭىنا شىعىپ، التى قانات ءۇي تىكتىك. ويتكەنى مەزگىل تامىزدىڭ سوڭى، الاتاۋعا قار ءتۇسىپ ۇلگەرمەگەندىكتەن، وسىلاي جاننان بەزىپ، ماڭگى مۇزدىقتارعا كوتەرىلۋگە ءماجبۇر بولدىق. الاتاۋدىڭ قۇلاما جارتاستى، ءتۇپسىز شىڭىراۋلارىنان اسىپ وتكەنىمىزدىڭ ءوزى ءبىر عاجايىپ حيكايا. ءبارىن جازىپ وتىرۋعا ۋاقىت تاپشى»، - دەپ جازدى ءانشى.

ءفيلمنىڭ باستى كەيىپكەرلەرىنىڭ ءبىرى، بەيبىتشىلىك كۇرەسكەرى، سۋرەتشى كارىپبەك كۇيىكوۆ

ءتۇىسىرىلىم بارىسى قيىنعا سوققانىمەن قىسقا مەرزىمدە تۇسىرىلگەن فيلم الماتى كورەرمەندەرىنە جول تارتپاق.