الماتىدا الىس-جاقىن شەت ەلدىڭ كىل مىقتى بيشىلەرى انىقتالدى. ءقازىر عانا حالىقارالىق «ورلەۋ» حورەوگرافيالىق بايقاۋى مارەسىنە جەتىپ، جەڭىس تۇعىرىنا شىققان ەڭ ۇزدىكتەرى ماراپاتتالدى. الەمنىڭ ءار تۇكپىرىنەن كەلگەن مىڭ بۇرالعان جاس بيشىلەردىڭ بيىلعى سايىسى قالاي ءوتتى؟ كوش باستاعان كىمدەر ەكەنىن بىزگە سول بايقاۋدا جۇرگەن ارىپتەسىم ايدانا مەيرامباي قىزى ايتىپ بەرۋگە دايىن تۇر.

قازاقستان رەسپۋبليكاسى تۇڭعىش پرەزيدەنت قورى مەن سەلەزنيەۆ اتىنداعى حورەوگرافيا ۋچيليششەسىنىڭ ۇيىمداستىرۋىمەن 2010 جىلدان بەرى وتكىزىلىپ كەلە جاتقان بيشىلەر بايقاۋى بيىل وسىمەن التىنشى رەت ۇيىمداستىرىلدى. 2 جىلدا ءبىر رەت وتكىزىلسە دە، جىلدان-جىلعا اۋقىمىن كەڭگە جايعان بالەت بايگەسىنە بيىل قازاقستاننان بولەك، بىرىككەن اراب امىرلىكتەرى، جاپونيا، تۇركيا، رەسەي، وزبەكستان جانە قىرعىز رەسپۋبليكاسىنان باس-اياعى 147 ءبيشى قاتىستى. ونەرپازدار 3 نوميناسيا بويىنشا ب ا ق سىنادى. قاتىسۋشىلار «كلاسسيكالىق»، «زاماناۋي» جانە «حالىق بيلەرى» بويىنشا سايىسقا ءتۇستى. بيشىلەرگە كوپتى دارىنىمەن تامساندىرعان بالەت مايتالماندارى مەن حورەوگرافيالىق ءبىلىم بەرۋدىڭ كورنەكى قايراتكەرلەرى قازىلىق ەتتى. ولار ماراپاتتاۋ ءراسىمى باستالماس بۇرىن باسپا ءسوز كونفەرەنسياسىن وتكىزىپ، بيىلعى بايقاۋدىڭ ەرەكشەلىكتەرىن اتاپ وكتەن ەدى.

«147 بالانىڭ ىشىنەن ەڭ مىقتىسىن تاڭداۋ بىزگە قيىنعا ءتۇستى. ويتكەنى، قاتىسۋشىلار بىرىنەن-بىرى اسقان دارىندى. بارلىعىن ءبولىپ-جارماي جەڭىمپاز ەتكىمىز كەلدى. ءبىراق بايقاۋدىڭ اتى بايقاۋ. ءبىز ءبيدى ورىنداۋ تەxنيكاسىنان بولەك، وبرازدىڭ اشىلۋىنا، ارتىستىك قابىلەتىنە، ساxنادا ءوزىن ۇستاۋىنا ءمان بەردىك»، - دەدى قازىلار القاسى يۋريي ۆاسيۋچەنكو (رەسەي).

بايقاۋعا قاتىسۋشىلاردىڭ ەڭ كىشىسى 7-دە بولسا، ۇلكەنى 16-دا. جالپى بيشىلەر جاس ەرەكشەلىكتەرىنە قاراي كىشى، ورتا جانە ۇلكەن جاستاعى توپ بولىپ سايىستى. ناتيجەسىندە، 147 ءبيشىنىڭ ىشىنەن، 63ء-ى لاۋرەات اتاندى. ولارعا ماقتاۋ قاعازدارى بەرىلدى. ال ءبىرىنشى ورىن العاندارعا 65 مىڭ، ەكىنشى ورىن يەسىنە 50 مىڭ جانە ءۇشىنشى ورىنعا 30 مىڭ تەڭگە تابىستالدى.

«مەن 2014 جىلى وسى «ورلەۋ» بايقاۋىنا قاتىسىپ، ەكىنشى ورىن يەگەرى بولعانمىن. وسى جىلى دا ەكىنشى ورىن يەگەرى اتاندىم. بۇل بايقاۋ ساxنادا وز-وزىڭە بەرىك بولۋعا، قورقىنىشپەن كۇرەسۋگە كومەكتەسەدى. الداعى ۋاقىتتا ەشقانداي قورقىنىش بولماي، ساxنادا ءوز-وزىڭدى ۇستاۋعا بەيىمدەيمىز»، - دەدى بايقاۋدىڭ ەكىنشى ورىن يەگەرى داميليا شىرالى.

جالپى بۇل بايقاۋدىڭ ماقساتى - بيشىلەردىڭ ورىنداۋشىلىق شەبەرلىگىن جانە رۋحاني الەۋەتىن ارتتىرۋ. ەرەكشە دارىنداردى انىقتاپ قانا قويماي، مادەني-شىعارماشىلىق بايلانىستارىن نىعايتۋ. ايتا كەتسەك، بۇگىنگى بايقاۋ جاس بالەت ارتىستەرىنىڭ ەڭ ۇزدىك نومىرلەرىنەن قۇرالعان گالا-كونسەرتپەن اياقتالادى.