2 اقپاندا الماتىدا قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ باستاۋىمەن «جاھاندانۋ داۋىرىندەگى سيفرلىق كۇن ءتارتىبى» اتتى حالىقارالىق فورۋم باستالدى، دەپ حابارلايدى Qamshy.kz اقپارات اگەنتتىگى.

القالى جيىنعا ارمەنيا، بەلارۋس، قازاقستان، قىرعىزستان، رەسەي، وزبەكستان جانە تاجىكستان پرەمەر-مينيسترلەرى، سونداي-اق حالىقارالىق IT كومپانيالاردىڭ وكىلدەرى قاتىستى.

فورۋم بارىسىندا باقىتجان ساعىنتايەۆ ەلباسى نۇرسۇلتان نازاربايەۆتىڭ فورۋمعا قاتىسۋشىلارعا ارنالعان حاتىن وقىپ بەردى.

– قۇرمەتتى قاتىسۋشىلار، فورۋمعا قوش كەلدىڭىزدەر. الەم تۇبەگەيلى وزگەرىستەر زامانىندا ءومىر ءسۇرىپ وتىر. ستراتەگيالىق ۇيىمدار سيفرلاندىرۋعا ءمان بەرىپ وتىر. بۇگىنگى فورۋمدا ەۋرازيالىق ەكونوميكالىق وداق ەكونوميكاسىن سيفرلاندىرۋ بارىسىن تالقىلايتىن بولامىز. سيفرلاندىرۋدىڭ كۇن تارتىبىندەگى ماسەلەلەردى تۇبەگەيلى شەشەمىز دەپ ويلايمىن.

ورتاق نارىقتىڭ بولۋى سيفرلاندىرۋ ماسەلەلەرىندە بىرلەسكەن تاسىلدەر مەن شارالاردى ازىرلەۋدى تالاپ ەتەدى. كۇشتەردى جۇمىلدىرۋ ەاەق-تىڭ تۇتاستاي جانە ءار ەلدىڭ جەكەلەي دامۋى ءۇشىن سينەرگەتيكالىق تيىمدىلىكتى قامتاماسىز ەتەدى. بۇل ءىس-شارا قاجەتتى شەشىمدەردى ازىرلەۋگە جانە ىنتىماقتاستىقتى نىعايتۋعا ىقپال ەتەتىنىنە سەنىمدىمىن. فورۋمنىڭ بارلىق قاتىسۋشىسىنا جەمىستى ەڭبەك جانە العا قويىلعان ماقساتتارىنا قول جەتكىزۋدى تىلەيمىن، – دەدى ساعىنتايەۆ.

فورۋمنىڭ باستى ماقساتى - سيفرلىق ەكونوميكانىڭ باسەكەگە قابىلەتتىگىن ارتتىرا وتىرىپ، ونى دامىتۋدى جەدەلدەتەتىن بىرلەسكەن شارالار ازىرلەۋ جانە وڭىرلىك ينتەگراسيالىق ترانسفورماسيالاۋ نەگىزىندە كەلەسى ديۆيدەنتتەردى الۋ جولدارىن ازىرلەۋ.

«سيفرلىق قازاقستان» باعدارلاماسىن جۇزەگە اسىرۋدى قولعا العان ەلىمىز ءۇشىن بۇل شارانىڭ ماڭىزى زور. مەملەكەت باسشىسى بىلتىرعى جولداۋىندا عالامدىق تەحنولوگيالاردىڭ كوشىنە ىلەسۋ مەملەكەتتىك مەجە ەكەنىن اتاپ وتكەن.

قازاقستان تمد ەلدەرىنىڭ ىشىندە العاشقى بولىپ ەلەكتروندىق سيفرلىق قولتاڭبانى قولدانۋدى، مەملەكەتتىك قىزمەتتەردى ەلەكتروندىق فورماتقا كوشىرۋدى قولعا العان. بۇگىندە قازاقستاندا ەلدىڭ سيفرلىق ەكونوميكاسىن دامىتۋ ماقساتىنداعى جوسپارلار نەگىزى دايىن. «سيفرلىق قازاقستان» ەكونوميكاسىن جەدەل تەحنولوگيالىق جاڭعىرتۋدى قامتاماسىز ەتۋ باعىتىندا  سيفرلىق ترانسفورماسيالاۋ بويىنشا كەشەندى باعدارلاما قابىلداندى. باعدارلامادا 2 نەگىزگى ماقسات ايقىندالعان. ءبىرىنشى، ەكونوميكا سالالارىن سيفرلاندىرۋ، سيفرلىق مەملەكەتكە ءوتۋ جانە «سيفرلىق جىبەك جولىن» دامىتۋ ارقىلى ەكونوميكانى دامىتۋ جانە حالىقتىڭ تۇرمىس ساپاسىن جاقسارتۋ قارقىنىن ايتارلىقتاي ۇدەتۋ. ەكىنشى، ادام كاپيتالىن دامىتۋ جانە ۇزاق مەرزىمدى پەرسپەكتيۆادا يننوۆاسيالىق ەكوجۇيەنى قۇرۋ ارقىلى قازاقستان ەكونوميكاسىنىڭ جاڭا دامۋ تراەكتورياسىنا ءوتۋ مىندەتى تۇر.