الماتىلىق سەرىك ەسماتوۆ «رۋحاني جاڭعىرۋ» اياسىندا قولعا الىنعان «100 جاڭا ەسىم» جوباسىنىڭ قاھارمانى اتاندى. ءار ادامنىڭ تاعدىرى - اشىلماعان ءبىر تاريح. جاس سپورتشى ءۇشىن ارباعا تاڭىلۋ ءومىردىڭ قاتاڭ ۇكىمى ەمەس. ول قوس اياعىن جوعالتقانمەن، وزىنە دەگەن سەنىمدى ەشقاشان جوعالتقان جوق. ءومىردى شەكسىز سۇيەتىن سەرىك ەسماتوۆ تاۋسىلىپ قايعىرۋدان گورى العا ۇمتىلىپ، تىرلىك ەتكەندى ءجون كورەدى. ءقازىر جىگىت سۇيىكتى ىسىمەن اينالىسىپ، مۇمكىندىكتىڭ شەكسىز ەكەنىن دالەلدەپ ءجۇر.

باسىنا تۇسكەن قيىندىققا قامىقسادا، قارسى تۇرعان جاننىڭ ءبىرى -  ۆولەيبولدان قازاقستان جاستار قۇراماسىنىڭ كاپيتانى -  سەرىك ەسماتوۆ. 20 جاستاعى الماتىلىق سپورتشى بالا كۇنىنەن ءجۇزۋ، كۇرەس پەن فۋتبولدى جانىنا جاقىن تارتىپتى. ءبىراق 2011 جىلدىڭ 30 تامىزىندا ورىن العان وقيعا ونىڭ ءومىرىن كۇرت وزگەرتتى. جاتتىعۋدان شارشاپ كەلە جاتقان بالا ابايسىزدا پويىز استىنا ءتۇسىپ، قوس اياعىنان ايىرىلعان. ساعى سىنباعان جىگىت اراعا ءبىراز ۋاقىت سالىپ سپورتقا قايتا ورالىپ، وتىرىپ وينايتىن ۆولەيبولمەن اينالىسىپ ءجۇر. الماتىدا ءوتىپ جاتقان قازاقستان چەمپيوناتىندا ونىڭ كومانداسى بۇگىنگدە ب ا ق سىناپ جاتىر.

«چەمپيوناتقا ەلىمىزدىڭ ءار تۇكپىرىنەن مىقتى 10 كوماندا قاتىسۋدا. بىزگە ازىرگە جۇلدەلى ورىندارعا تالاسۋعا ەرتە دەپ سانايمىن. ءبىر جاعىنان، جاڭادان قۇرىلعان كوماندا بولعاندىقتان ءبىراز جاتتىعىپ، تاجىريبە جيناۋىمىز كەرەك. ەلىمىزدە دەڭگەيى جوعارى سپورتشىلاردىڭ بارى قۋانتادى. ولارعا قاراپ، ءبىز بوي تۇزەيمىز، العا ۇمتىلامىز. مەن دامىماي، ءبىر ورىندا تۇرعاندى ۇناتپايمىن. ءار كۇننەن وزىڭە پايدالى دۇنيەنى الىپ قالۋ كەرەك»، - دەدى قازاق تۋريزم جانە سپورت اكادەمياسىنىڭ ستۋدەنتى، ۆولەيبولدان قازاقستان جاستار قۇراماسىنىڭ كاپيتانى سەرىك ەسماتوۆ.

كوماندا كاپيتانى كوپ جاعدايدا جەڭىلىستەن كەيىن سپورتشىلاردىڭ ساعى سىنىپ، ەڭسەلەرى ءتۇسىپ كەتەتىنىن ايتادى. ءبىراق سەرىك تاعدىر باسىنا اۋىر سىناق بەرگەندە دە ەش مويىماعانىنىن ۇلگى قىلادى. «ءوزىڭدى وزگەلەردەن شەكتەتپەي، قايتا تىعىراقتان شىعۋدىڭ جولىن ىزدەۋ ەڭ ابزال ءىس» دەيدى «100 جاڭا ەسىم» جوباسىنىڭ تىزىمىنە كىرگەن ازامات. جۇرەكتەگى قورقىنىشتى جەڭىپ، ءومىرىن سۇيىكتى ىسىمەن ءماندى ەتكەن ونىڭ بولاشاقتا ىسكە اسىرار جوسپارى كوپ.

«ءار كۇن سايىن تاڭەرتەڭ امان-ەسەن ويانۋدىڭ ءوزى باقىت. بۇل مەن ءۇشىن ءومىرىمنىڭ جاڭا بەتى. سول قايعىلى جايتتەن كەيىن امان قالعانىم ءۇشىن قۋانامىن. قيىن، ارينە. الدا وقۋىمدى اياقتاپ، سپورتتا ءوزىم قالاعان جەتىستىككە جەتۋدى ارماندايمىن. ودان كەيىن، ەلگە قولعابىس بولاتىن ءبىراز الەۋمەتتىك جوبالاردى قولعا السام دەپ وتىرمىن»، - دەدى قازاق تۋريزم جانە سپورت اكادەمياسىنىڭ ستۋدەنتى، ۆولەيبولدان قازاقستان جاستار قۇراماسىنىڭ كاپيتانى سەرىك ەسماتوۆ.

سەرىك 2013 جىلى مالازيادا ۆولەيبولدان وتكەن  پاراليمپيادالىق تۋرنيردە قولا مەدال جەڭىپ العان. باپكەرلەرى سەرىكتىڭ جارقىن جەڭىستەرى ءالى الدا دەپ سەنەدى. ويتكەنى، 2 كۋرس ستۋدەنتى ساباقپەن قاتار بىرنەشە سپورت تۇرىمەن قاتار  اينالىسىپ ءجۇر.