الماتىدا «وتىرار سازى» وركەسترىنىڭ كونسەرتى ءوتتى.

قازاقتىڭ ءبىرتۋما كومپوزيتورى، دارىندى ديريجەر نۇرعيسا تىلەندييەۆتىڭ بيىل ومىردەن وزعانىنا 20 جىل تولادى. داۋلەسكەر كۇيشىنىڭ كوزى ءتىرى بولسا 93 جاسقا تولار ەدى.

كۇنى كەشە تىلەندييەۆتىڭ تۋعان كۇنىنە وراي، «وتىرار سازى» وركەسترىنىڭ كونسەرتى ءوتتى. كەشتە سازگەردىڭ حالىق ءسۇيىپ تىڭدايتىن جيىرمادان استام مۋزىكاسى وينالىپ، كۇيلەرى كۇمبىرلەدى. قازاق مۋزىكا مادەنيەتىندە وشپەس ءىز قالدىرعان ەرەكشە دارىن يەسىنە كوزى تىرىسىندە-اق «قازاق سازىنىڭ سايىپقىرانى» دەگەن اتاق بەرىلگەن ەدى. كومپوزيتوردىڭ ارتىندا قالعان مۇراسى ولشەۋسىز. اسىرەسە، ول قۇرعان «وتىرار سازى» وركەسترى كۇللى قازاقتىڭ ماقتانىشىنا اينالدى. ونەر ۇجىمى بيىل شەت ەلدەرگە گاسترولگە كوپتەپ شىعىپ، ءبىرتالاي يگى شارالاردى قولعا الماق.

«اكەمنىڭ قايتقانىنا وسى جىلى 20 جىل. ويدا كوپتەگەن ماقساتتار تۇر. بارلىعىن اشپاي-اق قويايىن. قايتقانىنا وسى قاراشانىڭ 15-دە ۇلكەن كونسەرت وتكىزەيىك دەپ جاتىرمىز. مۋزەيدىڭ ىشىندە بىرنەشە وزگەرىستەر بولۋ كەرەك، ونى ەندى ءقازىر اشقانىم دۇرىس بولمايتىن شىعار»، - دەدى ن.تىلەندييەۆ اتىنداعى «وتىرار سازى» وركەسترىنىڭ جەتەكشىسى ءدىنزۋحرا تىلەندييەۆا.

«ول ۇلى كومپوزيتور، ول حالىققا جاقىن كومپوزيتور. حالىقتىڭ جۇرەگىنەن شىققان، جۇرەگىندەگى اندەردى جازعان كومپوزيتور. ونىڭ ءقازىر 20 جىل بولدى دەپ جاتىرمىز يا كەتكەنىنە، سونىڭ وزىندە ءبىر شىعارماسى وينالماي قالعان جوق. وركەسترى ويناپ جاتىر، كونسەرت بەرىپ جاتىر. ول كونسەرتكە كورەرمەندەرى كەلىپ، راحاتتانىپ تىڭداپ كەتەدى. ول كىسى بۇلاي ويلاساڭ ولگەن جوق. ويتكەنى، كەرەمەت وركەستر قالدىردى»، - دەدى ن.تىلەندييەۆتىڭ جۇبايى داريعا تىلەندييەۆا.