الماتىدا حالىقارالىق تۇركسوي ۇيىمى جانە ءال-فارابي اتىنداعى قازاق ۇلتتىق ۋنيۆەرسيتەتى، ىستانبۇل ۋنيۆەرسيتەتى مەن ا. بايتۇرسىن ۇلى اتىنداعى ءتىل ءبىلىمى ينستيتۋتىنىڭ بىرلەسىپ ۇيىمداستىرۋىمەن «قازىرگى زامانعى تۇركىتانۋ» اتتى حالىقارالىق عىلىمي-تەوريالىق كونفەرەنسيا ءوتتى.

تۇركى حالىقتارىنىڭ تەرەڭ تاريحى مەن ورتاق مادەنيەتى، ءتىلى مەن ادەبيەتىنە قاتىستى ماسەلەلەر قاراستىرىلعان بۇل كونفەرەنسياعا تۇركىتىلدەس رەسپۋبليكالاردىڭ قازاقستانداعى ەلشىلىكتەرى مەن كونسۋلدىقتارى، قازاقستان حالقى اسسامبلەياسى جانىنداعى تۇركىتىلدەس مادەني ورتالىقتار وكىلدەرى مەن تۇركىتانۋ سالاسىن زەرتتەپ جۇرگەن بەلدى عالىمدار مەن ىزدەنۋشىلەر قاتىستى.

كەلەلى جيىننىڭ اشىلۋ سالتاناتىندا تۇركى اكادەمياسى حالىقارالىق ۇيىمىنىڭ (TWESCO) باسشىسى دارحان ءقىدىرالىنىڭ ارنايى قۇتتىقتاۋ حاتىن ۇيىمنىڭ عىلىمي قىزمەتكەرى جانات مومىنقۇلوۆ وقىپ بەردى. 

كونفەرەنسيادا قازىرگى فيلولوگيانىڭ وزەكتى ماسەلەلەرى جانە اۋدارما تەورياسى؛ رۋحاني مادەنيەت جانە فيلوسوفيا مەن تاريحقا زاماناۋي كوزقاراس؛ شەت ءتىلىن وقىتۋ ادىستەمەسىنىڭ يننوۆاسيالىق تەحنولوگيالارى تاقىرىپتارىنا ارنالعان باياندامالار جاسالدى. سونداي-اق، قازاقستان پرەزيدەنتى ن.ءا. نازاربايەۆتىڭ «رۋحاني جاڭعىرۋ» باعدارلاماسىندا كورسەتىلگەن لاتىن ءالىپبيىنىڭ كەيبىر تۇركىتىلدەس رەسپۋبليكالاردا قولدانىلۋ ەرەكشەلىكتەرى، قازاق ءتىلىن لاتىن الىپبيىنە كوشىرۋدەگى وزەكتى ماسەلەلەر دە وسى جيىن بارىسىندا تالقىلاندى.

ايتا كەتۋ كەرەك، كونفەرەنسياعا ۇسىنىلعان ماقالالار مەن باياندامالار ارنايى عىلىمي جيناق رەتىندە جارىق كورەدى.