الماتىداعى 24 كوشەدە ۇگىتىلىپ كەتكەن بەتون جول جيەكتاستارى تولىقتاي اۋىستىرىلماق.

الماتىدا 28 ۋچاسكەدە جول جوندەۋ جۇمىستارى باستالىپ كەتتى. جالپى بيىل قالادا ۇزىندىعى 155 شاقىرىم بولاتىن 157 كوشە ورتاشا جوندەۋدەن وتەدى. سونداي-اق 24 كوشەدە ۇگىتىلىپ كەتكەن بەتون جول جيەكتاستارى تولىقتاي اۋىستىرىلىپ، ونىڭ اينالاسى اباتتاندىرىلماق. وتكەن اپتادا مەردىگەر مەكەمەلەر جولداردى جوندەۋدىڭ جوسپارىن بەكىتكەن. ەندى ءار نىساندا كومپانيا ديرەكتورىنىڭ سۋرەتى، جۇمىسقا تەحنيكالىق باقىلاۋ جاسايتىن جانە اياقتالۋ مەرزىمىن قاداعلايتىن ۇيىمنىڭ نومىرلەرى كورسەتىلگەن قۇجات ورناتىلادى.

بيىلعى جىلى جوندەلەتىن ءار كوشە بويىنشا اقاۋ اكتىسى جاسالادى. الىنىپ قالعان جول جيەكتاستار، تروتۋارلار مەن پاندۋستار قايتا قولدانىلادى. ياعني، جوندەۋ جۇمىستارى قاراستىرىلماعان كوشەلەر ءۇشىن پايدالانىلماق. ال بۇقارا بارلىق جولعا قاتىستى اقپاراتتى «Open Almaty» قوعامدىق پورتالىنان الۋىنا بولادى.

«قازىرگى كەزدە، مىسالى، بىزدە 24 كوشەدە بەتوندى بورديۋرلار تولىعىمەن اۋىستىرىلادى. سولاردىڭ اراسىنان جارامدىلىعى تاڭدالىنىپ الىنىپ، تەحقاداعالاۋمەن اكت جاسالىپ، ولار اۋداندىق اكىمدىككە، ناۋرىزباي اۋدانى مەن الاتاۋ اۋدانىنىڭ اكىمدىكتەرىنە پايدالانۋعا بەرىلەدى. اعىمداعى جوندەۋ جۇمىستارىندا پايدالانادى. بۇل بورديۋرلاردى»، - دەدى الماتى قالاسى جولاۋشىلار كولىگى جانە اۆتوموبيل جولدارى باسقارماسى باسشىسىنىڭ ورىنباسارى  ساعىندىق تەلىبايەۆ.

ال ماماندار جوندەۋدەن وتەتىن كوشەلەر ءتىزىمى جايلى اقپارات حالىققا بارىنشا قولجەتىمدى بولادى دەيدى. سونداي-اق الماتىلىقتاردان ۋاقىتشا قولايسىزدىق تۋدىرعاندارىنا تۇسىنىستىكپەن قاراۋدى وتىنەدى. ءبىراق ۋاقىتشا كولىك قوزعالىسى توقتاتىلاتىن كوشەلەر بويىنشا  الدىن الا ەسكەرتىلمەك.

«مىنا ورتاشا جوندەۋ جۇمىستارى جۇرگىزىلۋ بارىسىندا تەك قانا جول جابىندىسى عانا اۋىستىرىلىپ قويماي، سونىمەن قاتار، جارامسىز جاعدايدا ارىق ناۋالارى، سونىمەن جاياۋ جۇرگىنشىلەرگە ارنالعان جولدار تولىعىمەن جاسالادى. سونىمەن قاتار، كوشە ايماعىنداعى اباتتاندىرۋ جۇمىستارى تولىعىمەن جاسالاتىن بولادى. ورتاشا جوندەۋ كەزىندە كوشەلەردى جاپپاۋعا تىرىسامىز. ءبىراق اسفالت بەتون جابىندىسىن سالۋ كەزىندە 1 كۇن، 2 كۇنگە كوشە جابىلاتىن بولادى»، - دەدى  الماتى قالاسى جولاۋشىلار كولىگى جانە اۆتوموبيل جولدارى باسقارماسى باسشىسىنىڭ ورىنباسارى ساعىندىق تەلىبايەۆ.

الماتىداعى گاگارين، جاروكوۆ، سادىكوۆ، ياسساۋي، بايتۇرسىنوۆ، ماقاتايەۆ كوشەلەرىندەگى جول جيەكتاستارى ءتوزىمدى گرانيتكە اۋىستىرىلادى. ويتكەنى، بۇل ماتەريال تەز ۇگىلەتىن بەتونعا قاراعاندا وتە ءتوزىمدى كەلەدى ەكەن. ال مىنا ۋچاسكەدەن بورديۋردىڭ ازىرگە تەك 10 پايىزى عانا جارامدى بولىپ شىققان. ونى مەردىگەر مەكەمە جيناپ، ساقتاۋعا تاپسىرادى.

«ءبىز 2 شاقىرىم 80 مەتر شاقىرىم بولاتىن جولدى جوندەۋدى الدىق. ءال-فارابي كوشەسىنەن باستاپ، اسقاروۆ كوشەسىنەن اياقتالادى. وسىعان دەيىن بەتوننان جاسالعان جيەكتاس بولعان. ونى گرانيتكە اۋىستىرىپ جاتىرمىز. اسفالت جابىنىن دا اۋىستىرامىز. 26 ناۋرىز كۇنى باستادىق، كەلىسىم-شارت بويىنشا 15 مامىر كۇنى اياقتاۋىمىز كەرەك. 3 جىلعا بەرەتىن كەپىلدىگىمىز بار»، - دەدى مەردىگەر مەكەمە باسشىسىنىڭ ورىنباسارى يۋريي چا.

ايتا كەتەيىك، قالا باسشىسى حالىققا قولايلى بولۋ ءۇشىن جۇمىستى بارىنشا ساپالى ءارى قىسقا مەرزىمدە اياقتاۋدى تاپسىردى. ءقازىردىڭ وزىندە مەردىگەر مەكەمەلەر ارنايى قورشاۋدى الىپ، ءار وبەكتىدە جۇمىس اتقاراتىن قۇجات ورناتىپ ۇلگەرگەن. ناقتى جۇمىس كەستەسى بەكىتىلىپ، 157 كوشەنىڭ 80 پايىزى 25 تامىزعا دەيىن، قالعان 20 پايىزى قىركۇيەكتىڭ اياعىنا دەيىن اياقتالادى دەپ جوسپارلانىپ وتىر.