ۋاعىزى قىزۋ تالقىعا تۇسكەن ابدۋعاپپار سمانوۆ حالىقتان كەشىرىم سۇرادى، دەپ حابارلايدى Qamshy.kz اقپارات اگەنتتىگى. يمامنىڭ حالىقتان كەشىرىم سۇراعان ۆيدەوسىن الي ستۋدياسى ءوزىنىڭ Youtube ارناسىنا جاريالادى. 

«مەنى بىرەۋ وزبەك، بىرەۋ ۇيعىر تاعى باسقا اتاۋلار مەن اتاپ، اۋزىنا كەلگەنىن ايتىپ ءجۇر. مەن ءوزىمدى تانىستىرىپ وتەتىن بولسام، مەن ابدۋعاپپار سمانوۆ شاكىر ۇلى 1970 جىلى 22 اقپاندا تۋعانمىن. مەن قازاقپىن، قازاقتىڭ ىشىندەگى سەيىت قوجاسىمىن. ءبىراق ءبىز ەشقاشان مىناۋ قازاق، مىناۋ قوجا دەپ ايتقان ەمەسپىز. مەنىڭ كوپ ۋاعىزدارىمنىڭ اراسىنا وزبەك سوزدەرىنىڭ ارالىسىپ كەتۋىنىڭ سەبەبى مەن قىرعىزستاندا وزبەكتەردىڭ قولىندا وقىعانمىن. سونىمەن بىرگە بىزگە وزبەكتىڭ شەكاراسى وتە جاقىن. ءبىراق مۇندا تۇرعان ەش ايىپ جوق. ادامدار ورىسشا سويلەپ جاتىر، وعان ەشكىم قارسىلىق كورسەتىپ جاتقان جوق.  كىم قانشا ءتىل بىلسە دە ءوزىنىڭ ءتىلىن، ءدىنىن ۇمىتپاسىن، سونىڭ ءوزى جەتكىلىكتى»، — دەدى ابدۋعاپپار سمانوۆ.

سونىمەن بىرگە نەسيە تۋرالى ۋاعىزى داۋ تۋدىرعان يمام بۇكىل حالىقتان كەشىرىم سۇرادى.

«مەن بۇكىل حالىقتان كەشىرىم سۇرايمىن. وتە قاتتى ايتىپ قويعان ماسەلەلەر بولعان. ساماۋىردى سۋ الدى دەسە، سامارقاندى سۋ الدى دەگەندەي قىلىپ، ءبۇتىن ەلگە جاريالاپ جىبەرگەندەر بولدى. مەن البەتتە حالىقتان، ءوزىمىزدىڭ مۇسىلمان حالقىنان كەشىرىم سۇراۋدان ۇيالمايمىن دا، قىسىلمايمىن دا، قورىقپايمىن. ادام كەيبىر كەزدە ءوزىن ەستەن شىعارىپ قويۋى مۇمكىن. بۇل اقيقات نارسە. مۇنداي اشۋ-ىزالار بۇدان كەيىن بولمايدى دەپ ءسوز بەرە الامىن. ءبىزدىڭ ايتىپ جاتقان ۋاعىزدارىمىز كەيبىر ادامدارعا ءتيىپ كەتىپ جاتسا البەتتە كەشىرىم سۇرايمىز. ءبىراق نەگىزىندە شاريعات، قۇران اياتتارى ايتىلعان كەزدە، ونىڭ اقيقاتى ايتىلعان كەزدە اقيقاتتى ايتقان ادام حالىقتان كەشىرىم سۇرامايدى. سەبەبى ول ءوزىنىڭ ميىنداعى نارسەنى ايتىپ جاتقان جوق، جۇرەگىندەگىنى ايتىپ جاتقان جوق. بالكىم ول كۇيىنگەننەن، اشىنعانىنان اللانىڭ قۇرانىن، پايعامبار (س.ع.س.) ءحاديسىن جەتكىزدى. سەبەبى ەرتەڭ قيامەت بار، اعايىن. قيامەتتە ءاربىر ادام ءوزىنىڭ قارا باسىمەن الەك بولادى. سول ءۇشىن ءبىز اقيقاتتى ايتىمىز. اقيقاتتى ايتىپ كەلە جاتىرمىز. ءبىراق بۇل كەيبىر ادامدارعا جاقپايدى ەكەن. مەنىڭ ەشكىمنەن الا الماي جۇرگەن ءوشىم جوق. حالىق شاريعاتتى ءتۇسىنىپ، ادال مەن ارامدى اجىراتىپ الاتىن بولسا، اتا-اناسىن قۇرمەتتەپ، ءوزىنىڭ وتباسىمەن ءتاتۋ-تاتتى بولسا بۇدان اسقان قۋانىش، باقىت جوق. ءبىزدىڭ كەيبىر سوزدەرىمىز، اسىرەسە مەنىڭ كەيبىر سوزدەرىم قاتتى ءتيىپ كەتىپ جاتقان بولسا ءبۇتىن حالىقتىڭ الدىندا كەشىرىم سۇرايمىن»، — دەيدى ابدۋعاپپار سمانوۆ.