الماتىدا دەسترۋكتيۆتى ءدىني اعىمدا بولعان 244 ادام رايىنان قايتارىلعان.

وتكەن جىلى الماتىدا دەسترۋكتيۆتى ءدىني اعىمدا بولعان 244 ادام رايىنان قايتارىلعان. قالالىق ءدىن ىستەرى جونىندەگى باسقارما باسشىسى ايدار ەسەنبەكوۆتىڭ ايتۋىنشا، الماتىداعى ءدىني احۋال ءقازىر تۇراقتى. ءداستۇرلى ەمەس ءدىني اعىمداردىڭ تارالۋى ەداۋىر ازايىپ، حالىق ونىڭ اداسۋ جولى ەكەنىن تۇسىنە باستاعان. سونىمەن قاتار، باسقارما باسشىسى مۇنداي تەرىس اعىمداردىڭ جەتەگىنە كەتكەندەر قىلمىستىق تۇزەۋ ورىندارىندا دا كەزدەسەتىنىن مالىمدەدى. الماتى اۋماعىندا ورنالاسقان تۇرمەلەردە 28 ادام وسىنداي باعىتتى ۇستانىپ كەلگەن. ءقازىر ولارمەن ماماندار جۇمىس جاساپ جاتىر.

«بەلگىلى ءبىر توپتاردىڭ ارەكەتتەرى، بىلەسىزدەر تىيىم سالىنعان. جەتەكشىلەرى بويىنشا ءبىز اكىمشىلىك حاتتامالار تولتىرىپ، ءقازىر جاۋاپقا تارتىپ جاتىرمىز. وتكەن جىلى بىزدە 36 وسىنداي اكىمشىلىك حاتتاما تولتىرىلىپ، ءدىن سالاسىنداعى زاڭنامانى بۇزعان بويىنشا، سوتتىڭ شەشىمىمەن ايىپپۇلدار سالىندى. زاڭ تۇرعىسىنان ءبىز ءدىن سالاسىنداعى زاڭدى بۇزعان ازاماتتار ءۇشىن جاۋاپكەرشىلىكتى كۇشەيتىپ جاتىرمىز. ول بولماسا دا بۇل سالاداعى ماسەلەنى ۇيلەستىرۋ، ارينە، قيىن بولارى انىق»، - دەدى الماتى قالاسى ءدىن ىستەرى جونىندەگى باسقارما باسشىسى ايدار ەسەنبەكوۆ.

تولتىرىلعان اكىمشىلىك حاتتامالاردىڭ ارقاسىندا جالپى سوماسى 4 ميلليون تەڭگەگە جۋىق ايىپپۇل سالىنىپتى. ونىڭ ىشىندە ءدىني مازمۇنداعى ادەبيەتتەردى تاراتۋ بويىنشا -14؛ ءدىني راسىمدەردى بەلگىلەنگەن ورىنداردان تىس وتكىزۋ بويىنشا – 6؛ رۇقساتسىز ميسسيونەرلىك قىزمەتتى جۇرگىزگەن -12؛ ءدىني راسىمدەرگە كامەلەت جاسقا تولماعانداردىڭ قاتىسۋى بويىنشا - 4 دەرەك تىركەلگەن.