(اقىمەت بايتۇرسىن ۇلىنىڭ رۋحىنا)
1. رۋح
جىلاننىڭ جۇرىسىندەي جىلجىپ ەپپەن
سودان بەرى سامارقاۋ ءجۇز جىل وتكەن.
جالعان دۇنيە ۇيالىپ،
اقيقاتتىڭ الدىندا ءدىر-دىر ەتكەن.
شىندىعىن سول عاسىردىڭ ۇققاندا ءار كۇن،
جۇرتىمنىڭ جۇرەگىنەن جۇتتى اڭعاردىم.
ەسسىز تاريح جازىقسىز باسىن العان
اۋزىنان «الاش!» ءسوزى شىققانداردىڭ...
ءورت كەتكەندەي وگەيسىپ جاسىل قىرات،
كومىلدى ەگەي ارمان، اسىل مۇرات.
قانى قايسار قارا جەر سولقىلدايدى
ەرلەرىن باۋىرىنا باسىپ جىلاپ.
اشارشىلىق. قىرىلدى، ەل جاسقاندى،
قايعى باستى كەشەگى شەر باسقاندى.
التى تۇمەن باتىردىڭ قولعا تۇسكەن
ءتورت تۇمەنى مەزگىلسىز جەر جاستاندى.
قايعى ءتۇسىپ سوڭىنان، قۋالاپ مۇڭ،
ءتۇبى سايا بولمادى قۋ اعاشتىڭ.
ادامزات تاريحىنىڭ اۋىر كۇنى
ءوتىپ جاتتى باسىنان بۇل الاشتىڭ.
- اقىمەت
ءور رۋحىن جاۋلاۋعا قۇرتتى مالىن،
سالىق كەلىپ ساندالتتى جۇرتتى قالىڭ.
«بايتۇرسىنوۆ اتىلسىن!» دەگەن
سۇرلانىپ، قولىن قويدى مۇرتتى زالىم.
وق شىقتى اش مىلتىقتىڭ ۇڭعىسىنان،
ادامزات ايىرىلدى تۇڭعىشىنان
قاسقايىپ وققا قاراپ تۇردى اقىمەت.
ءتۇڭىلىپ ول كورمەگەن تۋمىسىنان.
شەيىت بوزداق!
ەرىپ ۇشتى كەلتە نۇرمەن
وكسيدى قاپ-قارا اسپان شەر توگىلگەن.
ءولىمدى وكىنىشسسىز قابىلدادى
اتىلارىن قايران ەر ەرتە بىلگەن...
- تاپسىرما
«قازاقستان، ءبىز كەتتىك، سەن قالاسىڭ!
مەنى ومىرگە اكەلگەن سەن دە، اناشىم!
ەر ءولدى، ەلىم قالدى، جەڭدى الاشىم،
جالعاندىقتى كۇنى ەرتەڭ سەن جاباسىڭ!
توپىراعىنان اڭقىسىن قازاقى ۇعىم،
الەمدى تامساندىرسىن ازات ءۇنىڭ.
مەن ءجانناتقا الاڭسىز كىرەم، جۇرتىم،
ەستىلسە تاس بۇلاقتاي تازا ءتىلىڭ!
امان بول، بەۋ الماتىم، ىزگى استانام،
سىيلادىڭ قارتايمايتىن مىڭ جاس ماعان.
كەشىكپەي ەركىندىكتىڭ تاڭى اتادى،
كۇرەستى ۇل جالعايدى ءبىز باستاعان.
ەسەن بول ەگەي دالام، قوستانايىم،
جوعىمدى سەن تۇگەندە، جوقشى اعايىن.
مەن نەسىنە اجالدان جاسقانايىن؟!
مەن دالاما جەرلەنسەم، ب ا ق سانايىن!
اق باس تاۋلار، امان بول، و، سەرى شىڭ!
سەن بابامنىڭ تەڭدەسسىز مەكەنىسىڭ.
ەتەگىڭدە ەل-جۇرتىم تۋىن تىگىپ،
قايتا جازا باستايدى كەشەگىسىن.
مەن جىعىلدىم قازاعىم، بەل استىم دا،
بولەنەرسىڭ بەيبىت ەل سەن اق نۇرعا.
ۇمىتپا، ءبىز جاتقانمەن كور استىندا،
اقيقات قالمايتىنىن جەر استىندا!..
***
ومىردەن كەتتى وسىلاي تاسقىن دارىن،
بۇگىن ءبىز تارتا مىندىك اتتىڭ جالىن.
جاۋ المايدى شالدىقپاي ورىنداساق،
شىن عالىمنىڭ شىرىلداپ تاپسىرعانىن.
ادىلەت احمەت ۇلى
پىكىر قالدىرۋ