بۇگىن «قازمەديا ورتالىعىندا» «سيفرلى قازاقستان» مەملەكەتتىك باعدارلاماسى اياسىندا «قازاقستان» تەلەراديوكورپوراسياسىنىڭ «Qazaqstan TV» ءموبيلدى قوسىمشاسىنىڭ تانىستىرىلىمى ءوتتى دەپ جازادى Qamshy.kz اقپارات اگەنتتىگى. 

شاراعا «قازاقستان» رترك ستراتەگيالىق ماركەتينگ دەپارتامەنتىنىڭ جەتەكشىسى جاننۇر ايداربەكوۆا مەن قوسىمشانى جۇزەگە اسىرعان كومپانيا باسشىسى اباي  سەرعازييەۆ قاتىستى. اتالمىش قوسىمشا ارقىلى كورەرمەن كورپوراسيا قۇرامىنا كىرەتىن «Qazaqstan»، «balapan» جانە «Qazsport» تەلەارنالارىنىڭ تەلەونىمدەرىن جوعارى ساپادا تىكەلەي ەفيردە كورۋ مۇمكىندىگىنە يە بولماق. ياعني، كەز-كەلگەن جەردە، كەز-كەلگەن ۋاقىتتا قالاعان باعدارلامالارىن تىكەلەي ەفيردىڭ براۋزەرى ارقىلى كىرىپ تاماشالاۋعا بولادى.

ستراتەگيالىق ماركەتينگ دەپارتامەنتىنىڭ جەتەكشىسى جاننۇر ايداربەكوۆانىڭ ايتۋىنشا:  «سيفرلاندىرۋ - ۋاقىت جانە زامان تالابى. ەلباسىمىز ءوز جولداۋىندا اقپاراتتىق-تەحنولوگيالىق شەشىمدەردى ەنگىزۋ قاجەتتىگىن ايتقان بولاتىن. ءبىزدىڭ كورپوراسيا دا وسى تىڭ باستامادان تىس قالماۋدى كوزدەپ وتىر.  بۇل قوسىمشا ارقىلى ءاربىر قازاقستاندىق وزىنە قاجەتتى باعدارلامانى ساقتاۋ فۋنكسياسى ارقىلى جۇكتەپ الىپ، وزىنە ىڭعايلى ۋاقىتتا كورە الادى. سونداي-اق، بۇل قوسىمشادا باسقا دا فۋنكسيالار بار».

ايتا كەتەيىك، «Qazaqstan TV» قوسىمشاسىنىڭ ەرەكشەلىكتەرى: جوعارى ساپالى تىكەلەي ەفيردىڭ قولجەتىمدىلىگى، باعدارلامالاردى ساقتاۋ مۇمكىندىگى، باعدارلامانى ىڭعايلى ۋاقىتتا كورۋ مۇمكىندىگى، جاڭالىقتاردى اۋديو ارقىلى  تىڭداۋ جانە وزگە دە فۋنكسيالاردان تۇرادى. 

ەندى «Qazaqstan TV» قوسىمشاسىنىڭ كورەرمەندەرى تەلەراديوكورپوراسيا قۇرامىنا كىرەتىن «Qazaqstan»، «balapan» جانە «Qazsport» تەلەارنالارىمەن قاتار، «Qazaq radiosy»، «Shalqar radiosy»، «Astana» جانە «Classic» راديولارىن دا ەلىمىزدىڭ ءار بۇرىشىنان تىڭداي الادى. ايتا كەتەيىك، «Qazaqstan TV» قوسىمشاسى AppStore جانە Play Market  سەرۆيستەرىندە قولجەتىمدى.