الماتىداعى ۇلكەن اينالما جولدىڭ قۇرىلىس-مونتاج جۇمىستارى بيىل مامىر ايىندا باستالادى. بۇل تۋرالى بۇگىن ۇكىمەت وتىرىسىندا ينۆەستيسيالار جانە دامۋ ءمينيسترى جەڭىس قاسىمبەك مالىمدەدى. ونىڭ ايتۋىنشا، تاس جول 2021 جىلى اياقتالادى. سونىمەن قاتار، ەلىمىزدە رەسپۋبليكالىق ماڭىزى بار 15 مىڭ شاقىرىم كۇرە جولدى اقىلى ەتۋ كوزدەلگەن.

ۇكىمەت جيىنى بۇگىن ادەتتەگىدەي باياندامادان باستالعان جوق. باقىتجان ساعىنتايەۆ الدىمەن ەلباسى جارلىعىمەن جاڭادان تاعايىندىلعان ءدىن ىستەرى جانە ازاماتتىق قوعام ءمينيسترى دارحان قالەتايەۆپەن تانىستىرۋدى قۇپ كوردى. دارحان امان ۇلى وسى ۋاقىتقا دەيىن قازاقستان رەسپۋبليكاسى پارلامەنتى سەناتىنىڭ دەپۋتاتى قىزمەتىن اتقاردى.

«دارحان امان ۇلى ەلباسىنىڭ جارلىعى بويىنشا ءدىن ىستەرى جانە ازاماتتىق قوعام ءمينيسترى بولىپ تاعايىندالدى. دارحان امانتاي ۇلى ءسىزدى جاڭا قىزمەتىڭىزبەن قۇتتىقتاي وتىرىپ، جاڭا جۇمىسىڭىزعا ساتتىلىك تىلەيمىز»، - دەدى ق ر پرەمەر-مينيسترى باقىتجان ساعىنتايەۆ.

بۇدان كەيىن بايانداماسىن ءبىرىنشى باستاعان ينۆەستيسيالار جانە دامۋ ءمينيسترى جاڭا جوبالاردى جىپكە ءتىزدى. جەڭىس قاسىمبەك رەسپۋبليكالىق ماڭىزى بار جولداردىڭ 15 مىڭ شاقىرىمى 3 جىل كولەمىندە اقىلى بولادى دەدى. جالپى قۇنى 97،5 ملدر تەڭگەنى قۇرايتىن جوبا مەملەكەتتىك-جەكەمەنشىك سەرىكتەستىك اياسىندا ىسكە اسپاق. سونىمەن قاتار، مينيستر الماتىداعى قۇرىلىسى تۇرالاپ تۇرعان ۇلكەن اينالما تاس جولىن ءسوز ەتتى. ماگيسترالدىڭ قۇرىلىس-مونتاج جۇمىستارى بيىل مامىر ايىندا باستالىپ، 2021 جىلى اياقتالادى.

«بيىل 7 اقپاندا «السيم الاركو - ماكيول - سك - كورەيان ەكسپرەسس ۆەي» مەن قازاقستاندا اۆتوجول سالاسىندا ءبىرىنشى ءىرى كونسەسسيالىق جوبانى ىسكە اسىرۋ بويىنشا كەلىسىم- شارتقا قول قويىلدى. بۇگىنگى تاڭدا كونسورسيۋم بايىندىق جۇمىستارىنا كىرىسىپ كەتتى. بيىل مامىر ايىندا قۇرىلىس جۇمىستارى باستالادى»، - دەدى  ينۆەستيسيالار جانە دامۋ ءمينيسترى جەڭىس قاسىمبەك.

پرەمەر-مينيستر ستۋدەنتتەرگە جاتاقحانا سالۋ ماسەلەسىن تاعى كوتەرىپ، قۇرىلىس «مەملەكەتتىك-جەكەمەنشىك سەرىكتەستىك» اياسىندا ىسكە اسۋ كەرەك ەكەنىن ايتتى. ءبىراق جەكە بيزنەسكە سالماق تۇسپەۋ قاجەت دەدى. بۇل ماسەلەنى ساعىنتايەۆ ءوزىنىڭ ورىنباسارلارىنا تاپسىردى.

«ەربولات اسقاربەك ۇلى نەگىزگى پروبلەمالاردى بىرلەسە وتىرا قاراپ، شەشىم قابىلداۋ قاجەت. بەردىبەك ماشبەك ۇلى كەشەدە ايتىپ ءوتتى، بۇگىندە ايتتى ءبىزدىڭ قابىلدانعان شەشىمدەردىڭ تۇراقتى بولۋىنا، نورماتيۆتەردىڭ بولماسا، بەلگىلەنگەن تاريفتەردىڭ. ارينە، بۇل دۇرىس ەمەس. ءبىز كاسىپتەرلەردى شاقىرامىز. جۇمىسقا تارتامىز، ارتىنان تاريفتەردىڭ بارلىعىن وزگەرتىپ جاتامىز. ياعني، ونى ءبىر جىل جۇمىسىن باستاماي جاتىپ، ارى قاراي بانكروتتىققا يتەرمەلەيدى دەگەن ءسوز»، - دەدى ق ر پرەمەر-مينيسترى باقىتجان ساعىنتايەۆ.

ۇكىمەت باسشىسىن الاڭداتقان كەزەكتى ماسەلە، مەكتەپتەردەگى كەڭ جولاقتى عالامتور. ونىڭ سوزىنشە، ەشبىر ايماق ءالى تولىققاندى Wi-Fi  جەلىسىنە قوسىلماعان.

«قازاقستان بويىنشا بىردە-بىر وبلىستا 100 پايىز قامتاماسىز ەتىلمەگەن. باياندامادا كورسەتىلگەندەي. الماتى، استانا قالالارىندا دا. اقمولا وبلىسى -29 پايىز. جامبىل وبلىسى - 22 پايىز. وڭتۇستىك قازاقستان وبلىسى - 38 پايىز. قىزىلوردا وبلىسى- 40 پايىز. ەڭ جوعارعى كورسەتكىش 82 پايىز - اتىراۋ وبلىسىندا. جىل سوڭىنا دەيىن بۇل شارۋا شەشىمىن تابادى دەگەن ويدامىن»، - دەدى ق ر پرەمەر-مينيسترى باقىتجان ساعىنتايەۆ.

وسى تۇستا ءبىلىم جانە عىلىم ءمينيسترى ەرلان ساعادييەۆ «سيفرلىق قازاقستان» باعدارلاماسى اياسىندا قولعا الىنعان جاڭا بلوكچەيننىڭ ۇتىمدى تۇستارىمەن ءبولىستى. باس ءمۇعالىم بۇل جۇيە ءبىلىم سالاسىنداعى اقپاراتتىڭ قولجەتىمدىلىگىن ارتتىرادى دەدى. وقۋعا ءتۇسۋ، بولىنگەن گرانت، كاسىبي دەڭگەيدى كوتەرەتىن وقۋ كۋرستارى،بالاباقشاعا تۇرعان ءتىزىمدى باقىلاۋ سىندى مالىمەتتەردەگى وزگەرىستەردى ءار ادام قاداعالاپ وتىرا الادى ەكەن.