ارمەنيادا «ەلك» پارلامەنتتىك وپپوزيسيالىق فراكسيا ليدەرى نيكول پاشينياندى ەلدىڭ پرەمەر-مينيسترى لاۋازىمىنا ۇسىندى. ۇكىمەت تىزگىنىن قولىنا الۋ ءۇشىن پاشينيانعا كەمىندە 53 دەپۋتات داۋىس بەرۋ كەرەك.

سەيسەنبىدە وتكەن پرەسس-كونفەرەنسيادا پاشينيان حالىق قالاسا، ۇكىمەتتى باسقارۋعا دايىن ەكەنىن جەتكىزگەن.

«رەسپۋبليكالىق پارتيا وكىلدەرى پرەمەرلىككە كەلە المايدى. ولاردىڭ ءداۋىرى اياقتالدى. بيلىكتىڭ اۋىسۋىن داۋ-دامايسىز ءوتۋىن قاداعالاۋ كەرەك»، - دەگەن ەدى پاشينيان.

«ەلك» پارتياسىنىڭ پارلامەنتتە توعىز دەپۋتاتى بار، ال تاعى ءبىر «سارۋكيان» وپپوزيسيالىق پارتياسىنان 31 دەپۋتات بار.

پارلامەنتتە نەگىزىنەن ارمەنيانىڭ رەسپۋبليكاشىلدار پارتياسى وكىلدەرى كوپ ورىن يەلەنگەن. اتالعان پارتيا «داشناكسۋتيۋن» پارتياسىمەن ءبىر كواليسيادا بىرىككەن. ءبىراق 25 ساۋىردە باسقارۋشى كواليسيا تاراپ كەتتى.

ارمەنيادا ساياسي داعدارىس كەزىندە، ەكى اپتادان بەرى ءوتىپ جاتقان نارازىلىق اكسياسى پرەمەر-مينيستر سەرج سارگسياننىڭ وتستاۆكاعا كەتۋىمەن اياقتالعان. ول ارمەنيانى 10 جىل باسقاردى.

25 ساۋىردە نيكول پاشينيان جاقتاستارى نارازىلىق اكسياسىن قايتا جاڭارتتى. بۇل پاشينيان مەن بيلىك پارتياسىنىڭ كەلىسسوزى ءۇزىلىپ قالعاننان كەيىن باستالدى. پاشينيان دەمونسترانتتاردى ەريەۆاننىڭ رەسپۋبليكالىق الاڭىنا جينالىپ، «بارقىت حالىقتىق ريەۆوليۋسيا جەڭىسىن نىعايتۋعا» شاقىردى.